Read Thado Chin Ezekiel 6 Bible Online

Ezekiel 6 - Thado Chin bible

Ezekiel 6

¹Chuin Pakai thu chu kahenga ahungin, hitin ati,

²Mihem chapa, Israel molsang ho lam nganlang, amaho dounan gaothu seijin,

³Nangho Israel molsang ho, Pakai Pathen thu ngaijun; Pakai Pathen'in molsang ho, lhangho, vadungho chule phaicham ho henga hitin aseije; Vetan keima, keimatah ngeijin nangho chunga chemjam kahin chuhsah ding, chule keiman namun sang hou chu kasuhmang ding ahi.

⁴Chule namaicham hou chu hung kamhel ding, semthu milimho jong suhsetna umding; chule keiman akithatsa namite chu namilimhou masanga kaselhah ding ahi.

⁵Chule keiman Israel chate thilongho chu alim semthuhou angsunga kalelhah ding; chule naguhou chu namaicham hou kimvela kathechap jeng ding ahi.

⁶Namaicham hou akeohel le akamhela aumna ding, na pathen semthuhou suhkeh le suhmanga aum nading, namilim semthuhou satlhah-a auma, chule nanatoh hou suhmanga aum theina dinga; nangho chenna mun jouse-a khopiho chu ahom keuva kilha ding, chule munsang jouse chu kamhela umding ahi.

⁷Chule akithat ho chu nalah tah uva lhujeng ding ahiuvin, chuteng keima Pakai chu kahi nahetdoh dingu ahi.

⁸Ahijeng vangin nangho gamho-a thecheh-a nahung umtengule, namtinho lah-a chemjam'a asohcha phabep nanghon nanei theina dinguva keiman ahingdoh amoh honkhat kadalhah ding ahi.

⁹Chule nalah uva asohchase vang chun gal hinga akikai lutna lam lamu namtinho lah-a chu keima eihin geldoh jing dingu ahi, ajehchu keija kona anapetmang jonlung poho lungsung, chule amit hou jonmit po-a alim semthuhou juiho chutoh kakikhen ahitai. Chule amaho akisuh bohnao jouse-a agilou anaboldoh jouseu jeh-a chu amahole amaho kikidah ding ahiuve.

¹⁰Chule keima Pakai kahi leh, hiche thilse amaho chunga kahinbol ding chu moh-a kasei ahipoi ti amahon ahetdiu ahi.

¹¹Pakai Pathen'in hitihin aseije, Nakhutnin jepmin, chule nakengin lhonlang seijin, ohe, ada ahiuve! ijeh inem itile Israel insung gilou thet umtahho jeh-a, amaho chemjam'a, kella, chule hise-a lougam ding ahiuve.

¹²Koihileh gamlatah-a umchu hise-a thitei ding, chule koihile anaija uma chu chemjam'a loutei ding, chule koihile aumden le umkimvel khuma uma chu kella thitei ding ahiuve. Hiti ahi keiman kalungsatna chu amaho chunga kamolso ding ahi.

¹³Chutengle amilimhou hou lah-a, amaichamu kimvela, lhangsung chung tina, molsang ho chungvum tina, chule thinghing phungnoi tina, gangpi phungnoi tina, amilimhou henga gimnamtui apehnao munho jouse-a chu akithat ho sechu ahung umtengle, nanghon keima Pakai kahi nahet dingu ahi.

¹⁴Hiti ahi keiman achunguva kakhut kalhah-a, agamu kamhela kalha ding; chule Diblath lama gamthip sanga jong kamhel jo-a kalha ding ahi. Chule amahon keima Pakai kahi chu eihin hetdoh dingu ahi, ati.