Read Thado Chin Ezekiel 7 Bible Online

Ezekiel 7 - Thado Chin bible

Ezekiel 7

¹Hiche chungchon chun Pakai thu chu kahenga ahungin, hitin aseije,

²Nangma mihem chapa, Pakai Pathen'in Israel gam henga hiti jonghin aseije; Achaina, achaina chu gam ningliho chunga ahung lhungtai.

³Tuhin achaina chu nangma chunga hunglhunga ahitai, chule keiman nachunga kalunghana kahin lhunsah ding, chule nalam lhah dungjuija nathu katan ding ahi, chule thet umtah nahinaho jouse chu nachunga kalethuh ding ahi.

⁴Chule kamitnin nangma nakhehchah louding, khotona jong kaneilou ding ahi. Ahivangin nalam lhah ho keiman kalethuh cheh ding, chule thet umtah nahina ho chu nalah tah-a umding; chuteng nangman Pakai kahi chu nahetdoh ding ahi.

⁵Hitihin Pakai Pathen'in aseije, Veuvin, thilgilou, thilgilou sehseh bou ahunge.

⁶Achaina chu ahungin, achaina chu ahung lhungtan; hichun nangma navelhi jingin, ven, hichu ahung lhungtai.

⁷Vo gamsunga cheng nangma, jingkah chun nahinphatan, phat chu ahung lhungtai; hamsetna nikho chu ahung naitai, molsang ho gin athongkit tapoi.

⁸Tu-a chomlou kah-a nachunga kalungsatna kahinbuhlhah ding, chule kalunghana chu nachunga kamolso ding ahi. Chule keiman nalam lhah dungjuija nachunga thu katan ding, chule thet umtah nahinaho jouse jeh-a kalethuh ding nahi.

⁹Chule kamit nin nangma nakhehcha pontin, keiman khotona jong kanei louding ahi. Nalam lhah hole nalah tah uva thet umtah nahinaho dungjuija nangma kahinlethuh ding; chutengle nangman najepma chu Pakai keima kahi hi nahin hetding ahi.

¹⁰Vetan nikho chu, vetan ahunglhunga ahitai. Jingkah chu achemangtan; tenggol pahcha bangin apah lhatan, kiletsahna chu pahchamum bangin amum dohtai.

¹¹Hunam nahi gitlouna tenggolin ahung umdoh tan; amaho khatcha umden loudiu, ahaona jouseu ahin, anei agou jouse jong khatcha umden louding; chujongle koiman amaho pul adou louding ahi.

¹²Phat chu ahung lhungtan nikho chu ahung naitai. Thil chopa chu kipah hihhen, thil johpa jong lunghem hihhen; ajehchu amihonpiu chunga lunghanna chua ahitai.

¹³Ijeh-inem itile amaho hingnalai jongleu, ajohdohsao chu ahenguva hungkile kit louding ahi. Ajehchu gaothilmu hin amihonpiu jouse atongkha cheh-in, hichu kile kit louhel ding ahi; chujongle khan gitlouna-a hingjouse koima ama le ama thahat kipethei louding ahi.

¹⁴Amahon amijouse gotsa ahitheinan sumkon amut taovin; ahinla koimacha galmun jona chea aumpoi. Ajehchu kalunghana hi amihonpiu chunga chu chua ahitai.

¹⁵Chemjam chu polama aumin, natset le kellhah chu asunga aume; loujaova um chu chemjamin thintin, chule khopi sumga um chu kel le natsetna thiding ahi.

¹⁶Ahinla alah uva kona jamdoh ho chu sohchao vintin, phaicham vakhuho banga molsang ho chunga umdiu, abonchauva amacheh khan gitlouna alunghempi diu ahi.

¹⁷Khut jouse chu ngoijin tin, chule khup jouse chu twi banga lhoplha ding ahi.

¹⁸Amahon khaodip pon jong akigah dingu, chule tijatnan atoma, amaiju jum-a, aluchanghou tolsoh ding ahi.

¹⁹Amahon adangka hou lamlena aselhah dingu, asana hou jong akiladoh dingu ahi. Pakai lunghanna nikho nile adangka houle asanahou chun amaho alhatdoh joulou dingu ahi. Hicheho chun ahinkhou jong alungkimsah joulou ding, a-oiju jong avasah joulou ding ahi. Ajehchu hicheho chu akhan gitlou naova akipalnao hija ahi.

²⁰Akivona hoina dingun, amaho lultah in akijemun; ahinla hicheho-a chun akisuhboh nao amilimhou, chule kidah umtah thilho chu asemuve. Hijeh-a chu amaho-a kona kakoi gamlat ahi.

²¹Chule keiman hiche chu hetlou miho khutna kivahna dinga kapeh-a, chule leiset mikhang gilouho henga galthila kapeh ding; chule amahon hichu asuhboh dingu ahi.

²²Kamai amaho-a kona kaheimang ding, chule amahon kamun theng chu ahinsuhboh dingu ahi. Ijeh inem itile gucha michomho hiche sunga chu lut uva, chule hichu asuhboh dingu ahi.

²³Khaokol vuikhat semin, ijeh-inem itile gamsung chu thisan kisona gitlouna-in adiptan; chule khopi chu hunamin adiptai.

²⁴Hijeh-a chu keiman Pathen helou lah-a aphamopen chu kahinpui ding, amahon a-inhou chu alodiu, athahatnao kiloupisahna jong kasuhbei ding; chule amuntheng hou chu suhboh-a umding ahi.

²⁵Manthah na ahung lhungtai; amahon chamna ahinhol dingu, amavang chamna umlou helding ahi.

²⁶Setna chunga setna hunglhung ding, chule thuthang chunga thuthang chuding; chuteng amahon themgao thilmu ahin holdingu; ahivanga danthu chu thempu-a kona, chule thumop chu upaho-a kona mangsoh ding ahitai.

²⁷Lengpa chu lunghem ding, leng chapa jong manthah na-a kivon ding, chule gamsung mite khut ho chu ngoilha ding ahi. Keiman amaho achonnau dungjuija kabola, achan dinguva lom dungjuija athu-u katan ding; chuteng amahon keima Pakai kahi chu ahet dingu ahi.