Read Thado Chin Ezekiel 8 Bible Online

Ezekiel 8 - Thado Chin bible

Ezekiel 8

¹Chule kumgup channa, alhagup channa, chule hiche lhasung ninga nin, keima ka in sunga katouvin; chule Judah upaho ka-anga atou laijun, Pakai Pathen khut chu keima chunga ahung chun ahi.

² Hichun kaven ahile, veuvin, meikou limso bangjeng, akonga pat noilamse meikou; chule akonga pat chunglamse chu lhe lahlah-a a-engdum tobang vouso kamun ahi.

³Chuin aman khutlim khat ahin lhahdoh-in, chule kaluchunga kasam lomkhatnin eimanin; chule lhagaovin leile van kah-a eidom touvin, Pathen gaothil musahna-a Jerusalem'a kotpi sungnungjo sahlam nga kotphung, thangthipna milim touna, thangthipna dinga lunghansahna touna chu eihin lhuttan ahi.

⁴ Chule veuvin, phaichama gaothilmu kamu dungjuijin, Israel Pathen loupi chamkimna chu hia chun anaume.

⁵Hichun aman kahenga, Mihem chapa, tun sahlam ngan gakhodah-in, eiti. Hitichun keima sahlam ngan kagakhodah-in ahile, veuvin, maicham kotpi sahlam pang lutna-a chun thangthipna milim aume.

⁶Aman kahenga aseibe kitnin, Mihem chapa, hiche hohin ipi abolu ahi namu em? Kamunthenga kona kagamlat nadinga Israel insungin nasatah-a thet um hilai mun'a aboluhi? Ahinla nangma gakihei kit nin, chutile nangman thet umcheh namukit ding ahi, ati.

⁷Chuin aman keima hongsung kotna chun eihin puijin, chuin keiman kagahven ahile, veuvin, banga chun ahom khat anaume.

⁸Chujouvin aman kahenga, Mihem chapa, bang chu lai temin eitin; chuin bang chu kalaija ahile, kotkhah kamu doh-e.

⁹Chuin aman kahenga, Lutnin, chule hikoma chun khangitlouna thet umtah abolu chu gaven eiti.

¹⁰Hitichun keima kalutnin ahile, a-opma kithol ganhing jouse, chule thet umtah gamsaho, Israel insung semthu milimho akimvela bangho-a jihtho-a aum chu kagamun ahi.

¹¹Chule amaho anga chun malaija Israel insungmi pasal somsagi hochu adinguvin, chule amaho lailung tah-a chun Shaphan chapa Jaazaniah chu adingin, mitinin akhutna ama lhengcheh akichoijun; chule gimnamtui meikhulom satah chu chunglama akal touve.

¹²Chujouvin aman kahenga hitin seije, Mihem chapa, malaija Israel insung miten muthim lah-a ipi abol, chule mitinin ama ama lunggelna indan sunga ipi abolu namu em? Ajehchu amahon, Pakaiyin eimupouve, Pakaiyin leiset adalhatai atiuve.

¹³Chule aman kahenga hitin jong aseije, Gah kiheikit tadin, chutile amaho thilbol thet umjocheh namu ding ahi, ati.

¹⁴Chujouvin aman keima Pakai in kotpi sahlampang nga-ah kotna chun eihin puitan; chule veuvin, hia chun Tammuz dinga kap numei ho anatouvun ahi.

¹⁵Chujouvin aman kahenga aseijin, Vo mihem chapa, nangman hichehi namunah em? Nangma gakihei kitle chun hicheho sanga thet umjocheh namu ding ahi, ati.

¹⁶Chuin aman Pakai indan sungnungjoa eipui lutnin ahile, veuvin, Pakai houin kotphung, hongcha le maicham kikah-a chun mi somni le nga, Pakai houin nung ngatna, amaiju solam ngacheh aumu vin; amahon solam ngan nisa ahouvun ahi.

¹⁷Chujouvin aman kahenga aseije, Vo mihem chapa, hichehi namutah em? Judah insungin hilai mun'a abolu thet umtahho hi thil neocha hintem? Ijeh inem itile amahon gamsung hi hunam adiptauvin, chule amaho keima phinse-a lunghansah din ahung kileuve. Ven, amahon abah chu anahkuiju toh asutouve.

¹⁸Hijeh-a chu kenjong lungsa tah-a kabol ding; kamitna jong kadeplou ding, hejong kahepi louding; chule amaho awsang tah-in kana benga kap jongleu, kangaipeh dehlou dingu ahi, ati.