Read Thado Chin Ezekiel 9 Bible Online

Ezekiel 9 - Thado Chin bible

Ezekiel 9

¹Aman kana benga aw sangtah-in asamin, Khopi dunga thunei ho chu hinnailut sah-in, chule amitakipmin akhutna suhsetna amanchah cheh kichoihen, ati.

²Chule, veuvin, sahlam panga um kotpi sangjo lama konin mi gup ahunguvin, amitinin akhutnuva mithana manchah achoijun; chule amaho lah-a khat chu tupat ponin akivonin, chule apanga lekha jihho lekhatwi thei khat akikhaije. Chuin amaho achelutnun, sum eng maicham koma adingun ahi.

³Chule Cherub chunga um Israel Pathen loupina chu kotphung geijin akitol toutan ahi. Chuin aman tupatpon kivon apanga lekha jihho lekhatwi thei khai mipa chu agah kouvin;

⁴ Chuin Pakai chun ama henga hitin aseije, Khopi lailung, Jerusalem lailung jotpaijin lang, alah uva thet umtah kibol jeh-a khoisa-a kap ho dehpanga melchihna nata ding ahi, ati.

⁵Chule keima jah dingin adangho henga aseijin, khopi sunga chun amanung juijun lang, nakhut lha uvin, chule namitnun demchah hih-un, khotona jong neihih un, ati.

⁶Ateh akhang, numei ho le chapang neoho, chule nupiho thatgam keijun, ahinla koihile achunga melchihna umchan chu ganai hih-un; chule kamunthenga konhin panjengun, ati. Hichun amahon inmaija um tehse ho-a chun apanpai jeng taove.

⁷Chuin aman amaho henga, In chu suboh unlang, hongsungho chu akithat ho-a chun dipmun; chule nangho kondoh-un, ati. Chuin amaho akondoh-un, khopi sunga miho chu athat taove.

⁸Chuin ahitin ahi, amahon amaho atha laitah-un, keima kahoidohtan, hitichun keima kaboh khupmin kalhun, kapengin, kaseije, O Pakai Pathen, Jerusalem chunga nalungsatna nasunlhah na-a hi, Israel lah-a amohho jouse jonghi nasuhmang sohding hitam? kati.

⁹Hichun aman kahenga, Israel le Judah insung khan gitlounahi alen valtai, chule gamsung thisan adimin, khopisung khelna-in adimtan ahi. Ajehchu amahon, Pakaiyin leiset adalhatai, chule Pakaiyin amutapoi, atiuve, tin aseije.

¹⁰Kei hijong leng, kamitnin adepchah lou ding, khotona jong keiman kaneilou ding, akiman chahnao alu chunguva kalethuh ding ahi.

¹¹Chule, veuvin, tupat pon kivon, apanga lekha jihho lakhatwi thei khai mipa chun, athu chu keima neithupeh bangin kaboltai, tin alhut tai.