Read Thado Chin Daniel 1 Bible Online

Daniel 1 - Thado Chin bible

Daniel 1

¹ Judah lengpa Jehoiakim leng chan kal kum thum lhinna-in, Babylon lengpa Nebuchadnezzar chu Jerusalem lama ahungin, ahung umkimvel tan ahi.

² Pakaiyin Judah lengpa Jehoiakim chu ama khutna, Pathen insunga kongle bel phabep toh apehdohthan; hichu aman Shinar gamsunga a-pathen insunga apolutnin; chule aman kongle bel ho chu a-pathen'u thillu koina insung alhut tan ahi.

³Chuin lengpa chun nukiso ho lamkaipa Ashpenaz jah-a chun Israel chate, leng chilhah, leng chapate lah-a kon mi phabep ahinpui dingin ahetsah-in,

⁴Amaho chu, ama-a nolna kimulou golhang, ahivanga melhoi, chihna lam jouse-a bulhing, hetna giltah nei, ijakai hethem bai, lengpa insunga dingthei ding, Chaldea mite themna le pao hilthei dingho ahiuve.

⁵Chule lengpan amaho chu lengpa anneh le adonji ju chu nitina achan diuvin agotpeh-in: chutia chu kum thum khoukhah-a aumjou tengule lengpa anga akilah diuvin agongtan ahi.

⁶Tun hiche miho lah-a hin Judah chate, Daniel, Hananiah, Mishael chule Azariah apanguve.

⁷Amaho chu nukiso pipupa chun aminvon: hitichun aman Daniel chu Belteshazzar, Hananiah chu Shadrach, Mishael chu Meshach, chule Azariah chu Abednego asahtai.

⁸Ahivangin Daniel'in lengpa anneh le adonji ju-a akisuhboh lou dingin alungsunga kigel lhahna aneijin: hijeh chun aman akisohboh louna dingin nukiso pipu henga chun ataotan ahi.

⁹Tun Pathen'in Daniel chu nukiso pipupa mitmu-a khohsahna le ngailutna giltah ahin chansah tai.

¹⁰Chuin nukiso pipupa chun Daniel henga, Nangho dinga nehding le donding hinteppeh ka pakai lengpa chu keiman kaginge. Ajehchu ibola nakhangol golhangho maiso sanga nangho maiso phamo jo-a amu ding ham? Chuti taleh nanghon lengpa henga kaluchanghi tijat um nasodiu ahi, tin aseitai.

¹¹Chujouvin Daniel'in nukiso pipupan Daniel, Hananiah, Mishael chule Azariah vesui dinga akoipa Melzar henga aseitai;

¹²Nisom sungin nasohte neipatep un tia kangeh nahi, chule amahon keiho neh dingin anche, chule don dingin twisih eipeuhen.

¹³Chujou tengle nangma angsunga keiho mel leh lengpa an neh ne-a golhangho mel vet kah-in umhen; chule namu dungjuijin nasohte chunga hin boljengin, ati.

¹⁴Hitichun hiche thua hin amapan aseiju chu anoppehtan, chule amaho chu nisom sung apatep tai.

¹⁵Chuin nisom ahung kichaijin, lengpa an neh ne-a golhangho jouse sangin amaho chu mel hoijo le tahsa phajon ahung kilangtan ahi.

¹⁶Hitichun Melzar'in achan dinguva kipe, aneh diu an le adon diu ju chu alamangin; chule amaho chu anche apejotan ahi.

¹⁷Hiche golhang liho vangchu, Pathen'in themna jouse le chihna lam jouse-a hetna le boltheina apen; chule Daniel'in gaothilmu le mangho jouse lama hetthem theina ananeijin ahi.

¹⁸Tun lengpan amaho nahinpuilut ding ahi tia asei nikho alhun phatnin, nukiso pipupan amaho jouse chu Nebuchadnezzar anga apuilut tan ahi.

¹⁹Chuin lengpan amaho chu akihoupin, chule amaho lah-a chun Daniel, Hananiah, Mishael chule Azariah tobang akimupon ahi. Hijeh chun amaho lengpa anga ading taovin ahi.

²⁰Chule chihnale hetthem theina lam jouse-a lengpan amaho chu adongin ahile, alengvai pohna gam pumpi-a mitpheldoi choiho le ahsi lekhathem ho jouse sanga chan soma sangjon amutan ahi.

²¹Hitichun Daniel chu Cyrus lengpa lengchan kum masapen geijin ahung umpeh tan ahi.