Read Thado Chin Daniel 10 Bible Online

Daniel 10 - Thado Chin bible

Daniel 10

¹Persia lengpa, Cyrus lengchan kal kum thum na-in thilkhat Daniel, Belteshazzar tia kimin vopa henga phondoh-in ahung umin; chule athil chu tahbeh ahin, ahinla aphat kitep vang chu asaove. Chule aman athil chu ahethemin, chule athilmu chunga chun hetthem theina aneije.

²Chuche laichun keima Daniel'in hapta thum lhingset kana lunghemin ahi.

³Keiman hapta thum alhin kahsen, anneh tuijong kanepon, jule sa jong kakama alutpon, chule hapta thum alhin kahsen thao jong kakinu khapoi.

⁴Chule lha masapen nisomni le nili nin keima Hiddekel kite vadung lentah panga kana ume.

⁵ Chuin kagakhoda-a, kagahvetle, pasal khat tupat pona kivona, uphaz sana thengsetna atai kigeh khat kamun ahi.

⁶Atahsa chu songmantam engdum abangin, chule amaiso chu kolphe abangin, amit teni chu meikou kide abangin, abanho le akengphangho chu sum-eng kinot valset abangin, chule apaodoh gin jong mipi tamtah awgin abang jengin ahi.

⁷Keima Daniel'in bou thilmuhi kamun; kana umpi pasal hon thilmuhi amupouve; ahinla kichatna nasatah achunguva achun, chutichun amaho gakisel dingin ajammang gam taove.

⁸Hitichun kachangin eikidalhan, chule hiche thilmu loupitah hi kamun, tha himhim kanei tapoi; ajeh chu kamel lomna jouse asesoh-in, katha jouse jong abeiheltan ahi.

⁹Achutijeng vang chun keiman ama thusei awgin chu kajan; chule ama thusei awgin kajah petchun keima nomtah-in ka-imun, kamai tolla kasulutnin ahi.

¹⁰Chuin veuvin, khut khatnin eihin thamin, hichun kakhup teni le kakhut phang teni kingamin eidindoh sah-in ahi.

¹¹Chule aman kahenga, ngailut umtah, vo Daniel, nahenga kathuseiho hethemin, chule ding jangin: ajehchu nangma henga keima eihin kisol ahi, tin aseije. Aman hichu asei phatnin, keima kithing pumpumin kadingin ahi.

¹²Chujouvin aman kahenga, Daniel kicha hih-in: ajehchu nalunga nahet them theina dinga chule na Pathen angsunga kisehgim dinga nalung napehpat nikho-a patna chu nathuseiho kingaipeh-a nahitan, chule nathuseiho jala chu keima hunga kahi.

¹³ Ahinla Persia lenggam pipuipan nisomni le nikhat eina lamtine; ahinla veuvin, pipuiho lah-a khat Michael eipanpi dingin ahungin, chule chua chun Persia lengho toh kanaum khome.

¹⁴Tuahi phat nunung lama namite chunga ipi hunglhung ding ham ti nangma hetsah dinga keima hunga kahi: ajehchu gaothilmu chu nikho tamtah nunga ding ahinalaije, ati.

¹⁵Aman hiche thuho kahenga asei chun, kamai tollam kangan, chule keima paomon kaumtan ahi.

¹⁶Chule veuvin, mihem chapate kilopi khatnin kamuh ahin thamin ahi: chuin keima kakam kan, ka-anga dingpa henga chun, Vo ka Pakai, thilmu hin kachunga lunggimnaho eihinlhut peh-in, tha himhim jong kanei tapoi.

¹⁷Ajehchu hiche ka pakai sohpa hin ka pakai hi iti akihoupi theiding ham? Keima kahile vang, hiche pettah chun keima-a tha le haina thei himhim aumtapoi, katitai.

¹⁸Chuin mihem melput tobang pu-a khat ahung kitnin, eithamin, eihatsah-in,

¹⁹Chule kajah-a, Vo ngailut umtah mihem, kicha hih-in; nachunga lungmon umhen, hatnin, henge, hatnin ati. Aman kahenga thu ahinsei phatnin kahung hatdohtan, chule ahenga, nangman neisuh hattah jeh-in, ka Pakaiyin seitan, kati.

²⁰Chujouvin aman kahenga, nahenga kahung lona ajeh nahet em? Chule tuahi keima Persia pipuipa toh kisat dinga kakile kit ding ahi: chule keima kachedoh nungle, veuvin, Greek pipuipa hung ding ahi.

²¹Ahinla thutah thutheng bu-a kijihlutsa anaum chu keiman nangma kavetsah ding nahi. Chule hiche thilho-a hin napipui pao Michael tailou keima eipanpi koima aumpon ahi, ati.