Read Thado Chin Daniel 11 Bible Online

Daniel 11 - Thado Chin bible

Daniel 11

¹Mede mipa Darius lengchan kum masapa sungin, keima ngei jong ama sudet dingle suhat dingin kanadingin ahi.

²Chule tu-a hi keiman thutah chu nangma kahin vetsah ding ahi. Veuvin, Persia gama leng thum hung dingdoh kit nalai ding; chule amaho jouse sanga alina chu gam chenga hung haosajo ding ahi. Chule aman ahaonaho le athahatna jala Greek lenggam doudinga mijouse achothou ding ahi.

³Chule leng thahat tah hung dingdoh-in tin, ama chun thaneina lentah toh tho-a vai ahinhoma, aman alungdei dungjuija abolding ahi.

⁴Chule ama ahung dindoh teng, alenggam chu hung kehding, leiset kolningli-a hopkhena umding; ama sonle pahho henga hilou ding, chule ama vaihomna gamkai dungjuija jong hilou ding ahi. Ijeh inem itile hicheho chengse tilouva adangho dinga jong ama lenggam chu suhlhah-a umding ahi.

⁵Chule lhanglam lengpa chu hung hatdoh ding, chule apipuiho lah-a khat toh; chule ama chu amapa sanga hung hatjoa, lenggam anei ding; alenggam chu lenggam lentah hung hiding ahi.

⁶Chule kumho ahung kichai lamteng amahole amaho hungkigom khom ding ahi; ajehchu lhanglam lengpa chanu chu sahlam lengpa henga kinoptona sem dinga hung ding; hijongle amanu chun ban thahatna chu atuhden lou ding; amapa ahia, chule amapa ban ahia ding lou ding ahi. Amavang amanu chu amanu hinpuiho, amanu hingpa, chule hicheho phat laija amanu ana suhatpa toh pehdoh-a umding ahiuve.

⁷Hijongle amanu jungho bahkhatna kona amapa mun lo ding khat hung dingdoh intin, ama chun galmi hon khat ahin kilhonpia, chule sahlam lengpa kulpi sunga hunglut uva, amaho akidoupi dingu, chule ajo dingu ahi.

⁸Chule Egypt gama sohchang dinga a-pathen hou, apipuihou toh, sana le dangka-a kisem akong le belu manlutah ho chu apohlut ding; chule amapa chu sahlam lengpa sanga kum tamjo umpeh nalai ding ahi.

⁹Chutia chu lhanglam lengpa chu amapa lenggama chu hunglut ding, chule ama agama kilekit ding ahi.

¹⁰Ahinla achapate chu suh thouvin hung umuntin, chule galsatmi mihonpi nasatah ahin khopkhom dingu: chule khat chu thonlouva hunga, ahinlonvuh ding, chule ajotpai peh ding: chuteng akulpi-a hungkile kitna, kitomona asuhthou ding ahi.

¹¹Chuteng lhanglam lengpa chu alaigil kisun bangin tin, chule hungkon doh-a sahlam lengpa chu akisatpi ding: aman mihon tamtah ahintoldoh ding, hijongle mihonpi chu ama khutna kipelut ding ahiuve.

¹²Aman mihonpi chu apuimang teng, alungsung hung kichoisang ding; chule aman sangsom tamtah asuhlhuh ding: hijongle hichun ama asuhhat chom louding ahi.

¹³Ijeh-inem itile sahlam lengpa chu hung kile kitnin tin, chule amasa-a sanga mihonpi tamjocheh ahintoldoh ding, chule thonlouva kum phabep joutengle galsat mi nasatah le haona tamcheh toh hungtei ding ahi.

¹⁴Hiche phatlai teng chule mi tamtah lhanglam lengpa kidoupi ding dingdoh dingu ahi. Namite lah-a gucha michomho jong agaothilmu-u guilhunsah dinga hung kichoisang dingu; hijongle amaho lhuding ahiuve.

¹⁵Hitichun sahlam lengpa chu hungintin, chule molsang khat atundoh ding, chule kulpi kikai khum dettah khopiho chu alah ding: chule lhanglam mite hatna ananjou louding, alhentum mihon jong anan joulou dingu, nanjouna tha himhim aneilou dingu ahi.

¹⁶Hijongle ama kidoupi dinga hungpa chun alungdei deija abolding, chule koimacha ama anga dingjou umlou ding ahi. Chule ama gam loupitah sunga chu hung ding ding, hichu akhut ngeija asuhmang ding ahi.

¹⁷Ama chun alenggam pumpi thahatna le chondihho toh kitho-a hung lutding agot ding, hitia chu ahinbol ding ahi. Chule aman hiche sumang dinga chu numei ho chanu chu amapa apehding; ahivanga amanu amapa langa panglou ding, chule amapa-a ding jong hilou ding ahi.

¹⁸Hichejou tengle aman twikolho lam ahin maingat ding, chule tamtah ahinlah ding ahi. Ahivanga pipui khatnin ama kihousetna chu asuhtang ding; ama kihousetna umlouva hichu amapa chunga chukit ding ahi.

¹⁹Chutengle amapan amatah gamsung kulpilam chu ahin maingat ding: ahivanga ama chu kipal lhuding, chule kimu lou ding ahitai.

²⁰Chujou tengle amapa mun'a chu lenggam loupina-a kai dong khat hung dingdoh ding ahi. Hijongle ni phabep sunga lunghanna jeh le gal kisatna jeh-a jong hilouva, ama chu suhmanga umding ahi.

²¹Chule ama mun'a chu thet umtah mi khat hung dingdoh ding, lenggam jana chu amahon ama apeh lou dingu ahi: ahinla ama chu chamna choijin hungintin, chule lenggam chu aman phatlhem na-a akimu ding ahi.

²²Chule amaho chu a-angsunga kona twisanglen thahatnin alonvuh uva, chule suhsetna umding ahiuve; henge, kitepna pipuipa jong chutiding ahi.

²³Chule amato kiloikhomna akisem joujoule aman jonchihtah-a na ahintoh ding ahi. Ajehchu ama hung kipandoh-in tin, mi phabep khat toh hunghat dohding ahi.

²⁴Ama chu gamkai sunga mun phatah ho-a chu chamna ahin choija hungding; chule ama chun apate, chule apate pateuvin jong anabolkhah louvu chu ahinbol ding ahi. Aman galthil kilaho, galthil kichomdoh ho, chule haonaho chu amaho lah-a ahinthejal ding ahi. Henge, phat khat sunga dinga mundet ho douna dinga thilgonho angaito ding ahi.

²⁵Aman lhanglam lengpa kidoupi dinga galsat mihonpi nasatah toh kitho-a athaneinale ahansanna chu ahinsuhthou ding; chule galsat mihonpi nasatah le thahat tah toh kidou dinga lhanglam lengpa chu suhthouva hungum ding; hijongle ama dingjou lou ding ahi. Ajehchu amahon ama douna-a thilgon tampi ahinnei dingu ahi.

²⁶Henge, ama chan anneh neho chun ama asuhmang dingu, chule agalsat miho chu lonvuh-a hungum uva, chule tamtah tha-a umding ahi.

²⁷Chule hiche leng teni lungthim chu setna bolna dinga hung kipeding, chule amanin dokhang khatna jouthu aseilhon ding; ahivanga hichu lolhing lou ding ahi. Ajehchu akichaina chu phat kitep alhun teng guilhung ding bou ahi.

²⁸Chujou tengle ama haona thil tamtah toh agamsunga kile kitnin tin; chule alungsung chu kitepna theng douna hung hiding; chule aman suhsetna na atoh-a, ama gamsung ngeija kile ding ahi.

²⁹Phat kitepsa ahunglhun tengle ama hung kilentin, chule lhanglam jonna hung ding; ahivanga hichu amasa ahiloule anunungjo tobang hilou ding ahi.

³⁰Ijeh-inem itile Chittim kong inneiho chu ama toh kidou dinga hungding ahiuve. Hijeh-a chu ama lungphamo ding, hungkile kit ding, chule kitepna theng douna-a thangtom lhehding; chutia chu abolding ahi. Ama hungkile kitna, chule kitepna theng jamsanho khohsahna ahinnei ding ahi.

³¹ Chule galsat miho chu ama lama hung dingdoh uva, chule amahon thahatna muntheng chu ahin suhboh dingu, nitin ganlhaina chu alahmang uva, chule chumuna chu suhgamna boldoh-a thet umtah chu akoi dingu ahi.

³²Chule kitepna douna-a gilou tah-a thilbol hochu aman pachat lhem-a asuhboh ding: amavang a-Pathen he-a mipi hochu hatdoh uva, chule natoh lentah ho atohdoh dingu ahi.

³³Chule mipi lah-a ahethemho chun mi tamtah ahilchet dingu: ahijeng vanga amaho nikho tamtah chemjam'a, meikouva, sohchan na-a, chule galthil kichomna-a lhuding ahiuve.

³⁴Chule amaho ahunglhuh tengule kithopina themcha bou amu dingu: ahivanga mi tamtah chu pachatlhema amaho-a beh dingu ahi.

³⁵Chule hetthem theina neiho lah-a phabep chu akichaina phatchan geija lhitchil, suhtheng, soptheng, chule bansah ahi nadinguva lhuding ahiuve; ajehchu aphat kitepsa chu ngah jinga umnalai ahi.

³⁶ Chule lengpa chun ama lunglam lamin thil ahinbol ding; chule ama chu amale ama hung kidomsanga, chule amale ama pathenho jouse sanga hung kichoisang ding, chule pathen ho Pathen douna-a thil kidang dang ahinseidoh ding, chule thangtomna chu suhbulhit ahi kahse-a phatou ding ahi. Ajehchu ahidinga kigel lhusa chu kitongdoh tei ding ahi.

³⁷Ama chun apu apa teho Pathen ahin, numei ho lungdeilam ahin, chule ipi pathen hijongle ngaisah-a aneilou ding ahi. Ajehchu imajouse chunga amale ama kichoisang ding ahi.

³⁸Ahivanga aman aumna mun'a hatna Pathen chu jana apeh ding; chule apu apa tehon anahet khah louvu pathen khat chu aman sana, dangka, chule songmantam ho chule dei umtah thilho-a jana apeh ding ahi.

³⁹Chutia chu aman gamdang pathen toh kitho-a kulpidet ho douna-a na atohding, aman hichu ahetpeh-a chule aloupina aphatou sah ding: chule aman amaho chu tampi chunga thuneina aneisah-a, chule leiset chu man neija ahopkhen ding ahi.

⁴⁰Chule akichaina phat teng lhanglam lengpan ama chu ahin nokhum ding: chule sahlam lengpa chu ama doudinga chimpei banga, sakol kangtalai ho toh, sakol chung chongho toh, kong innei hotoh hung dingu; chule ama chu gamsungho-a hunglut ding, chule alonvuh khuma, chepai ding ahi.

⁴¹Ama gam loupi sunga jong hunglut ding, chule gam tamtah suhlhuh-a umding ahi. Ahinla hiche Edom, Moab chule Ammon chateho bulpi ngeihi ama khutna kona hoidoh ding ahiuve.

⁴²Aman gamho chunga jong aban ahinjah ding: chule Egypt gam hoidoh lou ding ahi.

⁴³Aman Egypt gam thil manlutah ho, sana le dangka gouho jouse chunga tha aneiding; chule Libya mitele Ethiopia mite chu ama kalsona channa umding ahiuve.

⁴⁴Hijongle solamle sahlama kona thusoh ho chun ama alungkhamsah ding: hijeh achu ama lungsa tah-a asumang dingle mihem tampi gamsahhel dinga kipandoh ding ahi.

⁴⁵Chule aman aleng inpi houbuhho chu twipiho le loupitah molsang theng kikah-a ahin tundoh ding: ahijeng vanga ama akichaina hunglhung ding, chule koimachan ama akithopi lou ding ahi.