Read Thado Chin Daniel 2 Bible Online

Daniel 2 - Thado Chin bible

Daniel 2

¹Nebuchadnezzar lengchan kum ni alhin na-in, Nebuchadnezzar'in mangho aneijin, hichun alung asugimin, a-imut asuboitan ahi.

² Chujouvin lengpan doithemho, ahsi lekhathem ho, aisanho chule Chaldea miho chu amangho hilchen dinga kou dingin thu khau tah-in apetai. Hitichun amaho ahungun lengpa anga ahung ding taove.

³Chuin lengpan ajah uva, Keiman mang khat kaneijin, hichu hetdohna dingin kalung agimlheh tai, ati.

⁴Chuin Chaldea mihon Syrian paovin lengpa henga, Vo lengpa, hing jingin: mang chu nasohte neisei peh-un, chutile keihon aledohna navetsah naovinge, atiuve.

⁵Chuin lengpan adonbutnin Chaldea miho henga chun, Athil chu keija kona chemanga ahitai: nanghon mangle aledohna chu keima neihetsah louvule, nangho ahal hala tanboh-a naum dingu, chule na-inhou jong eh kikholna kasosah ding ahi.

⁶Ahinla nanghon mang le aledohna chu nahilchet thei vangule, keija kona manbeija thilpeh le kipaman chule jana lentah namu dingu ahi. Hijeh chun mangle aledohna chu neimusah-un, ati.

⁷Amahon adonbut kitnun hitin aseijuve, Lengpan amang chu asohte eiseipeh uhen, chule keihon hiche aledohna chu vetsah-ung kate, atiuve.

⁸Lengpan adonbutnin, Nanghon thil chu keija kona achemang namu jeh uva, phat mube theina ding bouva naseiju ahi, ti keiman kahechentai, ati.

⁹Ahin nanghon mang chu keima neihetsah louvule, nangho dingin dan thupeh khat bou uma ahi: ajehchu aphat akikhel theina dinga ka-anga jou le thudihlou sei dinga nakigotnu ahi. Hijeh chun mang chu neisei peh-un, chule keiman hiche aledohna chu neimusah theidingu ahi ti kahet ding ahi, ati.

¹⁰Chaldea miho chun lengpa anga adonbutnun, hitihin aseijuve, Leiset chunga lengpa thu musahthei mihem khatcha aumpoi: hijeh-a chu chutobang thilchu mitphel doithem, ahiloule ahsi lekhathem, chule Chaldea mi anadongjia leng, pakai, ahiloule thuneija khatcha ana um khalou ahi.

¹¹Chule lengpan angaichat hi thil kikhat ahin, lengpa anga hichu tahlang jou ding tahsa-a hing hilou pathen ho tailou adang koimacha aumpoi, atiuve.

¹²Hichejeh hin lengpa alunghangin chule alungsalheh tan, chule Babylon'a miching jouse suhmang dingin thupeh apetan ahi.

¹³Chuin michingho thagam dinga dan thupeh kipe chu hopjalin aumtan; chule amaho Daniel le aloiho chu tha dingin aholtauve.

¹⁴Chujouvin Daniel'in thumop le chihna to thon lengpa ngahtupho lamkaipa, Babylon michingho that dinga chedohpa Arioch chu adonbutnin ahi.

¹⁵Aman lengpa sepai lamkaipa Arioch chu adonbutnin, ipi dinga lengpa-a kona hiche dan thupeh hi hung hiti ganna ham? ati. Hichun Arioch-in athil umchan chu Daniel ahetsah tai.

¹⁶Chujouvin Daniel alutjelin, aledohna chu lengpa amusah theina dinga, lengpan ama phat apehna dingin agathum tai.

¹⁷Chuin Daniel a-in'a achen, athil umdol chu aloiho Hananiah, Mishael chule Azariah henga ahetsah-in ahi;

¹⁸Hiche thuguh chungchang thua hi Babylon michingho jouse toh thakhatna Daniel le aloiho chu suhmanga aumlouna dinguva van Pathen hepina athum theina dingun ahetsah-in ahi.

¹⁹Chujouvin thuguh chu jan-in gao thilmu in Daniel henga phondoh-in ahung umtan ahi. Chujouvin Daniel'in van Pathen chu athangvah tan ahi.

²⁰Daniel'in adonbutnin, Atonsot atonsotnin Pathen min chu vahchoijin umhen, ajehchu chihna le thahatna chu ama-a ahi.

²¹Chule aman phat hole kum kiheichinho akheljin; aman lengho aladoh-in, lengho atungdoh-in, aman achingho henga chihna apen; chule hetthem theina neiho hetna apei.

²²Aman thugille thuguhho aphongdoh-in; muthima ipi aum aman ahen, chule vah chu amatoh aum khomin ahi.

²³Chihna le hatna eipe-ah, chule keihon nangma-a kona kangeh-u keima eihin hetsah-a, Vo Nangma kapate Pathen, keiman nangma kathangvah-in, kavah choije: ajehchu nangman tun lengpa ngaichat chu keiho neihin hetsah taove, ati.

²⁴Hijeh chun lengpan Babylon michingho thatgam dinga athupehsa Arioch henga chun Daniel achelutnin: ahenga, Babylon michingho sumang hih-in; lengpa anga keima neipuilut nin, chule keiman aledohna chu lengpa vetsah ingkate, tin agaseije.

²⁵Chuin Arioch-in Daniel chu lengpa anga kintah-in apuilutnin, ajah-a, Keiman lengpa henga ledohna pe-a hilchen ding mi khat Judah sohchangho lah-a konin kamutai, agati.

²⁶Lengpan adonbutnin, Belteshazzar tia kiminvo Daniel chu adonbutnin, Keiman kananei mang le aledohna chu neihetsah thei ding ham? ati.

²⁷Lengpa angsunga Daniel'in adonbutnin, hitin aseije, Lengpan na-ngeh khoh thuguh chu michingho, ahsi lekhathem ho, mitpheldoi choiho, chule khonung thusei ho chun lengpa avetsah thei pouve.

²⁸Ahinla thuguhho phongdoh jia van'a Pathen khat aumin, ama chun ninunung lamle ipi hungsoh dingham tichu Nebuchadnezzar lengpa ahin hetsah ahi. Namang le najalkhun chunga naluchang nangapma na gaothilmu chu hichehohi ahi:

²⁹Nangma vang, vo lengpa, najalkhun chunga naum chun, tunungle ipi hunglhung ding ham ti ngaitona nalungthima ahung umin ahi. Chule thuguhho phongdoh ji-a ama chun ipi hunglhung ding ham ti nangma nahin hetsah ahi.

³⁰Ahinla keima hina-in vang, hiche thuguhhi keiman midang jouse sanga chihna kaneitam jeh-a kahenga kiphonga ahipon, amavang lengpa henga aledohna hetsah dingho jal leh, chutia chu nangman nalungsunga nalunggel chu nahetdohna ding joh ahibouve.

³¹Vo lengpa, nangman milim lentah khat nanamun chule nanaven ahi. Hiche milim lentah avah-a vah pempum jeng chu na-angsunga adingin; chule alimdan chu tijat umtah ahi.

³²Hiche milim luchang chu sana thengsel ahin, a-ople abanho chu dangka, a-oile apheiho chu sum-eng,

³³Akeng teni chu thih, akengphang teni chu thih le leiset kihala kisem ahi.

³⁴Nangman mihem khutna kisem hilou song khat ahungdoh-a, hichun milim chu akengphang teni thih le leiset kihala kisem laitah ase khah-a, hiho chu ahal hala achipsoh nanamun ahi.

³⁵Hichun thih, lei, sum-eng, dangka chule sana chu abonin thakhatnin ahal halin achiplhan, chule nipi laija phola changsiho bang ahunghitai; chule huijin hicheho chu amut mangin, agei nalamu akihe tapoi. Chule milim sepma song chu mol lentah ahung soh-in, chule leiset pumpi alodim tai.

³⁶Hichehi mang chu ahin; chule chuche ledohna chu lengpa masanga keihon seijung kate.

³⁷Vo lengpa, nangma lengho leng nahi; ajehchu van Pathen'in lenggam, thaneina, thahat, chule loupina nangma napen ahi.

³⁸Chule aman mihem chate chenna jouse, gama saho chule chunga leng vachaho nangma khutna napedoh-in, chule amaho jouse chunga thuneijin nasemtai. Nangma hiche sana luchang chu nahi.

³⁹Chule nangma nungtengle nangma sanga hatmojo lenggam khat, chule athum channa sum-eng lenggam adang khat hung umdoh ding, hichun leiset pumpi hi vai apoh ding ahi.

⁴⁰Chule lenggam lina chu thih banga hat ding; thih in thil jouse ahal hala asuhgema anoija akoi banga; chule thih-in hitiho asuhngem banga, hichun asuhngema asuhchip ding ahi.

⁴¹Chule nangman akengphangho le kengjungho, akehkhat beldengpa lei abang thih-a namu bang ngeija hi, lenggam chu hung kikhen ding; ahinla nangman thihle leingan kihal namu bang ngeija, hiche chun thih tha aken ding ahi.

⁴²Chule keng jungho chu abang thih-a chule abang leija ahibanga, hiche lenggam chu akeh khat hatnintin, akeh khat chu lhasam ding ahi.

⁴³Chule nangman thihle leingan kihal namu banga, amaho mihem chilhah ho toh kichoh hal dingu; ahivanga thihle lei akihalthei lou banga, amaho khatle khat kitimat thei lou diu ahi.

⁴⁴Chule hiche lengho nikholai tengchule van Pathen'in lenggam khat atundoh ding, hiche chu a-imatih chana suhmanga umlou ding ahitai. Chule hiche leggam chu midangho kidalhah peh lou ding, amavang hichechun hiche lenggam ho jousehi ahal hala asuhngema chule asuhmang ding, chule hichu a-itih-a ding jing ding ahitai.

⁴⁵Nangman khutna hilou molsanga kona khendoh-a song manu-a, chule hichun thih, sum-eng, lei, dangka chule sana ahal hala asuhngem namu banga; loupi Pathen'in tununga ipi ahungso ding lengpa ahinhetsah ahi. Chule mang chu atahbeh ahi, chule aledohna chu thonlou ahi, ati.

⁴⁶Chuin Nebuchadnezzar lengpan tolla amai asulutnin, Daniel chu chibai aboh-in, chule amahon ama henga thilto le gimnamtui apeh diuvin thu apetan ahi.

⁴⁷Lengpan Daniel chu adonbutnin, Hichehi thutah ahimonge, hitichun nangma Pathen hi pathen ho Pathen le lengho Pakai ahin, chule nangman hiche thil kisel guhho naphondoh thei jal-in, thil kisel guhho phongdoh-a chu ahi, ati.

⁴⁸Chuin lengpan Daniel chu miloupi tah-in asemin, chule thilpeh tamtah ho chu apen, chule Babylon gam pumpi chunga thuneile, Babylon'a michingho jouse chunga vaihomho pipui ahisah tai.

⁴⁹Chujouvin Daniel'in lengpa henga ngehna aneijin, hitichun aman Shadrach, Meshach chule Abednego chu Babylon gamkaiho chunga vaibolin apansahtai. Ahinla Daniel vang chu lengpa kotpi phunga atouvin ahi.