Read Thado Chin Daniel 3 Bible Online

Daniel 3 - Thado Chin bible

Daniel 3

¹Nebuchadnezzar lengpan sana milim khat asemin, hichu tong somgup asangin, chule availam chu tong gup ahi. Aman hichu Babylon gamkai sunga Dura phaichama chun atungdoh-in ahi.

²Chujouvin Nebuchadnezzar lengpan pipuiho, gamvaipoho, chule gal lamkaiho, thutan ho, gouchingho, thumopthem ho, kho vesuiho, chule gamsungho-a thunei ho jouse chu khopkhoma, Nebuchadnezzar lengpan atundoh milim thensona-a hunglha cheh dingin thu athot tai.

³Hitichun pipuiho, gamvaipoho, chule gal lamkaiho, thutan ho, gouchingho, thumopthem ho, kho vesuiho, chule gamsungho-a thunei ho jouse chu Nebuchadnezzar lengpan atundoh milim thensona-a ding chun khopkhomin ahung um taovin; chule Nebuchadnezzar'in atundoh milim maija chun adingun ahi.

⁴Chujouvin khosam khatnin gingtah-in ahinsamin, Vo mipiteho, namtin, chule paotin paotangho, hichehi naheng uva thupeh ahi.

⁵Hitia chu nanghon sumkon binei, theile, selangdah, sumkonsao, tumging, chule agingthei jouse gin najah phatnule, nabohkhup uva Nebuchadnezzar lengpan atundoh milimhi nahou dingu ahi.

⁶Chule koihile bohkhupma hou louva chu chuche nidan mama chu meilhum sunga kiseplut ding ahi, ati.

⁷Hijeh chun mipi ho jouse chun sumkon binei, theile, selangdah, sumkonsao, tumging, chule agingthei jouse gin ajah jah-un, mipi ho jouse, namtin, chule paotin paotangho chu aboh khupmun, chule Nebuchadnezzar lengpan atundoh sana milim chu ahou taovin ahi.

⁸Chuti ahin chuche pettah chun Chaldea mi phabep ahung naijun, chule Judah miho chu ahung hehseuvin ahi.

⁹Amahon Nebuchadnezzar lengpa henga, Vo lengpa, hingjingin.

¹⁰Vo lengpa, nangman mitinin sumkon, theile, selangdah, sumkonsao, tumging, chule agingthei jouse gin ajah tengule bohkhup cheh uva, chule sana milim chu ahou diuvin thupeh nanapen ahi.

¹¹Chule koihile bohkhupma houlou chan chu meilhum deujeju sunga kiseplut ding ahi, natin ahi.

¹²Nangman Judah mi phabep Babylon gamkai sunga vaipo-a natun aumun, amaho chu Shadrach, Meshach chule Abednego ahiuvin; vo lengpa, hiche miho hin nangma nahsah-in nanei pouvin ahi. Amahon nangma pathen ho ajen pouvin, chule nangman natundoh sana milim jong ahou pouvin ahi, atiuve.

¹³Chuin Nebuchadnezzar'in lungsatah le lunghang tah-in, Shadrach, Meshach chule Abednego ahinpui diuvin thupeh aneitai. Chuin amahon hiche miho chu lengpa anga ahinpui taovin ahi.

¹⁴Nebuchadnezzar'in ahenguva, Vo Shadrach, Meshach chule Abednego, nanghon keima pathen ho najen pouvin, chule keiman katundoh sana milim jong nahou pouve, kitihi tahbeh ham?

¹⁵Tu-a hi nanghon sumkon binei, theile, selangdah, sumkonsao, tumging, chule agingthei jouse gin najah phatnule nabohkhup uva chule keiman katundoh milim chu hou dinga kigosa um nahi vangule, aphai: ahinla nanghon nahou louvule vang, apetpetna nangho meilhum deujeju sunga kiseplut ding nahiuvin; chule kakhut teni-a kona nahuhdoh thei diu Pathen chu koi ham? tin aseitan ahi.

¹⁶Shadrach, Meshach chule Abednego'n lengpa adonbutnun, ajah-a, Vo Nebuchadnezzar hiche thua hin keihon nangma donbut ding ngaikhoh kasapouve.

¹⁷Hitichu ahi tah-a ahi jongle, Vo lengpa, kajenpao keiho Pathen hin keiho meilhum deujejua kona eihuhdoh theiju ahin, chule nangma khutna kona jong eihuhdoh dingu ahi.

¹⁸Ahinla achutilou jongle, Vo lengpa nangman hichehi he-in, keihon nangma pathen ho kajenlou diu, chule nangman natundoh sana milim jong kahoulou dingu ahi, atiuve.

¹⁹Chutahchun Nebuchadnezzar chu lungsatnan adimtan, chule Shadrach, Meshach, chule Abednego dounan amel akikhel jengtai. Hijeh chun aman meilhum chu asatdan ajat sagi-a sajo-a satsah bena dingin thu apetai.

²⁰Chuin aman agalsat miho lah-a hatdang lhadeh ho chun Shadrach, Meshach, chule Abednego akantumuva, chule meilhum deujeju sunga alelut diuvin thu apetai.

²¹Chuin hiche miho chu asangkholchol hou, asangkhol sungnung, alukhuhhou, chule avonu adang dangin akantumun, meilhum deujeju sunga chun aseplut taovin ahi.

²²Hitichun Lengpa thupeh chu mangang tah ahi jehle, lhum chu asat behseh jeh-in, chuche meikong chun Shadrach, Meshach, chule Abednego seplutna miho chu akalihtan ahi.

²³Chule hiche pasal thumho Shadrach, Meshach, chule Abednego chu, meilhum deujeju lailunga chun kantum san alhalut taove.

²⁴Chujou chun Nebuchadnezzar lengpan kidang asan, gangtah-in akipatdoh-in, chule athumop themho henga chun, Eihon meilhum sunga chu pasal thum ikantum uva iselutnu hilou ham? ati. Amahon adonbutnun, lengpa jah-a, Ahinai lengpa, atiuve.

²⁵Aman adonbutnin, Veuvin keiman pasal li kilhamlha-a mei lailunga avaleu kamun, chule amaho ima ati pouve; chule ali channapa lim khu Pathen chapa abangin ahi, ati.

²⁶Chujouvin Nebuchadnezzar chu meilhum deujeju kot koma chun ahungin, ajah uva, Nangho chungnung pen Pathen sohte, Shadrach, Meshach chule Abednego, hungdoh-un, chule hilama hungun, ati. Chuin Shadrach, Meshach chule Abednego chu mei lailunga konin ahungpotdoh taove.

²⁷Chuin pipuiho, gamvaipoho, gal lamkai, chule lengpa thumopthem ho, khopkhoma umho chun hiche pasal ho meikouvin atahsao chunga tha aneijou lou, asamu jang khat jengjong kinlouva, asangkholhou jong kikhel dehlou, chule meikhu gim himhim jong achunguva anamlou chu amutaove.

²⁸Chuin Nebuchadnezzar'in hitin aseitai, Avantil ahinsola, ama tahsan-ah asohte ahuhdoh-a Shadrach, Meshach chule Abednego Pathen chu nunnom hen: amahon amaho Pathen tailou pathen adang anei loudiu le ahoulouna dinguvin lengpa thupeh jengjong apalkeh-un, atahsao apedoh jengun ahi.

²⁹Hijeh-a chu keiman thupeh kapeh ahi, amitakip, namtin, chule paotin paotangin Shadrach, Meshach chule Abednego Pathen douna-a seikhel khat neija chu, ahal hala kichenna, chule a-inhou jong chu eh kholna kiso ding ahi. Ajehchu hitobanga huhdoh jou Pathen adang aumpon ahi, ati.

³⁰Chujouvin lengpan Shadrach, Meshach, chule Abednego chu Babylon gam sunga chun atohmunu adomsangtan ahi.