Read Thado Chin Daniel 4 Bible Online

Daniel 4 - Thado Chin bible

Daniel 4

¹Nebuchadnezzar lengpan, Mipi, namtinho, chule paotin paotang, leiset pumpi sunga chengho henga; nachung uva lungmona punghen.

²Chungnung pen Pathen'in kachunga melchihna le thilkidang atohdohho phondoh ding pha dingin kagelin ahi.

³Amelchihnaho iti loupia hitam! chule athilbol kidangho itobanga thaneija hitam! alenggam chu tonsot lenggam ahin, chule avaihomna chu akhang akhanga umjing ahi.

⁴Keima Nebuchadnezzar hi ka-in sunga kakicholdon, chule kaleng inpia sunga khangtou tah-in kaumin ahi.

⁵Keiman mang khat kananeijin, hichun eikichat sah-e, chule kajalkhun chunga kalunggelho le kathilmu chun eilungkham sah lheh-in ahi.

⁶Hijeh chun keiman ka-anga Babylon michingho jouse puilutna aumuva, amahon kamang ledohna eihetsah diuvin thupeh khat kaneitai.

⁷Hichun mitpheldoi themho, ahsi lekhathem ho, Chaldea miho, chule khonung thusei ho ahunguvin: keiman amaho anga kamang chu kanaseijin, ahinla amahon kamang aledohna chu eihetsah thei pouve.

⁸Ahinla akhonna-in Daniel keima anga ahunglutnin, ama min chu ka-pathen min dungjuijin Belteshazzar kisah ahin, chule ama-a hi pathen thengho lhagao chu uma ahin; chule ama anga keiman kamang chu kaseijin,

⁹Vo Belteshazzar, mitpheldoi themho pipui, keiman nangma-ah pathen thengho lhagao aume, chule thuguh imachan nangma nasulung jingpoi ti kahet jeh-in, kamanga kathilmuho chule hiche aledohna chu keima neisei peh-in kati ahi.

¹⁰Hicheho hi kajalkhuna mu kananeiho chu ahi; Keiman leiset lailung tah-a thingphung khat kanamun, chule asanlam chu asang tangei jenge.

¹¹Thingphung chu ahung khangin, ahung det lheh-in; chule asan chu van aphan, leiset mong jouse-a konin hichu akimu phan ahi.

¹²Ado ho chu ahoijin, chule aga atam lheh-in, chule hichu ahingthei jouse dinga an ahi: gama saho alim noija aumun, chule chungleng vachaho abahho-a achengun, chule tahsa hing jouse hichea kon chun khoukhah-in anaumin ahi.

¹³Keiman kajalkhuna kalupma mu kanei chun, veuvin, angahpa, mitheng khat van'a kona hungkumlha kanamun;

¹⁴Ama chun gingtah-in asamin, thingphung chu phuhlhu uvin, chule abahho jong tanbongun; anaho malngim un, chule aga chu thecheh-un: anoija konchun gamsaho chu chedoh uhen, chule abahho-a konin vachaho chu lengdoh uhen.

¹⁵Hijengjongle abul le ajung chu leija thihle sum-eng khaovin kanunlang, gamlah-a hamdongho lah-a dalhauvin; chule hichu van daituijin chapkot hen, chule ama chan chu hampa lah-a saho chan toh umtha hen.

¹⁶Alungthim chu mihem lungthima konin kikhel henlang, sahem lungthim kipehen: chule achung chu phat sagin lhunkhum hen.

¹⁷Hiche thuhi angahho thupeh jal leh, mithengho thun angehkhoh jal ahi: mihemte lenggam sunga hin Chungnung pennin vai ahomin, chule hichu koihile alung lhainapa chu apen, chule mihemte lah-a anoinungpen jong chu hiche chunga chun atungdohjin ahi, ti mihing hon ahet theina dinguva kibol ahi.

¹⁸Hiche manghi keima lengpa Nebuchadnezzar'in kanamat ahi. Tun nangma, Vo Belteshazzar, aledohna phongdoh-in, kalenggam sunga michingho jousen aledohna keima eihetsah jou pouve: amavang nangman naledoh theiding ahi; ajehchu nangma-a pathen thengho lhagao aumin ahi.

¹⁹Hichun Belteshazzar kitipa Daniel chu nidan khat jen kidang satah-in aumin, chule aluggel chun asulung gimin ahi. Hichun lengpan, Belteshazzar, mang le aledohna chun nasulunggim hihhen, tin aseije. Belteshazzar'in adonbutnin, Ka pakai mang hi nahot te-a hihen, chule aledohna jonghi namelmate ho-a ding hijo hileh!

²⁰Thingphung nanamu-a, khang cheh cheh, hung kiphutdet, asan van gei phajeng, chule kolmong geija kimupha;

²¹Chuche thingdo hoisel ho, ga tamtah nei, chua ahingthei jouse dinga an aumna, anoija gamsaho achen na, chule abahho-a chungleng vachaho achen nachu:

²²Vo lengpa, hiche hung khang cheh cheh-a chule kiphut detna chu nangma nahi. Ajehchu naletna ahung khangin, chule van aphan, chule navaihom nan leiset mong aphatan ahi.

²³Chule lengpan angah-a mitheng khat van'a kona ahung nanamu-a, Thingphung chu phuhlhu uvin, chule sumangun, ahinla leija abul chu thihle sum-eng khaovin kanun lang, gamlah-a hamnou lah-a dalhauvin, chule hichu van'a daitwi chapkotnin umhen lang, chule achung chu phat sagin alhunkhum masangsen, ama chan chu gamlah-a saho chan hithahen, tia asei chu ahile,

²⁴Hichehi aledohna ahi, Vo lengpa, hichehi chungnung pen thupeh, ka lengpa pakai chunga hunglhung thupeh chu ahi.

²⁵Hitia chu amahon nangma mihem lah-a kona nadel mang dingu, chule nachenna mun chu gamlah-a gamsaho toh hitha ding, chule amahon bongchalho banga nangma hampa nanehsah dingu, chule amahon nangma van daitwija nasuhchet dingu, chule hiti achu nachunga phat sagi lhungding; nangman chungnung penin mihemte lenggama vai ahomin, chule hichu aman apehnompa chu apen ahi ti nahet masangse-a chuti ding ahi.

²⁶Chule amahon hiche thingbul chu hoidenun tia athupeh chu, vanhon vai ahomna aneijui ti nahetdoh jou tengle nalenggam chu nangma-a hikit tei ding ahi.

²⁷Hijeh chun, Vo lengpa, kathumop nahi nangma dingin santhei hihen; chonphat na-in nachonset naho subeijin, chule vaichate hepina-in nakhan gitlou naho subeijin. Chuti henlang hile nalung olna suhsaova umthei maithei ahi, ati.

²⁸Hicheho jousehi leng Nebuchadnezzar chunga ahung lhungtan ahi.

²⁹Lha somle lhani ahung kichaijin ama Babylon lenggam leng inpia avahlen ahi.

³⁰Lengpan thu aseijin, Hiche Babylon loupitah hi, kalenggam in dinga keiman kathahat kathaneina-a, chule kalalna hi jabola aumna dinga kasahdoh hilouham? ati.

³¹Lengpan thu asei nalaijin, van'a konin aw khat ahung gingin, Vo Nebuchadnezzar lengpa, hichehi nangma henga kisei ahi; lenggam hi nangma-a kona kitol manga ahitai.

³²Chule amahon nangma miho lah-a kona nadeldoh dingu, chule nachenna chu gamsaho lah hiding, amahon bongchalho banga nangma hampa nanehsah dingu, chule mihemho lenggam-ah Chungnung penin vai ahomin, chule hichu aman apehnompa chu koihile apejie, ti nahet tokahse-a phat sagi nachunga lhung ding ahi, ati.

³³Hiche nidan mama chun hichu Nebuchadnezzar chunga aguilhungin ahi. Chule ama chu mihem lah-a konin delmangin aumin, chule bongchalho bangin hampa anen, chule amulho muvanlai mul abah-a, chule atinho vachaho tin banga akhan geijin, atahsa chu van'a daitwi suhchetnin aumtan ahi.

³⁴Chuin nikhoho chu ahungbei phatnin, keima Nebuchadnezzar van lama kakhodah-in, chule kahetthem theina chu keima-a ahung kilekit tan, keiman chungnung pen chu kathangvah-in, chule keiman a-imatih chana hingjing, alengvai homna tonsotna lengvai homna hia, chule alenggam chu akhang akhanga hijingpa chu kavah choijin, jana kapen ahi.

³⁵Chule leisetna chengho jouse chu imacha hilouva sim ahiuvin; Chule aman van'a galsat miho lahle, leisetna chengho lah-a alung deilam abolin: chule koimachan ama khut akhamtang joupon, chule ama henga, ipi nabol ham? jong ati theipon ahi.

³⁶Hiche phat mama chun kalunggel theina chu kahenga ahung kilekitnin, chule kalenggam loupina dingin, jabol kahinale kaloupina chu kahenga ahung kilekitnin: chule kathumop themho le kapipui hon keima eihung holdoh-un; chule nasatah-a jabolna chu keima-a eikibe peh-in ahi.

³⁷Tunvang keima Nebuchadnezzar'in van lengpa chu kavah choijin, kachoisangin, chule jana kapetai, Ama natoh jouse thutah ahin, chule alampiho jouse thudih ahi. Chule koihile kiletsahna-a kalsongho chu, aman asunem theijin ahi.