Read Thado Chin Daniel 5 Bible Online

Daniel 5 - Thado Chin bible

Daniel 5

¹Belshazzar lengpan semang sangkhat ho din golvah lentah khat anabolin, chule chuche sangkhat maija chun ju adonin ahi.

²Belshazzar'in ju atep pumchun, apa Nebuchadnezzar'in Jerusalem houin'a kona anapohdoh sana le dangka khonho chu; lengpa, chule apipuiho, a-inneipiho, chule athaikemhon ju adonna diuva agalahdoh diuvin thu apetan ahi.

³Chuin amahon Jerusalem'a um Pathen houin'a kona anakiladoh sana khonho chu ahinpodoh taovin; chule hicheho-a chun lengpa, chule apipuiho, ajite le athaikemho chun ju adon taovin ahi.

⁴Amahon ju adonun, chule sana, dangka, sum-eng, thih, thing chule songa kisem pathenho chu avahchoi taovin ahi.

⁵Hiche pettah chun mihem khutjungho ahung kilah-in, lengpa inpi bang kiloijol meivah gahsalna laitah chu ahin jihtan; chule lengpan bang hin jih-a khut keuseh chu amutan ahi.

⁶Chuin lengpa maiso akikhel jengtan, chule alung gimlheh jengtan ahile, akong kisuhtonaho akilong gamin, chule akhup teni khatle khat akitatto jengtan ahi.

⁷Lengpan ahsi lekhathem ho, Chaldea miho, chule khonung thuseidoh ho chu ahinpuilut nadiuvin awging tah-in asamtan ahi. Chule lengpan thu aseijin, Babylon michingho jah-a chu, koihile hiche akijih simdoh-a, chule aledohna eivetsah theija chu, ponsandupma kivon ding, chule angonga sana vui ki o-peh ding, chule lenggam sunga thunei thum channa-a kipansah ding ahi, ati.

⁸Chuin lengpa michingho jouse chu ahunglut taove. Ahinla amahon akijih chu asimdohthei pouvin, chule aledohna jong lengpa ahetsah thei tapouvin ahi.

⁹Hichun Belshazzar lengpa chu hatah-in alungkham chehtan, ama-a chun amaiso akikhehtan, chule asemanghon kidang asataovin ahi.

¹⁰Tun lengnu chu lengpa le asemangho thusei ho jeh-in golvah insunga ahunglutnin, chuin lengnun hitin aseije; Vo lengpa, hing jingin: nalunggel ho chun nangma nagimsah hihhen, chule namaiso jong kikhelsah hih-in:

¹¹Nalenggam sunga hin pathen thengho lhagaoho umna pasal khat aumin ahi. Chule napa nikho laijin ama-a chun pathenho chihna tobang, salvahna, hetthem theina, chule chihna akimudoh-in; kaseipeh nahi, amachu Nebuchadnezzar lengpa, napa lengpa chun mitpheldoi choiho, ahsi lekhathem ho, Chaldea miho chule khonung thusei ho pipuija anapansah ahi.

¹²Ajehchu lhagao kidangtah, hetna, hetthem theina, mangho ledohna, thulhuh hahtahho mudohsahna, chule lung opkai naho suhbeina chu, lengpan amin Belteshazzar anasah Daniel'a chun ana kimudoh-in ahi: tun Daniel chu kousah-in, chule aman aledohna navetsah ding ahi, ati.

¹³Chuin Daniel chu lengpa anga puilutnin aumtai. Chuin lengpan Daniel henga aseijin, Judah gama kona kapan ahinpuidoh, Judah sohchangho chate lah-a Daniel kiti chu nangma nahim?

¹⁴Keima nangma-a pathenho lhagao nangma-a aumin, vah le hetthem theina chule chihna nasatah nangma-a akimue, ti kanajan ahi.

¹⁵Chule tutah chun michingho le ahsi lekhathem ho chu hiche akijih simdoh dingle, aledohna keima eihetsah dingin ka-angsunga ahung kipuilut un; ahinla amahon hiche thil ledohna chu avetsah thei pouve.

¹⁶Chule nangman ledohnaho nabol theijin, chule lung opkai naho jong nasubei theije, ti nachung chang thu keiman kanajan ahi. Tun nangman hiche akijihhi nasimdoh theija, chule hiche aledohna chu neihetsah theija ahile, nangma ponsandup naki silpeh ding, nangonga sana khivui naki-o pehding, chule lenggam sunga thunei thum na-a nakipansah ding ahi, ati.

¹⁷Chujouvin Daniel'in lengpa adonbutnin, lengpa angsunga hitin aseije, Nathilpeh ho chu nangma-a hihen, chule nakipaman ho chu midang khat pejon; hijeng jongle lengpa henga keiman akijih chu kasimdoh ding, chule akoma aledohna kahetsah ding ahi.

¹⁸Vo nangma lengpa, Chungnung pen Pathen'in napa Nebuchadnezzar chu lenggam, lalna, loupina, chule jana anapen ahi.

¹⁹Chule aman lalna anapeh jalchun, mipi ho, namtin, chule paotin paotang jouse amasanga anakithing thingun, chule anakichauvin ahi. Aman athanom athatnin, chule ahinghoinom ahinghoijin, chule atundoh nom atungdoh-in, chule asuhlhuh nom asulhun ahi.

²⁰Ahivangin ama alungsung ahung kichoi sanga, chule kiletsahna-in alungthim atahsah phatnin, ama aleng laltouna-a konin sotlhah-in ana umin, chule amahon ama-a konchun loupina ana lahdoh peh-un ahi.

²¹Chule ama chu mihem chate lah-a konin deldoh-in ana umin; chule ama lungthim chu gamsaho lungthim tobangin akisemtan, chule achenna jong gam sanganho chenna chu anahi. Chule Chungnung pen Pathen'in mihem lenggam chunga hin vai ahomin, chule aman koi hile alunggot chanchu chuche chunga thunei dingchun atungdohjin ahi ti ahetdoh kahsen, amahon ama chu bongchalho bangin hampan avah-un, atahsa chu van'a kon daitwi suhchetnin aumin ahi.

²²Chule achapa, vo Belshazzar, nangman hitiho jousehi nahet jeng vangin, nalungsung nasunempoi;

²³Nangma van Pakai dounan nakichoi sangin, chule amahon Pathen in'a khonho chu namasanga ahinchoijun, hicheho-a chun nangma le nasemangho, najite le nathaikem hon jun adonun; chule nangman khomulou, khojalou, chule, khohelou, dangka, sana, sum-eng, thih, thing, chule song pathen ho chu navahchoi jin: chule nahaina hu akhutna choipa, chule nalampi jouse neipa Pathen chu loupina napepon ahi.

²⁴Chuin Pathen'a konin khut khat ahung kisolin, chule akijihhi ahinjih-in ahi.

²⁵Chule hiche hi akijih ahung kisundoh chu ahi, MENE, MENE, TEKEL, UPHARSIN.

²⁶Hichehi athil ledohna ahi: MENE; Pathen'in nalenggam chu asimin, chule akichai sahtai.

²⁷TEKEL; khaikot ho-a nangma nakilep in, nalhahsamna akimudoh tai.

²⁸PERES; nalenggam akihom khenin, chule Medes te leh Persia te akipetai, ati.

²⁹ Hichun Belshazzar'in thupeh apen, chule amahon Daniel chu ponsandup asilpeh-un, chule sana khivui angonga a-opeh-un, chule ama chu lenggam chunga chu thunei thumna hiding ahi tin ama chungchang chu aphongjal taovin ahi.

³⁰Hiche jan tahchun Chaldea mite lengpa Belshazzar chu akithat tai.

³¹Chule Media mi Darius chun kum somgup le kumni vel ahi-in lenggam chu alatai.