Read Thado Chin Daniel 6 Bible Online

Daniel 6 - Thado Chin bible

Daniel 6

¹Darius'in lenggam pumpi hopsoh-a, lenggam chunga chu pipui jakhatle somni koiding pha asan ahi.

²Lengpa chun kisuhmona aneilouna dingle, pipuiho chun suhtohna apeh theina dingun, hicheho chunga chun vaipipo thum akoijin, amaho lah-a chun Daniel hi akhatna ahi.

³Chuin ama-a chu Pakai lhagao dihtah aum jeh-in, hiche Daniel hi vaipipo hole pipuiho jouse chunga deitumin ahung umtan; chule lengpan ama chu gam pumpi chunga tundoh ding tia agel ahi.

⁴Chuphatnin vaipipo hole pipuiho chun lenggam chungchanga Daniel themona mudohna dingin agomkom aholtauvin; ahinla amahon phat gomkomle amona amujou pouve; ajehchu ama tahsan umtah ahin, suhkhel le mona jong ama-a akimulou ahi.

⁵Chuin hiche miho hin, a-Pathen danthu chungchanga ama douna-a athemmo nading imulou ngalule, eihon Daniel douna-a athemona imulou dingu ahi, atiuve.

⁶Chuin hiche vaipipo hole pipu ho chengse chu lengpa henga ahung kikhomun, chule ahenga hitin aseijuve, Darius lengpa, hing jingin.

⁷Lenggam sunga vaipipo ho, gamvai poho, chule pipuiho, thumopthem ho, chule gal lamkai ho jousen, Vo lengpa, koihile nisomthum sunga lengpa nangma heng tailou Pathen le mihem dang henga taona neichan chu, keipi bahkai hong sunga selut jeng dingin, leng thupeh khat phudoh-a, thugahna dettah semdingin kihoukhomna kaneijun ahi.

⁸Tun, Vo lengpa, thupeh chu phutdoh-in, chule kikhel ngailou Mede le Persia mite thupeh dungjuija khela aum louna dingin, akijih chu soi kai khumin, atiuve.

⁹Hitichun Darius lengpan akijih le thupeh chu soi akai khum tan ahi.

¹⁰Tun Daniel'in akijih chu soi akikai khumtai ti ahet phatnin, ama a-insunga alutnin; chule aumna indan bang kot ho chu Jerusalem lam nga-a kihong ahito lhonin, nikhatnin thumvei akhupma adilsun, ataovin, chule masanga abolji bangin, aman Pathen anga thangvahna aneijin ahi.

¹¹Chuin hiche mihem hohi ahung kikhomun, chule a-Pathen ang sunga Daniel'in taona le thumna anei chu amudoh taove.

¹²Chuin amaho ahung naijun, chule lengpa angsunga chun lengpa thupeh chung changthu aseitaovin; Vo lengpa, nangman koihile nisomthum sunga nangma heng tailouva, Pathen le mihem dang koma taona neichan chu, keipi bahkaiho kosunga selutna umding ahi, tia na soi nakai hitalou ham? atiuve. Lengpan adonbutnin, kikhel ngailou Mede le Persia mite dan dungjuijin, akisei chu adih-e, ati.

¹³Hichun amahon adonbutnun, lengpa anga chun, Vo lengpa, Judah sohchang chateho lah-a Daniel'in nangma, chule soi nakaikhum nathupeh chu nahsah-in aneipon, amavang nikhatnin thumvei taona anei jinge, atiuve.

¹⁴Chuin lengpan hiche thuho hi ajah phatnin, amale ama aki oimo lheh jengin, chule Daniel huhdoh tei nading lungthim angaiton; chule nilhum kahsen ama huhdohna dingin athohgim lheh-in ahi.

¹⁵Chuin hiche mihohi lengpa henga ahung kikhomun, lengpa henga, Vo lengpa, thupeh hile dankisun hile lengpan aphudoh chu kikhel thei lou ahi tia Mede mite le Persia miten dan anei ahi, tihi he-in, atiuve.

¹⁶Hichun lengpan thu apen, amahon Daniel chu ahinpuijun, keipi bahkaiho hong sunga aseplut taovin ahi. Tun lengpan Daniel jah-a, Tantih neilouva najen jing na-Pathen chun nahuhdoh hen, ati.

¹⁷Chuin song khat ahin domun, keipi bahkai hongsung akama chun akoijun; Daniel chungchanga tohgon chu akikhel thei louna dingin, lengpa amatah-in akhutjema sinkhana le asemangho khutjema sinkhana chu anam khum tan ahi.

¹⁸Chujouvin lengpa chu aleng inpia achen, chuche jan chu an ngolna-in amangtan; tumging thei manchah ho jong ama anga akipolut thei tapon; chule a-imu tapon ahi.

¹⁹Chuin lengpa chu jingkah matah-in athoudoh-in, chule keipi bahkaiho hong sung lam jonin gangtah-in achetai.

²⁰Chule keipi bahkai hong chu agah phah phah-in, Daniel henga lunghemtah aw chengin agahsamin, Daniel henga, Vo Daniel, hingjing Pathen sohpa, nahinjen jing na-Pathen chun keipi bahkai ho-a kona nahuhdoh jou hinam? ati.

²¹Chuin Daniel'in lengpa henga, Vo lengpa, hing jingin.

²²Ka Pathen'in avantil ahinsolin, amahon keima eisukhah louna dingun, keipi bahkaiho kam asip peh-in ahi: Ama angsunga monabei kahi akimu bangin, vo lengpa nangma angsunga jong keiman thilse kabolpon ahi, ati.

²³Hichun lengpa chu akipah tangeijin, chule Daniel chu keipi hongsunga kona agalahdoh dingun thupeh apetai. Hitichun Daniel chu keipi hongsunga kon chun aladoh-un, chule aman a-Pathen atahsan jeh-in, achunga kisuhkhahna imacha akimupoi.

²⁴Chuin lengpan thupeh apen, amahon Daniel hehseho chu agapuijun, amaho toh, achateu toh, chule a-inneipi teo chu keipi bahkai hongsunga aseplut taovin; chuin keipi bahkai hon amaho chunga thanei tah-in, aguho jouseu tol chuman louvin asungemsel taove.

²⁵Chujouvin Darius lengpan leiset pumpi-a cheng mipite, namtinho, chule paotin paotangho henga hitihin lekha ajihtan ahi; nachung uva lungmonna punghen.

²⁶Keiman thulhah khat kanei ahitai, kalenggam le kalalna gamsungse-a mihemte jouse Daniel Pathen anga kithing thingle ging geh-a naum dingu ahi. Ajehchu ama hingjing Pathen ahin, chule tonsotna longlou, alenggam chu suhmanga umlou ding lenggam ahin, chule alalna jong akhonna geija umjing ding ahi.

²⁷Aman alhatdoh-in ahuhdoh-in, chule vanle leiset chunga melchihna ho le thil kidangho abolin, keipi bahkaiho thanei na-a konin Daniel ahuhdoh-in ahi.

²⁸Hitichun hiche Daniel hi Darius lallai sungse, chule Persia mipa Cyrus lal laijin anaphatouvin ahi.