Read Thado Chin Daniel 8 Bible Online

Daniel 8 - Thado Chin bible

Daniel 8

¹Belshazzar lengpa lengchan kal kum thum lhinna-in, keima Daniel, keima tah henga thilmu khat, amasa hung kilangdohpa nungin, ahung kilangdoh kitnin ahi.

²Chuin keiman gaothilmu-a chun: chule ahitin ahi, keiman kamu-a chun, keima Elam gamkai sunga um Shushan leng inpia kana umin; chule keiman gaothilmu-a chun, keima Ulai vadung kama kanaum kamun ahi.

³Chuin keima kakhodah-in, chule veuvin, vadung panga chun aki ni nei kelngoi chal khat anading kanamun: chule chuche ki teni chu asangin; ahin khat chu khat sang chun asangjon, chule asangjopa chu ahungdoh nunung jon ahi.

⁴Chuin kelngoi chal ama anga gamsaho khatcha ading thei aumlouna dinga lhumlam, sahlam, lhanglama, ano-a; imacha ama khutna kona huhdoh jou aumlou; ahivanga aman alung deilam lam abola, ahung letdoh lheh jengchu kamun ahi.

⁵Chule keiman kalung kagel laitah-in, veuvin, lhumlama konin keltah chal khat leiset pumpi chunga ahungin, chule amachun tol atongkha pon: chule hiche keltah hin amit teni kah-a ki kilangtah khat aneije.

⁶Chule ama chu keiman kamu aki ni nei kelngoi, vadung panga anading heng lama chun ahungin, chule aman athaneina pumpin ama chu adel jengin ahi.

⁷Chule aman kelngoi chal henglam ahinnai kamun, chule achunga alunghang lheh jengin, kelngoi chal chu atatnin, aki teni asuhbohpeh tan ahi. Chule kelngoi chal chun ama anga din jouna ding thaneina aneipon, ahinla aman ama chu tolla asulhun, achungu chu achilin: chule ama khutna kona kelngoi chal huhdoh ding koima aumpoi.

⁸Hitichun keltah chal chu ahung loupi lhehtan: chuin ama ahunghat phatnin, aki lentah chu abongtan; chule akhelin kilangtah ki li van'a hui li nunna lam ngan ahung kehdoh-in ahi.

⁹Chule amaho lah-a khatna konin kineo khat ahungdoh-in, hichu lhanglam, solam, chule gam nomtah lam ngan hatah-in ahung lenin ahi.

¹⁰ Chuin hichu van janel ho lah geijin ahung lenin; chule hichun janel phabep le ahsi phabep tolla ahin pailhan, achungu chu achilin ahi.

¹¹Henge, amale ama chu janel ho pipupa toh kibang khopmin akichoi anin, chule aman nitin ganlhaina thilpeh chu alamangin, chule Ama muntheng umna jong chu asulhun ahi.

¹²Chule ama chu, suhkhel jeh-a nitin ganlhaina thilpeh douna dingin janel khat akipen, chule hichun thutah chu tolla aseplhan: aman hichu abolin, chule aphatouvin ahi.

¹³Chujouvin keiman mitheng khatnin thu asei kajan, chule mitheng dang khatnin mitheng thuseipa henga chun, nitin ganlhaina, suhkhelna jeh-a manthaina, muntheng le galmi janel agoma kenga chotpha-a umdinga pehdohna phat chungchanga gaothilmu hi itihchan hiding ham? ati.

¹⁴Chuin aman kahenga, ni sangni le ni jathum gei hiding; chujouteng muntheng chu kisutheng ding ahi, tin aseije.

¹⁵Chuin ahung hitin ahi, kei, Daniel keimatah ngeijin thilmu chu kanamua, chule ipi kiseina ahi kahol chun, hichun veuvin, ka-ansunga mihem melput tobang pu khat anadingin ahi.

¹⁶ Chule keiman Ulai vakam chekah-a mihem khat awgin kajan, awgin chun akouvin, ahenga, Gabriel, hiche gaothilmu hi hiche mipahi hetthem sah-in, ati.

¹⁷Hitichun ama kadinna mun koma ahungin ahi: chuin ama ahung phatnin kakichatan, kalhun tolla kamai kasulut tai. Ahinla aman keima henga, Vo mihem chapa, hethemin: ijeh inem itileh gaothilmu hi phat kichai tenga ding ahi, ati.

¹⁸Tun aman eihoupi laijin, keima kamai tollam ngan nomtah-in ka-imun ahi. Ahinla aman eihin tongkhan, chule eidindoh sah-in ahi.

¹⁹Chuin aman kahenga, ven, keiman nangma lungdamlouna akichaina lamle ipi hunglhung ding ham ti kahetsah ding nahi: ajehchu akitep phatna chu achaina hunglhung ding ahi.

²⁰Kelngoi chal ki ni nei namu chu Media le Persia lengte ni ahiuve.

²¹Chule keltah sousetah chu Greek lengpa chu ahi: chule amit teni kah-a ki lentah um chu leng masapenpa ahi.

²²Tun hiche ki kisuhbong le akhela li hung dondoh chu, hiche nam'a kona chu lenggam li hung umdoh ding; ahivang ama thahatna vanga hilou ding ahi.

²³Chule amaho lenggam kichailam, suhkhelna neiho ahung pilhin teng, amel tijatjat umtah le thuguh hetthemna nei leng khat hung dingdoh ding ahi.

²⁴Chule ama thaneina chu lenlheh ding ahin, ahinla amatah thaneina jal ahipoi. Chule aman kidangtah-a asuhmanga, chule khangtou ding, chule hitia chu abola thahat hole mithengho asuhmang ding ahi.

²⁵Chule ama thilgon jala jong akhut noija doha le joule nal apunsah ding; chule alunggil sunga amale ama kichoi-an ding, chule chamna-a kona mi tamtah asuhmang ding ahi. Ama chu pipuiho pipuipa douna-a hung dingdoh ding, ahivanga ama chu khut panglouva kisubong ding ahi.

²⁶Chule nilhah le jingkah gaothilmu-a kimu kisei chu atahbeh ahi. Hijeh chun nangman gaothilmu hi imchah-in, ajehchu nikho tamtah nunga hunglhung ding ahi.

²⁷Hichun Daniel keima lhasamin kalhu-in, ni ijat ham damlouvin kaumtan; chujouvin keima kathoudoh-in, chule lengpa na chu katong kit tai. Chule hiche gaothil muhi kidang kasan, ahinla koimachan ahethempoi.