Read Thado Chin Daniel 9 Bible Online

Daniel 9 - Thado Chin bible

Daniel 9

¹Chaldea gam pumpi chunga lenga kipansah, Medes chilhah Ahasuras chapa Darius lengchankal kum khatna-in,

² Aman lengvai apoh akum khatna-in, Daniel keiman Pakai thu Jeremiah themgao henga ahunga, Jerusalem manthah na-a kum somsagi aman asuhbulhit ding ahi tia aseina lekhabu ho-a akumho jat chu kahechentan ahi.

³Chuin keiman an kangol-in, khaodip pon kakisil in, vut kakinun, taona le thumna neidingin Pakai Pathen lam kangatnin ahi.

⁴Chuin keima Pakai ka Pathen henga kataovin, chule kamona kaphongin, kaseije; Vo Pakai, loupitah le tijat umtah Pathen, ama ngailuho le athupeh ho nit te-a dinga kitepna le hepina koipa;

⁵Keiho kachonse taovin, kachonkhel taovin, giloutah-in na katongun, chule kakiphin un, nadan thupeh ho le nathutan naho geijin kajamsan taove:

⁶Nangma mina kaleng hou, kavaipo hou, kapate hou, chule gamsunga miteho jouse henga thu hinsei nalhacha themgaoho thusei jong ngaisah-in kaneipeh pouvin ahi.

⁷Vo Pakai, chonphatna chu nangma-a ahin, hinla keiho, Judah mite, Jerusalem'a cheng miho, chule Israel pumpi naija hihen gamla-a hijongle, amahon nangma douna-a dan asuhkeh uva, adan suhkehna hou jeh uva nangman nana nodohna gam jouse-a umho dingin vang, kachanu hi tunikho-a banghin mai jum na ahi.

⁸Vo Pakai, nangma douna-a kachonset jeh uvin, keiho, kalenghou, kavaipohou chule kapu kapatehou ahin, mai jum na kachang taove.

⁹Ama kadou jeng vanguvin, hepinaho le ngaidamna chu ka Pakai Pathen uva ahin;

¹⁰Aman alhacha athemgaoho-a kona kamasanguva akoi dan thupeh ho-a kalamlha pouvin, ka Pakai Pathen'u aw jong chu kanangai pouvin ahi.

¹¹Ahi, Israelte jousen na aw angailouna dingun nadan thupeh apalkeh-un, achemangun; hijeh-a chu sapsetna le Pathen soh Mosi dan thupeh-a kisun hahselna chu kachunguva kisunglha ahitai, ajehchu ama dounan kachonse taove.

¹²Chule aman kachunguva thilse nasatah alhunsah-in, keiho le kathu-u tana kathutan hou douna-a athusei dohho chu kachunguva asuhdetnin ahi; ajehchu Jerusalem chunga kibol tobanghi vannoi pumpi-a anakibol khapon ahi.

¹³Mosi danthupeh-a kisun bang ngeija, hiche thilse jousehi keiho chunga lhunga ahitai. Ahijeng vangin kakhan gitlouna houva kona kakiheidoh theina dingule, nangma thutah kahetthem theina dingun, Pakai ka-Pathen'u anga keiho kanatao pouvin ahi.

¹⁴Hijeh chun Pakaiyin thilse chu aven, kachunguva alhunsahtai. Ajehchu Pakai ka-Pathen'u chu aman atohdoh thil jouse-a chonphatah ahi: keihon athu kangailou jeh-u ahibouve.

¹⁵Chule tun, Vo Pakai ka-Pathen'u, khut thahat tah-a namite Egypt gama kona hinpuidoh-a, chule tunia banga amin ana kithangpa; keiho kachonse taovin, chule giloutah-in na katong taove.

¹⁶Vo Pakai, nachon phatna ho jouse dungjuija kangeh nahi, nalunghanna le nalungsatna chu nalhang theng, Jerusalem khopi-a konin kiheidoh tahen: ajehchu keiho chonset jehle kapu kapateu khan gitlou jeh-in, Jerusalem le namite hi kaveluva umho jouse i-sah louvin kaum taove.

¹⁷Hijeh chun tun, Vo ka Pathen'u, nasoh taona le athumna hi ngaipeh-in, chule amangthahsa namun theng lama hin Pakai jal-in namaiso chu hinvah sah-in.

¹⁸Vo ka Pathen, nana hinsungin lang ngaijin; namit teni hin hasah inlang, kaman thainao le namina kivo khopi hi hinven: ajehchu kachon phatnao jeh-a na-anga kathumna hou hi hinlhutna kahipouve; ahinla nami hepina haotah jaljoh ahibouve.

¹⁹Vo Pakai, ngaitemin; vo Pakai, ngaidamin; vo Pakai, ngaijin lang tongdoh-in; Vo ka Pathen nangma jal-in geisang hih-in, ajehchu nakhopile namitehi namina kivo kahiuve.

²⁰Chuin keiman thu kaseija, kataova, chule keima chonsetna le kami Israelte chonsetna kaphona, chule ka Pathen lhangthenga dinga kathumnaho Pakai ka Pathen ang kalhut petchun;

²¹ Ahi, keiman taona-a thu kasei petnin, keiman gaothilmu kanei tila kipatna kamu mikhat Gabriel chu gangtah-in ahung lengin, nilhah ganlhaina phat velin keima eihung thamin ahi.

²²Chuin aman keima eihetsah-in, eiki houlimpin, aseije, Vo Daniel, tuahi keima nangma hetgilnale hetthem theina pedinga kahungdoh ahi.

²³Nangman thumna naneipat tila chu thupeh chu hung kipedoh-a, chule nangma hetsah dinga keima hunga kahi; ajehchu nangma ngailut umtah nahi. Hijeh chun thil umdan hi hethemin lang, na gaothilmu chu ngaitophan.

²⁴Suhkhelna kichaina ding, chonset suhbeina ding, khan gitlou jeh-a kichamna kisem nading, tonsot chonphatna hinpohlutna ding, gaothilmu le gaothu kisei sinkhana ding, chule theng chungnung pen thao kinuna dinga, namite chungle nakhopi theng chunga hapta somsagi kiteppeh ahitai.

²⁵Hijeh chun henlang chule hethemin, Jerusalem sahphatna aumkit dingle akiledoh kitna dinga thupeh ahungdoh-a patna leng chapa Messiah gei chu, hapta sagile hapta somgupleni hiding ahi. Khopi lamlen le kulbang chu phat hahsa sunga kisadoh kit ding ahi.

²⁶Chule hapta somgupleni jouteng Messiah chu kisatlha ding, ahinla ama le ama ding ahipoi: chule ahung umding mipiteho leng chapa chun khopile muntheng chu asuhbei ding; chule hichu twisangletna hung kichai ding, chule gal hungkichaina geija dinga manthaina kiteppeh ahitai.

²⁷ Chule aman kitepna chu mi tampi toh hapta khatna dinga asudet ding, chule chuche hapta kimtuhtah chule aman ganlhaina le thilpeh asuh haiding, chule thet umtahho akithejal behseh jeh-a aman akhonna geija suhmanga aumsah ding, chule hiche gotsa suhmangna chu amanthainao chunga kisunlhah beding ahi.