Read Thado Chin Hosea 1 Bible Online

Hosea 1 - Thado Chin bible

Hosea 1

¹ Israel lengpa Joash chapa Jeroboam nikho laile, Judah lengte ho Hezekiah, Ahaz, Jothan, Uzziah nikho laijin, Beeri chapa Hosea henga Pakai thu ahung lhungin ahi.

²Hosea henga Pakai thu hung lhung kipatna chu ahi. Chuin Pakaiyin Hosea henga, chenlang numei noti ho chate lah-a konin noti numei khat naji dingin gakipuijin; ajehchu gamsung hi Pakaiya kona petmanga, noti'a pang gamma ahitai, ati.

³Hitichun ama achen, Diblaim chanu Gomer chu aga kipuijin; amanu agaijin, chapa khat ahinpeh-in ahi.

⁴ Chuin Pakaiyin ahenga, amin Jezreel sah-in; ajehchu chomkhat joule keiman Jehu insunga Jezreel phu kalahna ding ahin, chule keiman Israel insung leng gam hi kasuhbei ding ahi.

⁵Chuche nikhole hung hiti ding ahi, Israel thalpi chu Jezreel phaichama kaheboh ding ahi, ati.

⁶Chuin amanu agaikitnin, chanu khat ahingin ahi. Hichun Pathen'in ahenga, amanu min chu Lo-ruhamah sah-in; ajehchu keiman Israel insung chunga hi hepina kaneilou hel ding ahitai; keiman amaho aboncha kalahmang hel ding ahitai.

⁷Ahin keiman Judah insung chunga vang hepina neijing ting, Pakai a-Pathen'un amaho chu ahuhhing ding ahin, chule amaho chu thalpi, chemjam, gal, sakol ho, chule sakol chunga tou miho mangcha-a ahuhdoh louding ahi, ati.

⁸Tun Lo-ruhamah'in anoichep aban phatnin, amanu agaijin, chapa khat ahingin ahi.

⁹Chujouvin Pathen'in ajah-a, amin Lo-ammi sah-in; ajehchu nangho kamite nahi tapouvin, keima na Pathen'u kahitapoi.

¹⁰ Ahivangin Israel chate chu twikhanglen'a neldi jat, tejoulou le simsenglou hung hidiu; chule hung hiti ding ahi, amaho kamite nahitapouve tia ana kiseipehnao mun'a chu, nangho Pathen hing chapate nahiuve tia kiseipeh ding ahiuve.

¹¹Chutengle Judah chatele Israel chate chu kigom khom ding, alamkaidiu khat apansah diu, chule amaho gamsunga kona chu hungpotdoh ding ahiuve: ajehchu Jezreel nikho chu loupitah hiding ahi.