Read Thado Chin Hosea 10 Bible Online

Hosea 10 - Thado Chin bible

Hosea 10

¹Israel chu agabei lengpigui ahi, aman agachu ama dingseh-in asosah-in ahi. Aga atam dungjuijin maicham ho apunsah-in; agamsung phatna dungjuijin milim hoitahtah akisemuve.

²Alungthimu akikhen tai; tu-a hi adihlouna kimudoh ding ahi. Aman amaicham hou asuhkeh ding, amilim semthuhou asuhmang ding ahi.

³Ajehchu tu-a hi amahon, Pakai chu igin tahlou jeh-un eiho leng bei ihiuve, achutile lengchun eiho ipi eibol pehdiu ham? tia asei dingu ahi.

⁴Amahon thu aseijun, kitepna asemun jouvin akihahselun ahi. Hijeh chun thutanna chu lou kikaina nunga kehdoh hampa gunei bangin, ahung kehdoh-in ahi.

⁵Samaria chengho chu Beth-aven'a bongnouho jeh-a kicha ding ahiuve. Ajehchu chuche-a kona loupina kitoldoh jeh-a chu, mipi ho lunghemuva, thempuhon hichu akipapi dingu ahi.

⁶Hichu leng Jareb pehdinga Assyria henga kipuiding; Ephraim jachat changding, chule Israel jong amatah thumop jeh-a jahchading ahi.

⁷Samaria ahile, alengpa chu twi chunga twiphon banga kisat lhading ahi.

⁸ Israel chonsetna, Aven munsang ho jong chu kisumang ding: amaicham hou chunga lingle meithai sel tholing hung kehdoh ding; chule amahon molsangho jah-a, neikhu khumun; chule lhangho jah-a, neilhuh khumun, ati dingu ahi.

⁹ Vo Israel, nangho Gibeah nikholai japat chonsea nahitaovin; amaho chuachun ading jingun ahi. Khanggilou chate douna-a Gibeah mun'a gal kisat chun amaho anaphapon ahi.

¹⁰Amaho sehgim dingchu keima lungdei ahi; chule amaho achonkhelnao thil ni jeh-a akikan tengule, amaho doudinga mipi hung kikhom ding ahiuve.

¹¹Chule Ephraim bongla lahsa tobang ahin, chang childing atha anomin ahi; ahinla keiman amanu ngong hoitah chung chu kapal galkaijin ahi: Ephraim chu achunga touna dinga kasema; Judah'in lou akaiding, chule Jacob'in aleilhangho asuhbong ding ahi.

¹² Nangma nangma-a dingin chonphatna muchi tun kitun, hepina in at-nin; naleiset khoikeh louchu khoikeh-in: ajehchu ama ahunga chonphatna nachunga gojuh-a ajuhsah masangse-a, tuhi Pakai holphat tah chu ahi.

¹³Nanghon gitlouna lou kaijin nakaijun, khangit louna na-at nun; lepche ga naneuve: ajehchu nanghon nangho lampi sehsehle, namihat tamtah hou bou natahsanun ahi.

¹⁴Hijeh-a chu namite lah-a lungling laona khat hung sohding, Shalman'in galsat nikho-a Beth-arbel asuhmang banga, nakulpiu det jouse kisuseding ahi: Minu chu achate chunga ahal halin akitat kehtai.

¹⁵Hiche banga chu nakhan gitlouna aletjeh-a Bethel'in nachunga na atoh ding ahi; jingkah lamle Israel lengpa chu kisumang helding ahi.