Read Thado Chin Hosea 11 Bible Online

Hosea 11 - Thado Chin bible

Hosea 11

¹ Israel chu chapang cha ahilaijin, keiman kana ngailun, chule Egypt gama konin kachapa kakou doh-in ahi.

²Amahon akou bangun, chutichun amaho-a konin achemangun; Baal henga ganlhaina anabolun, chule semthu limho henga gimnamtui ahalun ahi.

³Keiman Ephraim jong akhut uvin katuh-in, cheje dan kana hilin; ahivangin keiman kadamsah-u ahilam ahepouve.

⁴Keiman amaho pasal khaohol le, ngailutna khaoguijin kanakaije: keima amaho dinga angong uva kona anamkoljon'u lahdoh pehpa tobang kanahin, chule anehdiu kana luipeh-in ahi.

⁵Ama Egypt gama kinungle louding, amaho hung kile ding ada jeh uva, Assyria te chu alengpa hiding ahi.

⁶Chule akhopihou chunga chemjam umding, amaho le amaho kithumopna jeh-a, abahho jouse akahvama, asuhmang ding ahi.

⁷Chule kamite keija kona kinungtol kitdin akonsuh uvin: amahon amaho chu hat chungnung penpa koma dinga akou vangun, khatchan jong achoisang pouvin ahi.

⁸ Ephraim, keiman nangma iti kadonda dingham? Israel, keiman nangma iti kapehdoh dingham? keiman nangma iti Admah tobang kasosah dingham? keiman nangma iti Zeboiim tobanga kakoi dingham? Kasunga kalungthim akileh-in, kakisih naho meijin akonge.

⁹Keiman kalungsat tijat umtah chu sodohsah pongting, Ephraim sumang dingin hung kinungle ponge: ajehchu keima Pathen kahin, mihem kahipoi; nalah uva Atheng chu kahi: chule khopi sunga lutponge.

¹⁰Amaho Pakai deija chonding ahiuvin: ama keipi bahkai banga kitumding ahi. Ama akitum phatle, lhumlama kona achate kithing puma hungding ahiuve.

¹¹Amaho Egypt gama kona vacha bangle, Assyria gama kon vakhu banga kithing puma hungding ahiuve. Chule keiman a-incheh uva kachensah ding ahi, tin Pakaiyin aseije.

¹²Ephraim chun joule nalin, chule Israel insungin lepchenan eikim velun ahi. Ahin Judah vang Pathen toh avaihom khomin, chule mitheng hoto tahsana-in aumin ahi.