Read Thado Chin Hosea 13 Bible Online

Hosea 13 - Thado Chin bible

Hosea 13

¹Ephraim'in kithing pumpuma thu asei laijin, amale ama Israel sunga akidomsangin; ahivangin Baal houna-a akipal phatnin, athi tan ahi.

²Chule tun amaho achonse chehcheh-un, adangka hou milim din akisemun, chule ahetnao dungjuijin alim semthu akisemun, aboncha chu khut themhon asemu ahi: chule amahon, ganlhaina neihochun hiche bongnou limho chu chophen, tin aseijun ahi.

³Hijeh-a chu amaho jingkah meibol, amangloi chelji matah-a um daitwi, changphola kona chimpeijin alhohmangji changsi, chule thuhsunga kona potdoh meikhu tobang hiding ahiuve.

⁴Ahinla keima Egypt gama kona Pakai le na-Pathen'u hunghipeh kahin, chule nanghon keima tailou Pathen dang nahetlou dingu ahi. Ajehchu keima tailou huhhingpu dang aumpoi.

⁵ Keiman nangho gamthip gam, nasatah-a gojuh louna gama kanahetsa nahiuve.

⁶Agamuva hamhingho dungjuijin, amaho a-oiva uvin, amaho a-oiva uvin, alungthimun akichoisangun; hijeh chun keima eisumil taove.

⁷Hijeh-a chu keima amaho dinga keipi bahkai toh kabah ding, chule lampi-a lutnu banga kavet lhihdiu ahi.

⁸Keiman anou kilahpeh vompi banga amaho kakimaito piding, anahgu bomlah-u kabo jalding; chule chumuna chu keipi bahkai banga amaho kabah gamding: gamsa hon abotel dingu ahi.

⁹Vo Israel, nangmale nangma kisumang nahi; ahivangin keima-a nangma panpi ding aume.

¹⁰ Keima nalengpau kahiding: nakhopiu pumpi sungahi nahuhhing theidiuva koidang hoija umem? chule, lengpa le pipuiho neipeuvin, tia naseinao navaipo hou chu hoija um hiuvem?

¹¹ Keiman kalunghana-in nangho lengkhat kapeuvin, chule kalungsatna-in amachu kalahmang peh uve.

¹²Ephraim khansetna chu kanchah-in aumin; achonsetna chu selin aumin ahi.

¹³Numei naovop hesohnaho chu amachunga hung lhungding ahi. Ama chapa chinglou ahi; ajehchu ama chate hungpen dohna mun'a chu umsot louding ahi.

¹⁴ Keiman amahochu lhankhuh thanei na-a kona man kapeh-a kachoh dohding; keiman thina-a kona kalhatdoh dingu ahi. Vo thina, keima nanatna kahiding, Vo thikholkhul keima nakisuh manga kahiding ahi! kamit mu-a kona lungheina chu kiselmang ding ahi.

¹⁵Ama asopite lah-a ga phatah hijongle, solam hui hungnung ding, gamthip gama kon Pakai hui chu hungnung ding, chule atuisam putna hung kanga, chule atuibul hung kangding: aman agou kholnau bel hoitahho jouse asuhset ding ahi.

¹⁶Samaria kamhel ding ahi; ajehchu amanun a-Pathen adouvin ahi. Amaho chemjam'a lhudiu, achasen hou ahal hala kitat chipding, chule anumei naovop hou chu kikhejal ding ahi.