Read Thado Chin Hosea 14 Bible Online

Hosea 14 - Thado Chin bible

Hosea 14

¹Vo Israel, Pakai na-Pathen koma kile kitnin, ajehchu nangma nakhan gitlouna-a lhu nahitai.

²Thuho chu ponlang, Pakai henga kile kitnin. Ahenga, Khangitlouna jouse lamangin, lungset tah-in nei sangun: hitia chu keihon kakamuva kilhaina kapeh dingu ahi.

³Asshur in eihuhhing pouvintin; keiho sakol ho chunga tou pouvinge: chule kakhutsoh hou henga chun, nangho ka-pathen'u nahiuve tinjong seitapou vinge. Ajehchu nangma-a bou panei louten hepina amuvin ahi, tin seijun.

⁴Keiman akinung tolnao chu kasuhgampeh-a, manbeija amaho kangailut dingu ahi; ajehchu kalungsatna amaho-a konin akihei mangtai.

⁵Keima Israel dingin daitwi tobang hing ting; ama lily pahcha banga khang tou ding, chule ajungho chu Lebanon banga jamdoh ding ahi.

⁶Abahho chu jamdoh-in tin, ahoina chu olive thingphung bang hiding, chule Lebanon banga namtui ding ahi.

⁷Ama lhalim noija chengte chu hung kileuvintin; chang banga kidodoh kitnuva, lengpitwi banga khang dingu ahi. Chule chu-a anamtui chu Lebanon'a lengpitwi tobang hiding ahi.

⁸Ephraim'in, alim semthu ho-a hi ipi-a kapansah nahlai ding ham? Keiman athusei kajan, chule ama kamutai. Keima theichang phung adohing tobang kahi, atiding ahi. Keima-a kona naga kimu-a ahi.

⁹Koiham miching? chule hiche thil ho hi hethem hen. Koiham milungching? hicheho chu hehen; ajehchu Pakai lampi ho chu adih ahin, chule midih chu hiho-a chu lamlha ding ahi. Ahinla suhkhelna neihochu hiche-a chu lhuding ahiuve.