Read Thado Chin Hosea 2 Bible Online

Hosea 2 - Thado Chin bible

Hosea 2

¹Nasopipa Ammi le nasopinu Ruhamah jah-a seijin,

²Nanu henga ngehna neijun, ngehna neijun; ajehchu amanu kaji ahipoi, keijong ama inneipu kahipoi: amanun amitmua konin akijohnaho, chule anoi teni kah-a konin ajonthanhoina chu paimang hen.

³Achuti loule amanu sagoh kahodoh ding, apenlhah nikho banga kakoiding, chule amanu gamthip banga kasema, gamgo banga kakoiding, chule dangchah-a katha ding ahi.

⁴Chule keiman amanu chate chunga hepina kanei louding ahi; ajehchu amaho kijohnu chate ahiuve.

⁵Ajehchu anu-u chu noti'n apangtan: amaho oisunga vopnu chu jachat umtah in achontai: Ajehchu amanun, ka changlhah le ka twi, ka samulpon le ka ponnem, ka thaotwi le ka donding eipe-a kakideipi ho nung juijinge, tin aseije.

⁶Hijeh chun, veuvin, keiman nalampi-a ling tho kagetding, chule amanun kenglampi ho amuthei louna dinga pal kaget ding ahi.

⁷Chule amanun adeiho nungjui jintin, hijongle amaho chu aphah jou louding; chule amanun amaho chu holintin, hijongle amu louding ahi. Chutahle, amanun, Chengting kaji masapa koma kile kittange; ajehchu hiche phatlai chu keija dingin tu sangin aphajoe, ati ding ahi.

⁸Ajehchu amanun Baal houna dinga agot chang, ju, chule thaotwi chu keima peh ahi ahepon, chule adangka le sana chu keiman kapunsah ahilam ahepon ahi.

⁹Hijeh-a chu keima kaki nungle-a, ka chang chu a-at phat tengle kanung lah-a, ka ju jong alhophat tengle kanung lah ding, chule asagoh selna dinga kapeh kasamulpon, chule ponnem jong kanung lahpeh ding ahi.

¹⁰Chule akideipiho mitmu-a amanu jamo kahodoh pehding, chule koimachan kakhutna kona amanu ahuhdohlou ding ahi.

¹¹Keiman anopsahna jouse, akut nikhoho, alhathah niho, acholngah nikhoho, chule akut thupi ho jouse kasuhbei ding ahi.

¹²Chule amanun, Kakideipi hon katohman dinga eipeh-u ahi tia asei alengpiguiho le atheichang phungho chu keiman kasuhmang ding: keiman hicheho chu gammang kasosah-a, chule gamsa hon anehdiu ahi.

¹³Chule keiman Baal doi houna-a gimnamtui ahal nikhoho jeh, bilba le sana jempah-a akijepma akideipiho nung ajuija, keima eisuh mil jeh-a amanu chunga gotna kapeh ding ahi, tin Pakaiyin aseije.

¹⁴Hijeh chun, veovin, keiman amanu chu jolingting, gamthipma kapuiding, chule lungdam sella akoma thu kasei ding ahi.

¹⁵ Chule keiman chukoma chu amanu alengpileiho kapeh-a, chule akinepna kot dinga Achor phaicham kapeh ding ahi: chule chumuna chu amanun akhangdon laile Egypt gama kona ahung potdoh nikholai banga la asah ding ahi.

¹⁶Chuche nikho chule hitiding ahi, tin Pakaiyin aseije; Nangman Ishi [1] tia neikou ding, Baali [2] tia neikou tahlou ding ahi.

¹⁷Ajehchu keiman amanu kamsunga kona Baal doi minho chu kalah dohding, chule aminhou chu geldoh-a umkit louding ahitai.

¹⁸Hiche nikho chule keiman amaho dinga gamsaho, chungleng vacha ho, chule leiset chunga akithol thoho toh kitepna kasemding; chule thalpi, chemjam, chule gal kisat leisetna kona kasuhmang ding, chule amahochu bitkeicha kaumsah dingu ahi.

¹⁹Chule keiman nangma a-itih chana keima-a dinga kajihol ding; keiman nangho chonphatna-a, thutan dih-a, ngailut phatna-a, chule hepina-a keima-a dinga kajihol ding nahi.

²⁰Keiman nangma kitah tah-a keima-a dinga kajihol ding; chule nangman Pakai chu nahet ding ahitai.

²¹Chule hicheni chule hung hitiding ahi, keiman kangai pehding ahi tin Pakaiyin aseije, keiman vanho thu kangaipeh-a, chule amahon leiset thu angaipeh diu ahi;

²²Chule leisetnin changle mimho thu, lengpitwi thu chule athaotwi thu angaija, chule amahon Jezreel thu angaidiu ahi.

²³ Chule amanu chu keimadin leisetna tu-ingting, hepina changlou amanu chu kahepiding, chule keima mite anahilou ho jah-a, nangho kamite nahitaove katiding; chule amahon, Nangma ka Pathen nahi, eitidiu ahi.