Read Thado Chin Hosea 4 Bible Online

Hosea 4 - Thado Chin bible

Hosea 4

¹Nangho Israel chaten Pakai thuhi ngaijun; ajehchu gamsunga chu thutah, hepina, chule Pathen hetna aumtahlou jeh-in, Pakai chun chuche gama chengte toh kinelkalna aneitai.

²Amaho akihahselun, ajouvun, athatnun, aguvin, chule jon apanun, achonkhel taovin, chule thisanin thisan asouvin ahi.

³Hijeh achu gamsung chu lunghem ding, chua cheng jouse gamsaho le chungleng vachaho puma lhasam ding; chule twipia ngaho tolmanga umding ahiuve.

⁴Ahinla mi koima kinah dahen, khatnin khat phosal dahen; ajehchu namiteu chu thempu kinahpijiho tobang ahiuve.

⁵Hijeh-a chu nangho sunlaija nalhuh diu, themgao jong chu nangho toh janle lhuhtha diu; chule keiman nanu chu kasuhmang ding ahi.

⁶Kamite hetna alhahsam jehu'n suhmangin aumtaove: ajehchu nanghon hetna chu napampai tahjeh uva, keiman jong nangho kapampai ding, chutia chu nangho keima thempu nahilou diu; nanghon na Pathen'u danthu peh nasuhmil tah jeh uva, keiman jong nachateo kasuhmil ding ahi.

⁷Amaho apuncheh cheh ule, keima dounan achonse chehcheh-un; hijeh-a chu keiman jong aloupi nao chu jachatna-a kakhel pehding ahi.

⁸Amahon kamite chonsetna anechai helun, chule amahon akhangitlou nao chunga alungthimu akoijun ahi.

⁹Chule hitiding ahi, mipi le thempu kibang diu, keiman alamlhah hou jeh-a talen kapeh ding, chule atohmanu kasansah ding ahi.

¹⁰Ajehchu amahon neovintin, valoudiu; amahon jonthanhoi boluntin, punglou ding ahiuve: ajehchu amahon Pakai ngaisah ding chu adalha taovin ahi.

¹¹Kijohnale lengpitwi chule lengpitwi thah-in alungu alamangtai.

¹²Kamite chun amilim hou koma thumop angeh jiuvin, chule atenggolun amaho henga aphongdoh jie: ajehchu kijoh lungput chun amaho achonkhel sah taovin, chule a-Pathen'u thunoija konin apotnun kijoh-in apang taovin ahi.

¹³Amahon molchung ho-a ganlhaina aneijun, chule lhangvum ho-a gangpi phung, belkan phung, chule penal thingphung noiho chu alim anop jeh-in, gimnamtui ahaluvin ahi: hijeh chun nachanuteu kijoh dingu, chule naji teovin jonthanhoi aboldiu ahi.

¹⁴Nachanu teo akijoh uva, chule naji teovin jonthanhoi abol tengule, keiman talen kapeh louding ahi: ajehchu amaho kijoho-a konin akikhin doh-un, chule mijongho toh ganlhaina anei khomuvin ahi: hijeh-a chu ahethemlou mite chu lhuding ahiuve.

¹⁵Israel nangman jonthanhoi panjong lechun, Judah kipal lhuhsah hih-in; chule nangho Gigal'a hunghih-un, Beth-aven'a jong chetouhih-un, chule Pakai ahing jinge tin jong kihahsel hih-un.

¹⁶Ajehchu, bongla nungkih bangin Israel anungkih tai: Pakaiyin tuahi amaho chu munlen khatna kelngoinou banga avahding ahi.

¹⁷Ephraim'in milimho ajoptai: aum umin umsah-un.

¹⁸Amahon adonu chu athuh-in; amahon kijoh hinkho amang jingun ahi: avaihomhou vin jong jachat umtah-in angaichaove, nanghon peovin.

¹⁹Huijin alhaving teni-a amaho achepchah-in, chule akithoi nahou jeh-a jahcha ding ahiuve.