Read Thado Chin Hosea 5 Bible Online

Hosea 5 - Thado Chin bible

Hosea 5

¹Vo thempuho, hichehi ngaijun; chule nangho Israel insung mite, ngaijun; vo leng insung mite, nanau hin sungun; ijeh inem itile thupi tanna chu nachung uva chuding ahi: ajehchu nangho Mizpah chunga thang nahiuvin, Tabor chunga lenthang kijah chu nahiuve.

²Keima amaho jouse phoh-a kahung panpeh vangin, thununglou ho chu tolthat hattah ahigam taove.

³Keiman Ephraim kahenai, chule Israel chu kakoma konin akiseldehpoi; ajehchu tun, vo Ephraim nangma kijoh-in napangin, chule Israel suhboh-in aume.

⁴Amahon a-Pathen'u heng lama kihei lutna dinga anatoh jouseu chu asemphat lou diu ahi: ajehchu noti hina chu amaho lah-a aumin, chule amahon Pakai chu ahepouve.

⁵Chule Israel kiletsahna chun amaikoh-a ahettoh sah-in: hijeh-a chu Israel le Ephraim chu akhangitlou naova lhuding; Judah jong amani toh lhuhtha ding ahi.

⁶Amaho aganchahou le akelngoi honhou toh Pakai holdinga chediu; hijongle amulou dingu ahi: Ama chu amaho-a konin akichon dohtai.

⁷Amahon Pakai chunga kitahlou tah-in achon taove: ajehchu amahon gamchom chate ahing taovin ahi; tu-a hi amaho chu anei agou houtoh lhakhat sunga vallhuma umding ahiuve.

⁸Nanghon Gibeah'a sumkon binei mut un, Ramah'a sumkon mut un: chule Beth-aven-a hasapmin samun, nanunglam ven, Vo Benjamin.

⁹Kiphona nikhole Ephraim chu kamhel ding ahin; ahung umtei ding thilchu Israel phungho lah-a kahetsah ahitai.

¹⁰Judah pipuiho chu gamgi chon mang hotoh abangun ahi: hijeh achu achunguva kalung hana twibanga kabuh lhah ding ahi.

¹¹Lung thanom tah-a danthupeh ajui jeh-in; Ephraim aki suhgentheijin, thutan na-a suhsetnin aumtai.

¹²Hijeh achu keima Ephraim dinga nget kabah ding, chule Judah insung dinga lung kabahding ahi.

¹³Ephraim'in anatna amua, Judah'in amaputna amuphatnin, Ephraim chu Assyria te koma ache-in, chule leng Jareb koma akisolin ahi: ahinla aman nadamsah joupon, chule namaha hojong asudam joupon ahi.

¹⁴Ajehchu keima Ephraim dinga keipi bahkai tobang kahia, Judah insung dinga keipi bahkai khangdong tobang kahiding ahi: Keima, keima tah-in kabotela kache mang ding; kalah manga, koiman ahuhdoh louding ahi.

¹⁵Amahon agitlounau akihetdoh uva chule kamai ahinhol tokah seuva, keima kache-a kaumna mun'a kakile kitding ahi: agenthei naova keima eihin hol paidiu ahi.