Read Thado Chin Hosea 8 Bible Online

Hosea 8 - Thado Chin bible

Hosea 8

¹Sumkon chu namuhto suton. Ama Pakai insung douna-a muvanlai banga hungding ahi; ajehchu amahon kakitepna apalkeh-un, chule ka danthu dounan asukhel taove.

²Ka Pathen, keihon nangma kaheuve, tia Israel chu kaheng lama hung pengding ahi.

³Israel'in thilpha chu alemang ahitan; melma chun ama anungdel ding ahi.

⁴Keima-a kon hilouvin, amahon lengho akitundoh uvin; amahon apipuiho akisemun, hichu keiman kahepha poi; paidoh-a aum nadiuvin, adangka le sana houvin milim akisemun ahi.

⁵Vo Samaria, nabongnou vin nangma napampai ahitan; kalung hana nangma douna-a koudoh ahitai: monabei ahina dingu chu itih chan hinalai dingham?

⁶Ajehchu Israel'a kona jong chuti ahi: khutthem miho thilsem ahin, hijeh chun Pathen ahipoi: ahin Samaria bongnou chu ahal hala kisu chipding ahi.

⁷Ajehchu amahon hui chu muchi tu-a atu-u ahin, chimpei aki-at diu ahi: hichun kung aneipon, adonjong chun nehding agadoh sah louding ahi: hung gadoh nama jongle, hichu gamdang mihon avalhum ding ahi.

⁸Israel vallhumin aumtai; tun amaho chu vannoi'a chidang namdangho lah-a lunglhaina umlou bel tobang hiding ahiuve.

⁹Ajehchu amaho gamlah-a sangan changlhat bangin, Assyria heng lama achetouvun ahi: Ephraim'in kideipi ding akithalah-e.

¹⁰Henge, amaho namtinna kon thalah lajongleu, tu-a hi keiman amaho kapuikhom ding, chule leng le pipuiho pohgih jeh-a phat chomkhat lunghem ding ahiuve.

¹¹Ephraim'in chonsetna dinga maicham tamtah asem jeh-in, maicham hochu amadinga chonsetna ding ahung hitai.

¹²Keiman ama henga kadan thu lentah ho chu kasut ahitan, hijongle hicheho chu hetphahlou bangin akingaito tai.

¹³Amahon kahenga ganlhai thilto dingin sa atoh-un, chule hichu amahon aneuvin; ahinla Pakaiyin hihochu asanpeh pon ahi. Tun aman amaho khangitlouna ageldoh-a, chule achonset nau chunga thu atanding ahi. Amaho Egypt'a kinung leding ahiuve.

¹⁴Ajehchu Israel'in asempa sumilin, houin ho asan; chule Juda'in kulpi nei khopi apunsah-in ahi; hijongle keiman akhopihou chunga mei kasol ding, hichun chua aleng inpihou akahchai ding ahi.