Read Thado Chin Hosea 9 Bible Online

Hosea 9 - Thado Chin bible

Hosea 9

¹Vo Israel, midangte kipa bangin kipah hih-in; ajehchu nangma na Pathen'a konin napotdoh-in nakijoh-in, changphol takip chunga tohman nangai chan ahi.

²Changphol le lengpitwi chilna chun amaho avasah louding, chule amanu-a chu lengpitwi thah thonding ahi.

³Amahochu Pakai gamsunga cheng louding ahiuvin; Ephraim vangchu Egypt gama kile ding, chule Assyria gamsunga thilthenglou anehdiu ahi.

⁴Amahon Pakaiya dinga lengpitwi thilto atoloudiu, chujongle amaho ama-a dinga lunglhaina hideh loudingu ahi. Aganlhaina hou jong amaho dinga lunghemho changlhah bangding; anejouseu suhboh-a umding ahi: ajehchu achanglhah-u chu ahinna dingu maimai hiding, hichu Pakai insung hunglut louding ahi.

⁵Nanghon chuche niloupi, Pakai kut loupi nikho chule ipi boltauvin natem?

⁶Ajehchu, veovin, amaho kisuhgamna jeh-a chemang ahitaove: Egypt'in akhop khomuva, Memphis in avuidingu ahi. Adangka kholnau mun nomho chu sachah ling dimding, chule ahoubuh sung houva lingho kehding ahi.

⁷ Gotna kipeh nading nikhoho ahung lhungtan, kilethuhna nikhoho ahung lhungtai; Israel'in hichu ahet ding ahi: nakhan gitlounao dimset jehle, hotna lentah umho jeh chun, themgao chu mingol ahin, lhagaomi chu angol ahi.

⁸Ephraim khongahpa chu ka-Pathen toh umkhom ahin, amavang themgao chu alampi jouse-a vachathang kampa thang ahin, chule kihot bolna a-Pathen insunga aume.

⁹ Sibeah nikholaia bangin amahole amaho akisuseuvin: hijeh-a chu aman akhan gitlounao amelchih ding, chule achonsetnao chunga gotna apeh ding ahi.

¹⁰ Keiman Israel chu lengpithei ga banga gamthipma kanamu ahin; napateu chu theichang phunga ga min masa banga kakimudoh ahi. Ahivangin amaho Baal-peor lama acheuvin, chule hiche jachat umtah mun'a chun akikhinlut taove; amaho thet umtah ahinao chu adeichat banguva umdoh ahitai.

¹¹Ephraim dinga vang, apen napat, naobu sunga pat, chule akijila pat, aloupina hochu vacha banga lengmang ding ahi.

¹²Amahon achateu lentah-in vahdoh jongleu, keiman amaho chu kalahmang ding, hitia chu mikhat jengjong kidalha lou ding ahi: henge, keima amaho-a kona kapotdoh tengle, ohe amahochu ada ahiuve!

¹³Tyre kanamu banga, Ephriam chu leimun nom laija kiphut ahin; ahinla Ephraim'in achate chu tolthatpa koma apuiding ahi.

¹⁴Vo Pakai amaho chu pen; nangin napeh ding chu ipiham? amaho chu naojul lhahna naobu le noitwi kanna chu pen.

¹⁵Agitlouna jouseu chu Gilgal'a aume: ajehchu hiche mun'a chu keiman amaho kanathet ahi. Agitlounau jeh-a keiman amaho ka-in'a kona kanodoh ding, kangailut kit tah louding ahi: apipuihou abonuva thununglou ahiuve.

¹⁶Ephraim chu akivon, ajungu jong agolhatai, amahon ga aneilou diu ahi: henge, hinsepdoh jongleu, angailut alaigilgau jengjong kathading ahi.

¹⁷Amahon athu angailou jeh uva, ka Pathen'in amaho apaidoh ding ahi: chule amaho namtin lah-a vahvei dingu ahi.