Read Thado Chin Joel 1 Bible Online

Joel 1 - Thado Chin bible

Joel 1

¹Pathuel chapa Joel henga Pakai thu hung lhung chu ahi.

²Nangho tehse hon hichehi ngaijun, chule gamsunga cheng miten nabonun nanakol sungun. Hichehi nangho nikholai, ahiloule napu napateu nikho laijenga jong anasoh khamong nam?

³Hichehi nachateo seipeh unlang, nacha teovin jong amaho chate seipehson uhen; chule amaho chun khangkitna achateu chu seipehson kit uhen.

⁴Lusu lung hon anehmoh-u chu khaokhohon anen, khaokho ho nehmoh chu thinglungin anen, thinglung nehmoh chu lungmulin aneh ahi.

⁵Jukham nangho thouvun lang kapmun, chule lengpitwi thah jeh-in, lengpitwi don jouse pengun, ajehchu hichu nakam uva kona kisatlha ahitai.

⁶ Ajehchu thahat tah namkhat, amijat simjoulou, kagamsunga ahung umdoh-in; ahaho keipi bahkai ha tobang ahin, chule keipi bahkai lentah khalhang aneijin ahi

⁷Aman kalengpigui asumangin, kathei chang phung thinghoh akhoh doh-e, aman hichu akhohtheng selin, chule apaimange, hitichun abahho jong agotsahtai.

⁸Akhang donlai a-inneipu dinga khaodip pon kisila nungah theng bangin kapmin.

⁹Neh thilpeh le don thilpeh chu Pakai ina konin akipaidoh tan, Pakai lhachaho, thempuho alunghemuve.

¹⁰Loujao manlou ahitan, gamsungin pul adou tan ahi; ajehchu chang agamtai, lengpitwi thah akangin, chule thaotwi alhasam tai.

¹¹Vo loulhouho, nangho jahchaovin; vo lengpilei malngim ho, suhlou changle sakolchang jehchun maovun; ajehchu louva chang atding chu abeiheltan ahi.

¹²Lengpigui chu agoptan, theichang phung chu agatapoi; kolbuthei phung, lusuphung, theithup phung, chule loulaija thingphung jouse geijin agop gamtai; ajeh chu mihem chate-a konin kipana kitichu abeitan ahi.

¹³Nangho thempuho, nakong kigah-un chule kapmun; maicham phunga natongho maovun; hungun, Pathen natong nangho khaodip pon kisilun lang jan khovah in lumun; ajehchu nehledon thilpeh chu na Pathen in'a kona kiladoh ahitai.

¹⁴Nangho, an ngolin kisuthengun, khoppi theng khat kouvun, Pakai na Pathen insunga upaho chule gamsung mi abonchan khomun lang Pakai henga taovun.

¹⁵ Ohe, chuche nikho chu da aume! ajehchu Pakai nikho chu ahung naitai, chule Hat chungnung Pakaiya kona suhmangna khat hunglhung ding ahi.

¹⁶Imaikoh laitah uva anneh kisatlha hitalou ham, henge, kipa thanopna chu Pakai i-Pathen'u insunga kona kiladoh-a hitalou ham?

¹⁷Muchi chu leilhang noija amontan, chang kholna ahomkeo ahitan,chule changsal ho asegamtai; ajehchu changchu goplha-a ahitai.

¹⁸Gamsaho chu iti penpen jeng hitaovam! ganchaho le ganhonho hamhing umlou jeh-in alung dongun; henge, kelngoi honho jong kinepna bei ahitaove.

¹⁹O Pakai, nahenga katao ahi; ajehchu gamthipma hamhing jong meijin akan, chule loujaova thingphung jouse jong meikongin akachai tan ahi.

²⁰Vadung twiho akan gamtah jehle, gamthipma hamhingho meijin akahgam tahjeh-un, loulaija gamsaho jengjong nangma kounan apengun ahi.