Read Thado Chin Joel 2 Bible Online

Joel 2 - Thado Chin bible

Joel 2

¹Nanghon Zion'a sumkon chu mut un, chule keima moltheng chunga kiginan hasapmin samleuvin, gamsung mite jouse kihot hen, ajehchu Pakai nikho chu anaitai, hichu hung lhung ding ahitai.

²Muthim nikhole lungjina nikho, meibol kai nikhole satah-a thimjina nikho chu, jingkho vah-in molchung ho ahinsal banga hunglhung ding ahi; tumasanga ana umlou, tunungteng jongle akhang akhanga hungum kit louhel ding, mipi nasatah le hattah khat hung kisepdoh ding ahi.

³Amaho masang chu meijin ahalvam peh-in, anunguva mei akongin; amasanguva gamsung chu Eden hon abangin, anunguva manthah na neldi gam abange; amaho-a kona chu koimacha jamdoh theilou ding ahi.

⁴ Amelu chu sakol ho melso tobang ding, chule sakol chung toumi bangin alhaijun ahi.

⁵Amaho chu molsang chunga sakol kangtalai lhaigin banga kichom dingu, changpol mei kahgin banga gingthethu le, mihat tah galvon kivona galsat dingkon bangding ahiuve.

⁶Amaho masanga mite chu thohgim lheh dingu; chule mihem maijouse thimlha ding ahi.

⁷Amaho chu mihattah ho banga lhaidingu, galsat miho banga kul chunga jong kaldoh dingu; chule amaho ama ama lampi cheh-a chediu, adinmunhou asuhkhel lou diu ahi.

⁸Amaho khatle khat kisatto lou dingu, ama lamlhongpi cheh-a chediu; chule chemjam achunguva achuh tengle, amaho kisukhalou dingu ahi.

⁹Amaho khopisunga suhlhai toulhai juntin, kulbang chunga lhaidiu, amaho in chung ho-a kaldoh uva, bangkot ho-a gucha banga lutdingu ahi.

¹⁰Amaho masanga leiset kihotling ding; vanho kithing ding, nile lha thim ding; chule ahsi ho vahdoh talou ding ahiuve.

¹¹Chule Pakai chun agalmite anga thu aseiding ahi: ajehchu agebuh chu loupitah ahin, athu tong molsoji ama jong hattah ahi; ajehchu Pakai nikho chu loupitah le tijat umtah ahin chule koi ham ading jou dinga?

¹²Hijeh chun tun, nangho nalungthim pumpiuvin, an ngol pumin, kaple lhasepum in keima henglama hung kiheijun, tin Pakaiyin aseije.

¹³Navonhou hilouvin nalung sungu botkeh unlang, Pakai na Pathen'u henga kileuvin, ajehchu ama khotonale hepina-a dimset, lunghang vahjilou, lungsetna lentah nei ahin, chule thilphalou aboldinga kona alung aheiji ahi.

¹⁴Ama ahung kileheija alung ahinhei kitna, Pakai Pathen dinga an neh thilto le don thilto, itobang phattheiboh nadalhah pehding kon ija ahetnem?

¹⁵Zion sumkon chu mut un, an ngolin kisuthengun, khoppi loupi khat kouvun.

¹⁶Mipi khomuvin lang, houkhom ho suthengun, upaho khom khomuvin lang, chapanghole naosen noichep nalaiho geijin khomun; moulang chu a-indan sunga konin chedohhen, chule mounu jong alupna dana konin hungpotdoh hen.

¹⁷Thempuho, Pakai lhachaho chu maicham phungle hongcha kah-a kapmuhen, chule amahon, Vo Pakai namite hinghoijin, chule Pathen hephalouten nagoulo mite chunga i-sah louvin vai hom daohen, ipi jeh-a amaho chun miho lah-a a-Pathen'u hoija uma ham ati dingu ham; tin seiju hen

¹⁸Chutengle Pakai chu agamsung dinga hung thang thipma, chule amite chu alungset ding ahi.

¹⁹Henge, Pakai chun adonbutna amite jah-a, veuvin, keiman nangho dinga chang, lengpitwi chule thaotwi kahinsol ding, chule nangho hicheho-a chu nalunglhai diu, chule keiman nangho Pathen heloute lah-a i-sah louva kabolkit louding nahiuve, tin aseije.

²⁰Hinla keiman sahlam galmiho chu nangho-a kona gamlatah-a kachondoh ding, gam galou le manthah na gama kanolut ding, amai chu solam twipi lama, chule anunga hochu lhumlam twipi lama kanolut ding, chule auile anamset hung kikhodoh ding ahi; ajeh chu aman thil lentah anaboltan ahi.

²¹Kicha hih in, vo leiset, kipah inlang thanomin, ajeh chu Pakai in thil loupitah abolding ahi.

²²Nangho gama um gamsaho kicha hih-un, ajehchu gamthip gama hampaho chu hungdon doh ding, thingphungin aga ahin sepding, lengpi guile theichang phung jong agathei chana hung gading ahi.

²³Chuti ahile, nangho Zion chate kipah-un, chule Pakai na Pathen'a thanomun, ajehchu aman nangho dinga gomasa chu ahin juhlhah sah ding, aphabep seuva napeh diu; go nunung jong lhamasa sunga ahin juhlhah sah ding ahi.

²⁴Ajehchu changphol chu sakolchang dimset ding, chule bel jouse jong lengpitwi le thaotwi letsoh ding ahi

²⁵Chule keiman ka sepai nasatah chu nalah uva kahin sole, thinglung, lungmul chule tum lungle khaokhohon, kum tamtah-a ananeh jouse-a chu kakile dohsah kitding ahi.

²⁶Chule nanghon ninglhing tah-a naneh uva, nalungu lhaisel ding, chule kidangtah-a nanabol pau Pakai na Pathen'u min navahchoi diu ahi: chutia chu kamiten jachatna tohtalou helding ahiuve.

²⁷Chule nanghon keima Israelte lah-a um, koima dang hilou Pakai na Pathen'u kahi nahet diu, chutia chu kamite jachatna-a chuta louhel ding ahiuve.

²⁸ Chule khonungle hung hiti ding ahi, Keiman tahsa hing jouse chunga kalhagao kabuh lhah ding, nachapateo le nachanu teovin gaothu aseidoh dingu, na-upa houvin mang amatdiu, chule nakhang dong houvin mu aneidingu ahi.

²⁹Chule hiche niteng chule soh pasalhole, soh numei ho chunga jong kalhagao kabuh lhah ding ahi.

³⁰Chule keiman vanho le leiset chung, thisan, mei chule meikhu khompiho chunga thil kidang kavetsah ding ahi.

³¹ Loupitahle tijat umtah Pakai nikho hunglhun masanga chu, nisa thimsoh-a, lha thisan sohding ahi.

³² Chule hung hiti ding ahi, Pakai min pana tao chan chu koi hijongle huhhing-a umding ahi. Ajeh chu Zion molsang le Jerusalem'a huhdohna umding, Pakaiyin asei banga, akou amoh moh ho lah-a hoidohna lhung ding ahi.