Read Thado Chin Joel 3 Bible Online

Joel 3 - Thado Chin bible

Joel 3

¹Ajehchu, veuvin, chuche nikhole, hiche phat sung, keiman Judah le Jerusalem sohchana-a kon kahin lepui teng,

²Ken jong nam jouse kakhopma, Jehoshaphat phaichama kapuisuh ding, chule kagou, kami Israelte vannoi namtin holah-a athecheh uva, kagam asuhkeh jeh uva athu-u katan ding ahi.

³ Amahon kamite-a dingin vang ave-un, pasal chapang chu noti mandin apedoh-un, judon nadin numei chapang chu ajoh-un ahi.

⁴Ahi, keima dinga ipi nabol dingu ham, Vo Tyre, Zidon chule Palestine gamkol sunga umho, nanghon keima neilethuh dingu ham? neilethuh ule, neilethuh naochu, kintah-a naluchung cheh uva kalethuh kitding nahiuve.

⁵Ajeh chu nanghon keima dangkale sana nakilah-un, chule kathil manluho chu nahouin sunguva napolutnun ahi.

⁶Nanghon agamgiuva kona gamlatah-a natolmang thei nadiuvin, Judah chatele Jerusalem chate chu Greek mite henga najoh doh-un ahi.

⁷Veovin, keiman najohdohnao mun laitah-a chu amaho kadindohsah ding, chule achunga nachonnao chu keiman nalu chunguva kalethuh ding nahiuve.

⁸Chule keiman nachapateo le nachanuteu chu Judah chate khutna kajoh ding, chule amahon gamlatah-a Shebea mite henga ajohson diu ahi, tin Pakaiyin aseije.

⁹Chidang namdangho lah-a hichehi phongjalun, gal din kigouvin, mihat hochu thou uhen, galsat mi jouse hungnai juhen lang, hungdoh-u hen.

¹⁰ Nalangkon hou chu chemjamin khengun, nahampa chetannao chu tengchan semun, hatmohon keima kahatne tiuhen.

¹¹Nangho Pathen hephalouho, kikhomun lang, hungun, chule hungkikhom kimvelun, Vo Pakai, chua chun nangman namihat ho chu hungsuh sah-in.

¹²Pathen hephalouho thou uhen lang Jehoshaphat phaichama hungdoh uhen, ajehchu chua chu keima katouva akimvela um Pathen hephalouho thu katanding ahi.

¹³ Nakoiteu pannun, ajehchu chang amintan; hungin, hungkum lhan; lengpitwi hehna chu adimtan, athaoho alonglet tai; gitlouna chu alenlheh tai.

¹⁴Mipi tamtah, kigel lhuhna phaichama chun mipi tamtah aumtaove; ajehchu kigel lhuhna phaichama chun Pakai nikho ahung naitai.

¹⁵Nisale lhathah thimsoh intin, chule ahsi ho vahlou ding ahiuve.

¹⁶ Pakai chu Zion'a kon hung kitumintin, chule Jerusalem'a kona aw hunging ding; chule vanho le leiset kihot ding; ahivanga Pakai chu amite kinepna hintin chule Israel chate thahat kona hiding ahi.

¹⁷Hiti achu keimahi Pakai na Pathen'u, kamolsang theng Zion'a chengpa kahichu neihet dingu ahi: chutengle Jerusalem chu athenga uma, chule amaho lah-a chu jindangho vahle louding ahitai.

¹⁸Chule hiche nikho chule hung hiti ding ahi, molsang dunga lengpitwi thah hunglong lhading, chule lhang dunga kona jong bongnoi hunglong ding; Judah gamsunga vadung long jouse-a twi longdima, Pakai insunga kona twinah khat hunglong doh-a, hichun Shittim phaicham dung twi achapnou ding ahi.

¹⁹Juda chate chunga akhanset jeh ule, agamsung uva monabei thisan asosahjeh uva, Egypt chu hakamna mun hiding, chule Edom chu hakamna gamthip sohding ahi.

²⁰Hijongle Judah chu a-imatih-a chenna mun hiding, chule Jerusalem chu akhang akhanga chendenna mun hiding ahitai.

²¹Ajehchu keiman kana suhtheng loulai athisan chu kasuhtheng ding ahi: ajehchu Pakai chu Zion'a chengah ahi.