Read Thado Chin Amos 2 Bible Online

Amos 2 - Thado Chin bible

Amos 2

¹ Pakaiyin hitin aseije; Moab suhkhelna thumle liho jeh-a, Keiman achunguva chuding talen chu kalahdoh lou ding ahi; ajehchu aman Edom lengpa guho chu lungngou vin ahal vamin ahi.

²Hijongle keiman Moab chunga meikong kahin sollhah ding, hichun Kerioth leng inpiho ahalvam ding, chule Moab chu boina le kisen awgin chule sumkon ginna thiding ahi.

³Chule keiman chua kona thutanpa chu kasatlhah ding, chule pipuiho jouse ama puma kathading ahi, tin Pakaiyin aseije.

⁴Pakaiyin hitin aseije; Judah suhkhelna thumle liho jeh-a, Keiman achunguva chuding talen chu kalahdoh lou ding ahi; ajehchu amahon Pakai dan thu anahsah pouvin, adan thupeh anit pouve, chule apu apateu dung asunnun, ajouseinao chun atohkhel sah-un ahi.

⁵Hijongle keiman Judah chunga meikong kalelhah ding, chule Jerusalem'a leng inpiho chu ahalvam ding ahi.

⁶Pakaiyin hitin aseije; Israel suhkhelnaho thumle li ho jeh-a, Keiman achunguva chuding talen chu kalahdoh lou ding ahi; ajehchu amahon chonphat chu dangka manin ajoh-un, chule vaichat kengchot to khatnin ajoh un ahi;

⁷Amahon vaichaho luchanga leivui chu amutnun, milungneng lampi akihei mang sanun ahi: chule keima mintheng asubohna dingin, pale chapa numei khat akikopmun ahi.

⁸Amaho maicham takipma kitepna-a kipha ponho chunga chun nomtah in alumlhaovin, chule themmo channa ju chu a-pathen'u insunga adonun ahi.

⁹ Ahin Cedar thingphung banga sangtah, gangpi phung banga dettah Amor mite chu amaho maikoh-a kasumangin; aga chu chunglama konin kasumangin, ajung chu noilama patnin kasumangin ahi.

¹⁰Chujongle keiman nangho Egypt gama konin kapuidoh-un, chule Amor mite gam nalo theina dingun, gamthip laija kum somli kahin puileu vin ahi.

¹¹ Chule keiman nachapateo chu themgao dingin, chule nakhang dong hou chu Nazir mi hidingin kakhou khah-in ahi. Vo Israel chate, hichehi dih hina louham? tin Pakaiyin aseije.

¹²Ahivangin nanghon Nazir miho don dingin lengpitwi napeuvin, chule themgaoho chu gaothu seihih-un tin thu napeuvin ahi.

¹³Veovin, changphal dimsetnin bongkang adelpha bangin, keima nangho noija delphan kaume.

¹⁴Hijeh-a chu ajama chu akikinsah-a kona mangthah ding, chule athahatnin jong athaneina asuhhat louding, chule mihat tah jong ama kihuhdoh joulou ding;

¹⁵Thalpi choipa jong chu dingjou dehlou ding, mikaljang jong amale ama kihuhdoh jou louding; chule sakol chunga touva jong ama le ama kihuhdoh joudeh louding ahi.

¹⁶Chule hiche nikho chule hatchung nungho lah-a ahangsan pa jong sagoh-a jam mangding ahi, tin Pakaiyin aseije.