Read Thado Chin Amos 3 Bible Online

Amos 3 - Thado Chin bible

Amos 3

¹Vo, Israel chate, Egypt gama kona kapuidoh insung pumpi, Pakaiyin nangho douna-a thu aseihi ngaijun;

²Leiset chunga um insung jouse lah-a hi keiman nangho sehbou kahet nahiuve; hijeh-a chu nakhan gitlounao jouse jeh-a keiman nangho talen kamatsah ding nahiuve.

³Kinopto louva mini chekhomthei lhonem?

⁴Keipi bahkai khun sa nehding aneilouteng, gammang sunga akitumdem? Keipi bahkai donglai khun nehding aneiloule, akulsunga kona hungham ji-em?

⁵Tolla thang anchah umlouva, vacha thanga oh theijem? Thang chu asupel beija, tolla kona kipel theijem?

⁶Khopisunga sumkon akimutle, miho kichalou ding ham? Khopi sunga thilse alhuna ahile, hichu Pakaiyin abollou hilou dingham?

⁷Tahbeh-in Pakai Pathen'in athuguh asoh themgaoho koma phongdoh masalouvin ima abolpoi.

⁸Keipi bahkai akitum tai, koiham akichalou ding? Pakaiyin thu aseitai, koijin aphondoh da thei dingham?

⁹Ashdoh leng inpiho le Egypt gamsung leng inpiho-a chun phongle uvin, chule nangho Samaria molsang ho chunga kikhomun lang, alailunga mipi linglaoho le suhgentheija umho khu veuvin.

¹⁰Aleng inpihou sunga hunamle gucha michom akholkhom jeh-un, amahon thildih bolje ahetapouve, tin Pakaiyin aseije.

¹¹Hijeh chun Pakai Pathen'in aseije; gamsungle akimvel chu melmaten aumkimvel ding, aman nahatna chu nanga kona aloilhah ding, chule naleng inpihou chu suhchatvaija umding ahi.

¹²Kelngoi chingpan keipibahkai kamsunga kona akelngoi kengni ahiloule abil hal beh hijongle asalhah tei banga, Samaria gamsunga cheng Israel chate, jalkhun ningchonga umho le, Damascus'a umho chu alupnaova kona kiladoh ding ahiuve, tin Pakaiyin ati.

¹³Pakai Pathen, janel Pathen chun, nanghon ngaijunlang hichehi Jacob insunga hettohsah un, tin aseije.

¹⁴ Israel chunga asuhkhelna hou jala gotna kapeh nikho chuleh Bethel maicham ho jong gotna kapeh ding, chule maicham ki hochu kisatlha ding, tolla lhading ahiuve.

¹⁵Chule keiman phalbi in le nipi lai in chu kavoh lhuh-a, sai mola kisa inho chu mangthah ding, chule inloupiho chun kichai dingu ahi, tin Pakaiyin aseije.