Read Thado Chin Amos 4 Bible Online

Amos 4 - Thado Chin bible

Amos 4

¹Vaichate bolse-a, panpi ngaite sugentheija, a-pakai teo henga hinchoijun donu hite tijia, Samaria molsanga um Bashan bongpi hi, hiche thuhi ngaijun.

²Pakai Pathen chu athenna-a kitep ahitai, Veovin, aman nangho thihkoija, chule nason napah hou ngakoija akaimang diu nikho chu nachung uva hunglhung ding ahi.

³Nangho ahomlai ho-a kona napotdoh diu, mijouse ama ama mailam cheh-a cheding, chule nanghon amaho chu leng inpi sunga nalelut dingu ahi, tin Pakai chun aseije.

⁴Bethel'a hungun, chule sukhelun; Gilgal'a hungun lang suhkhelna punsah-un; na ganlhaina houchu jingkah sehle hinchoijunlang, nahopsom ho kum thum jou sehle hinchoijun.

⁵Chol panna-in thangvahna ganlhaina peuvin, chule manbei thilpehho phongdoh unlang samphong leuvin: ajehchu chutia bolding chu vo Israel chate, nangho deilam ahi, tin Pakai Pathen'in aseije.

⁶Chule Keiman nakhopi jouseuva kel kalhahsah ding, na-umnao jouse-a changlhah kalhah samsah-in, Ahivangin kahenga nahung kiledeh pouve, tin Pakaiyin aseije.

⁷Chule keiman chang atding phat lha thum masangin, nangho-a konin gotwi katuh tangin; khopi khat chunga go kajuhsah-in, khopi danghoa kajuh sahpon; gambih khat chunga go ajun, chule gojuh louna munho chu agojin ahi.

⁸Hijeh chun khopi ni ahiloule thumho chu khopi khatna twi dondin acheleuvin, ahinla adang chah-u achimdeh pon; ahivangin kahenga nahung kiledeh pouve, tin Pakaiyin aseije.

⁹Keiman nangho huise le daitwi jin jepna kape-in, nahon leihou, nalengpi leihou, natheichang phung hou, chule na olive phung hou apun laitah-in, lungmul lenhon anechaijun; ahivangin kahenga nahung kile deh pouve, tin Pakaiyin aseije.

¹⁰Keiman Egypt'a kabolna bangin nalah uva hise kalansah-in; nakhang donghou chemjamin kasatlih-in, nasakol hou katolmangin; chule nagebuh sungu namse chu kanah sah-un; ahivang kahenga nahung kiledeh pouve, tin Pakaiyin aseije.

¹¹ Pathen'in Sodom le Gomorrah anasuhmang bangin, keiman nangho lah-a phabep kasumangin; chule nangho meikong lah-a meisel kiladoh kongnalai nabangun; ahivangin kahenga nahung kiledeh pouve, tin Pakaiyin aseije.

¹²Hijeh-a chu, Vo Israel, keiman hitia hi kabolding ahi: chule hitia kabol ding jehchun, Vo Israel, na Pathen toh kimutodin kigon.

¹³Ajehchu, ven, mol le lhangho ana tungdoh-a, chule hui sempa, mihemte henga alunggel phongdoh-a, jingkah jong muthim sosahji chule leiset chung munsang ho chunga dingpa, Pakai, janelho Pathen, kiti chu amin ahi.