Read Thado Chin Amos 5 Bible Online

Amos 5 - Thado Chin bible

Amos 5

¹Vo Israel insung, nangma douna-a kathusei, kacham hela nachung chang thu kaseihi ngaiphan.

²Israel nungah theng chu alhutan, thoudoh joulou ding ahitai: amanu agamsunga kidalha ahitan, chule amanu kaithou ding koimacha aumtapoi.

³Ajehchu Pakai Pathen'in hitin aseije; Israel insunga dinga, khopi mi sangkhat kitoldoh lah-a chu jakhat bou kida lhah pehding; chule mi jakhat kitoldoh nalah-a som bou kida lhah pehding ahi.

⁴Hijeh chun Pakaiyin Israel insung mite jah-a hitin aseije, Keima neiholun chutile nahin dingu ahi;

⁵Ahin Bethel hol hih-un, Gilgal'a jong lut hih-un, chule Beersheba hopa hih un; ajehchu thonlouva Gilgal chu sohchang teiding, chule Bethel chu imalou hungsoh ding ahi.

⁶Pakai chu holun, chutile nahin dungu ahi; achuti loule Joseph insung chunga ama meikong banga hungchu ding, akahvam ding, Bethel'a aphelmit ding umlou ding ahi.

⁷Nangho thutanna gamsai sosah-a, chule chonphatna leisetna dalha jenghon,

⁸ Ahsi sagi hole bombel sempa, thina le-lim jingkah sosah-a, sunlai jengjong jan banga thimsahpa: huipi twiho kou khoma, chule leiset chunga sunglha pa Pakai chu holun.

⁹Aman kulpidet chunga gamna achuhsah nadingin, ahat chunga manthah na achuhsah-in ahi.

¹⁰Amahon kotpi phunga miphohho athet bolun, chule dihtah-a thusei ho chu ahot bolun ahi.

¹¹Nanghon vaicha chu nachotpha jeh-u le, ama-a kona suhlou chang pohgih nalahpeh jeh-un; nanghon songa kikhengin in sajong leuchun, asunga nachenlou diu, lengpilei hoitah neijuna tin, hijongle lengpitwiho chu nadonlou dingu ahi.

¹²Ajehchu keiman nasuhkhelnao tamtah le na chonsetnao aletje chu kahei: amahon mikitah ho asugentheijun, sum nehguh abolun, chule kotpi phunga vaichate chu achanvou-u aheimang peh-un ahi.

¹³Hijeh-a chu milungchingho chu chuche nikho chule thipding ahiuve: ajehchu hichu phat phalou hiding ahi.

¹⁴Nahin theina dingun, thilse hilouvin thilpha holun; chutile nanghon nasei banguva, Pakai Pathen chun naumpi dingu ahi.

¹⁵Janel Pakai Pathen'in Joseph insung amohho chunga lungsetna anei theinadin; thilse chu hotbolun, thilpha chu ngailuvin, chule kotpi phunga thutana dih phutdoh-un.

¹⁶Hijeh chun Pakai, janel ho Pathen, Pakai chun hitihin aseije; khopi lamlen jouse-a kalemao umding; lamlhongpi jouse-a Ohe! Ohe! atidingu, amahon loulhoupa chu lunghem dinga, chule kapthemho chu kapdinga akoudiu ahi.

¹⁷Chule lengpilei jouse-a kana umding ahi: ajehchu naheng kahin jotpa ding ahi, tin Pakaiyin aseije.

¹⁸Pakai nikho ngaicha-a nangho ada nahiuve! hiche nikho chu ipiding natiu ham? Pakai nikho chu muthim ahin, vah ahipoi.

¹⁹Mihem chu keipi bahkai kicha-a ajamle, vompi toh kitoh ding; insunga lutna, akhut banga angaile, gul'in achuh ding ahi.

²⁰Pakai nikho chu khovah hilouva muthim joh hilouham? hichu hathima thim asunga vah beihel hilou ham?

²¹ Keiman nakut nikho hou chu kakidah-in, kahoi, chule nakhoppi len houva jong kakipa louding ahi.

²²Nanghon govam thilto le neh thiltoho neipe jongleu chun, keiman hicheho chu kasan lou ding: chule chamna thilto-a dinga gancha thaotah tah nato houjong, nahsah-a kanei louding ahi.

²³Kakoma nalasah-u awginho jong chu chon mangun, ajehchu keiman natumging ngeitah hou jong chu kangailou ding ahi.

²⁴Ahinla dihtah-a thutanna chu twiho bangin longlhahen, chule chonphatna chu luidung hattahto banghen.

²⁵ Vo Israel insung mite, nanghon gamthip gama kum somli sunga chu ganlhainaho le thiltoho neinapeh uvem?

²⁶Ahinla nanghon nangho dinga nakisemu na pathen hou ahsi, Moloch ponbuh le namilim semthu-u Chiun chu napo leuvin ahi.

²⁷Hijeh chun Pakai, amin janelho Pathen chun, keiman nangho Damascus khellam peh-a, gal hinga kache sah ding nahiuve, tin aseije.