Read Thado Chin Amos 6 Bible Online

Amos 6 - Thado Chin bible

Amos 6

¹Zion'a nomsa tah-a umho, chule Samaria molsanga atahsan ngamho, namtinho lah-a pipua kiminvo, Israel insung mite hungkon dohna, ohe ada-a ahiuve!

²Nangho Calneh-a cheovin lang veuvin; chule chua kon chun Hamath loupi-a chun cheovin; chujoule Philistinte khopi Gath'a chun chesuh-un; amaho chu hiche lenggam ho sanga phajonam? ahiloule agamgiu chu nangho gamgi sanga lenjonam?

³Nangho nikho phalou gamlatah-a koidoh-a, chule hunama thuneina naicha-a loilut ho;

⁴Saiha-a kisem jalkhun chunga luma, chule atouna nomtah chunga kithaljam ho, kelngoi nou ahonlah-a kon mandoh-a, chule bongnou ho akula alah uva kona mandoh-a nejia nangho;

⁵Selangdah-a la manthei louva sa-a, chule David tumging banga tumgingthei kisemthu-a nangho;

⁶Lhengkonga judon ji-a, amaho le amaho thao hoipen pen kinuji; ahivanga Joseph kisuh gentheina-a lunghempi louho.

⁷Hijeh-a chu tu-a hi amaho gal-hinga kikai masa hotoh gal hinga chekhom diu, chule nomsa tah-a kithaljamho golvah jong kisubei ding ahi.

⁸Pakai Pathen amatah akihahselin, janel Pakai Pathen'in hitin aseije; Jacob kiletsahna chu kakidah-in, aleng inpiho chu kathe-e: hijeh-a chu akhopi chu asunga umho jouse puma kapehdoh ding ahi.

⁹Chule hung hitiding ahi, insung khatna mi som auma ahileh, amaho chu thiding ahiuve.

¹⁰Chule agu chu haldinga apa-ngah pa leh athiho hal pa chun alah-a, insunga kona ahinpoh doh ding, chule insunga um mikhat henga chu, khattou nangma toh umkhoma umnalai em? tia aseiding; chule ama chun, koima aumtapoi, atiding ahi. Chutengle aman, nakam kihupmin; ajehchu eihon Pakai minchu iphahpoh theilou diu ahi, tia asei ding ahi.

¹¹Ajehchu veuvin, Pakai chun thu apeh ahi: chule aman inpi chu avohsetna asuhchip ding, chule inneoho chu ahal hala asoding ahi.

¹²Sakol ho chu songpi chunga lhainao vin tem? Mihon chumun chu bongchalin kainao vin tem? Ajehchu nanghon thutandih chu thinkha naso-un, chule chonphatna ga chu thing gunei nasosah taove.

¹³Nangho imacha hilou thil khatna kipah jia, chule sakiho chu ithahat naova ikilah-u hilou ham? tia seijiho.

¹⁴Hijongle, veuvin, vo Israel insung, keiman nangho douva nam khat katun dohding ahi, tin janel Pakai Pathen'in aseije; chule amahon Hamath lutna-a pat, gamthip vapidung geija nangho nasuhgenthei dingu ahi.