Read Thado Chin Amos 7 Bible Online

Amos 7 - Thado Chin bible

Amos 7

¹Pakai Pathen'in keima hitihin eina musah-e: veuvin, aman hamhing kehdoh nunung ho ahung kedoh kipat tilin khaokho tamtah asemin, veuvin, hichu lengpa-a hamhing at dan dungjuija akehdoh nunung ho ahi.

²Chuin ahitin ahi, amahon gamsunga hampaho anehchai phatnun, keiman, Vo Pakai Pathen nahenga katao ahi, ngaidamin, Koi jala Jacob chu dingdoh kit ding ham? Ajehchu ama neocha ahi, tin kaseijin ahi.

³Hijeh hin Pakaiyin alung aheijin; chuti taponte, tin Pakaiyin aseije.

⁴Pakai Pathen'in keima hitihin eimu sah-e: veuvin, Pakai Pathen'in engbolna din mei akouvin, hichun twipi lentah akagon, chule tolgo phabep jong akavamin ahi.

⁵Chuin keiman, Vo Pakai Pathen, khongaijin tia nahenga katao ahi; Koi jala Jacob chu dingdoh kit ding ham? Ajehchu, ama neocha ahi, tin kaseije.

⁶Hichun Pakai lung akisihsah tan, hiche jonghi chuti taponte, tin Pakaiyin aseije.

⁷Hitihin aman eimusah-e, chule veuvin, Pakai chu tetohna khao akhutna achoijin, tetohna-a kisem bang chung khatna adingin ahi.

⁸Chuin Pakaiyin kajah-a, Amos, nangin ipi namu em? eiti. Chuin keiman, tetohna khao kamui katin ahi. Chuin Pakaiyin hitin aseije; Ven, keiman kami Israelte lah-a tetohna khao kakoiding, keiman amaho lah kapal kit tahlou ding ahi.

⁹Chule Isaac munsang ho chu kamhel ding, Israel muntheng ho chu kisumang ding; chule keiman Jeroboam insung douna-a chemjam kapat ding ahi, ati.

¹⁰Chuin Bethel'a thempu Amaziah chu Israel leng Jeroboam henga thu athotnin, hitin aseije; Israel insung mite lah-a nangma dounan Amos'in guhthim thilgon aneije. Athusei jouse chu gamsung mite pohjou ahipoi.

¹¹Ajehchu Amos'in hitin ati, Jeroboam chemjam'a thiding, chule Israelte hi agam sunguva kona sohchang dinga kitolmang ding ahiuve, tin aseijin ahi.

¹²Amaziah jong chun Amos jah-a, vo nangma mitvahnei, chenlang Judah gama jamlut-in, chumuna chun changlhah nenlang gaothu seijin.

¹³Ahin Bethel'a hin gaothu seikit tahih-in: ajehchu hikom hi lengpa houin le lengpa leitol ahi, ati.

¹⁴Chuin Amos'in adonbutnin, Amaziah jah-a, keima themgao kahipoi, themgao chapa jong kahipoi; ahinla keima kelngoi vah-a le theiba ga lohkhom bou kahi.

¹⁵Chule kelngoi hon nung kajui petnin, Pakaiyin eipuijin, kajah-a, Chen, kami Israelte lah-a gao thu gaseijin eitin ahi.

¹⁶Hijeh chun, tun nangin Pakai thusei hi ngaijin; nangman kajah-a, Israel dounan gaothu seihih-in, chule Isaac insung dounan thu seihih-in tin naseije.

¹⁷Hijeh chun Pakaiyin hitin aseije; najinu chu khopi sunga noti'a pangding, nachapate le nachanute chu chemjam'a lou dingu, nagam leiset chu tena khaova kihomtel ding; chule nangma gam thenglou mun'a nathi ding ahi: chule thonlouva Israel chu agamsunga kona munchoma sohchanga cheding ahi.