Read Thado Chin Amos 9 Bible Online

Amos 9 - Thado Chin bible

Amos 9

¹Keiman Pakai chu maicham chunga adin kanamui; chule hitin aseije, akhom ho chu akilon theina din kotbeng chu jepmin; chule alu-u chu ban sattanin, alah uva anukhahpen chu Keiman chemjam'a kasatlhuh ding; alah uva jam-a chu jammang theilou ding, chule ahoidoh-a kihuhdoh louding ahi.

²Amahon thikhol khul'a leiko laijongleu, hia kona chu kakhutna kaloidoh ding; amaho van'a kaltou jongleu, hia kona chu kapuilhah kit ding ahi.

³Chule amaho chu Carmel molvum'a kisel jongleu, kahol doh-a hia kona chu kakaidoh ding; chule amaho kamitmu-a konin twikhanglen todopma kisel jongleu, chumuna chu keiman gul thu kapeh-a, aman amaho chu achuh ding ahi.

⁴Chule amaho amelmateu masanga gal hingin kitol jongleu, chumuna chu Keiman chemjam thu kapeh-a, hichun amaho athagam ding; Chule Keiman amaho thilpha-a ding hilouva, thilse-a dinga kavetlhih jing dingu ahi.

⁵Chule gamsung sukha jia chu janel ho Pakai Pathen ahin, hichu junlha-a, chua chengho jousen alung hempi diu: Hichu twisoh banga apumchanga hungsoh doh ding; Egypt'a twiso banga chu, paidoh le lhohsah-a umding ahi.

⁶Vanchunga indanho kisah-a, leisetna galmihon kisemdoh-a chu ama ahin; twipia twiho kou khoma, hihochu leiset chunga hinsung lha-a chu ama ahi. Pakai kiti chu amin ahi.

⁷Vo Israel chate, nangho Keima dinga Ethopia chateho tobang nahiu hilou ham? tin Pakaiyin aseije. Keiman Israel chu Egypt gama kona kapuidoh hilou ham? Philistine te chu Caphtor-a kona, chule Syria techu Kir'a kona kapuidoh hilou ham?

⁸Veovin, Pakai Pathen mit teni chu chonsetna dim lenggam chunga achujin, chule keiman hiche leiset chunga kona kasuhmang helding; Jacob insung vang kasuhmang hel louding ahi, tin Pakaiyin aseije.

⁹Ajehchu, veuvin, Keiman thu kapeh ding, godalla chang akisep banga, Keiman namtinho lah-a Israel chu kasep chil ding ahin, achang neopen jeng jong tolla lhalou ding ahi.

¹⁰Setna-in eiphapou vintin, mai jong eikimaitopi pouvinte tia sei Kami chonseteho jouse chu abonuva chemjam'a louding ahiuve.

¹¹ Hiche nikho teng chule keiman David houbuh lhusa chu kaphoh ding kitna, aselai ho kasemphat kitding; chule achimsa chu katundoh kitna, gollui laija banga kasah doh kit ding ahi.

¹²Chutiachu Edom mite amoh chengse le, Pathen hephaloute kamina kikou chengse chun alo theidiu ahi, tin hiche tongdoh-a Pakai chun aseije.

¹³Veovin, nikhoho chu ahung lhunge, tin Pakaiyin aseije, loukaija pangpan chang atpa ahinphah ding, lengpithei chilpan muchi tupa ahinphah ding; molsang hon lengpitwi lhumtah ahinvat lhahsah-a, chule lhangho jouse junlha dingu ahi.

¹⁴Chule keiman kami Israelte chu asohchan naova kona kahin lepui kit ding, amahon akamhelsa khopiho asahdoh kitnuva, hiho chu chenna-a aneidiu; chule lengpitheiho aphu uva, chuche-a lengpitwi chu adondiu; chule honho jong abolluva, chuche-a agaho chu anehdiu ahi.

¹⁵Chule keiman amaho chu agamuva kaphulut dingu, keiman kapehsao gamsunga kona chu amaho kibotdoh kit louding ahitaove, tin Pakai na Pathen'un aseije.