Read Thado Chin Jonah 1 Bible Online

Jonah 1 - Thado Chin bible

Jonah 1

¹ Tun Amittai chapa Jonah henga Pakai thu ahung lhungin, aseije,

²Kipat in lang, khuche khopi lentah Nineveh'a khun chen, chule ama dounan hiche thuhi gasam phongin; ajehchu akhansetnao chu kahenga ahung lhung touve.

³Ahin Jonah akipatdoh-in Pakai angsunga konin Tarshish lama jam dingin Joppa-a achesuh tan ahi; chuin aman kong khat Tarshish lam cheding amun: hitichun touna man chu apen, Pakai angsunga konin Tarshish lama chedingho toh chekhom din, asunga akumsuh tan ahi.

⁴Ahin Pakaiyin twikhanglen'a chun hui hattah ahinsoltan, huile go kitho nasatah ahung chutan, hitichun chuche kong chu keh dingin aumtan ahi.

⁵Chujouvin kong tol ho chu akicha taovin, amitin chu a pathen heng cheh uva ataovun, chule kong sunga um thil ho chu kong ajankhai theina din alauvin, twikhanglen'a aseplha taovin ahi. Ahin Jonah vangchu kong sung ning khatna ana kumsuh-in; hia chun alumin, a-imumil deltan ahi.

⁶Hitichun kong pipuipa chu ahenga ahungin, ajah-a, Vo ihmumil delpa, nangma ipi ngaito nahim? thoudoh-in lang eiho imanthah louna diule Pathen'in ichunguva lunggel ahin neitheina din, na Pathen henga taovin ati.

⁷Chuin amaho amitakipmin aloi agol kom cheh-a chun, Hungun, koipen jeh-a hiche thilse hi ichunguva chua ham ti ihetdoh theina diuvin vang sannu hite atiovin ahi. Hitichun amahon vang chu asantaovin ahile, Jonah chunga achutan ahi.

⁸Hichun amahon ajah-a, Nahenga kangeh-u ahi, neisei peh-un, koijeh-a hiche thilse hi ichunguva chua ham; ipi natonga nahim? hoija hungkon nahim? ipi gam mi nahi ham? chule ipi nam mi nahim? atiuvin ahi.

⁹Chuin aman ajah uva, Keima Hebrew mi kahin, twikhanglen le leiset sempa Pakai van Pathen chu kakichan ahi, ati.

¹⁰Chuin miho chu nasatah-in akicha cheh taovin, ahenga, Ipi dinga hitobang hi nabol hitam? atiuvin ahi. Ajehchu amaho aseipeh jeh chun, Pakai angsunga kona jama mi ahi ti chu amahon ahetauvin ahi.

¹¹Chuin amahon ajah-a, Twipi hi kadinguva athip theina dinga nachunga hi ipi kaboldiu hitam? atiovin ahi, ajehchu twipi chu akinongin hui leh go akithotai.

¹²Chuin aman ahenguva, Neidom uvin lang twipia chun neiseplha taovin; chutile nangho dinga twipi hi thipding ahitai: ajehchu keima jeh-a hiche huipi gopihi nachung uva chua ahi ti keiman kahei, ati.

¹³Ahijeng vangin miho chun kong chu tolgo lam lhutna teidin hatah-in atolun, ahinla ajoutapouvin ahi. Ajehchu twipi chu akinongin, huipi leh gopi chu amaho chunga akhoh cheh-in ahi.

¹⁴Hijeh chun amaho Pakai henga ataovun, Nahenga kataovu ahi, Vo Pakai, nahenga kahung taovu ahi; hiche mihempa hinkho jeh hin neimanthah sah hih-un, chule themona bei thisan chu kachunguva kikoi hihhen; ajehchu Vo Pakai, nangin nalungdei banga nabol ahi, atiuve.

¹⁵Hitichun amahon Jonah chu adomun, twipia aseplha taovin ahi: chutah-in twipi chu akinon na-a konin athiptan ahi.

¹⁶Chuin amahon Pakai chu kichat mainan akicha tapouvin, Pakai henga ganlhaina abolun, chule kitepna aneijun ahi.

¹⁷ Tun Pakaiyin Jonah val dingin ngapi lentah khat gotsan anakoijin ahi. Chuin Jonah chu ngapi oisunga ni thumle jan thum aumin ahi.