Read Thado Chin Jonah 3 Bible Online

Jonah 3 - Thado Chin bible

Jonah 3

¹Chuin anivei channan Pakai thu chu Jonah henga ahungin, aseije,

²Kipatdoh-in, khuche khopi lentah Nineveh'a khun chen, chule keiman seiphong dinga kapeh thuhi gaseiphongin, ati.

³Hitichun Jonah akipatdoh-in, Pakai thu dungjuijin Nineveh'a chun achetan ahi. Tun Nineveh chu khopi lentah ahin, ni thum sung kijot ahi.

⁴ Chuin Jonah chu khopi sung alutnin, ni khat lampi ajot panin, aman, Tua pat nisomli joule Nineveh kisumang ding ahi, tin asamin ahi.

⁵Hitichun Nineveh miten Pathen chu atahsan taovin, an ngolna ding aphongun, amaho alenpenna pat aneopen chan geijin khaodip pon akisilun ahi.

⁶Chule thu chu Nineveh lengpa henga ahung lhungtan, chuin ama alaltouna-a konin akipatdoh-in, alalvon chu akoilhan, khaodip pon akikhun, vut lah-a atoutan ahi.

⁷Chuin aman lengpa le amilalte minna Nineveh khopi pumpi-a phonjala sapphong dingin thupeh aneijin, hitin ati, Mihem hihen sahem hijongle, bonghon hihen kelngoihon hijongle imacha atep louhel diu ahi: amahon an jong anehlou diu, twi jong adonlou diu ahi.

⁸Ahin mihem le ganchaho chun khaodip pon kikhu-u henlang, Pathen henga nasatah-in taovuhen. Ahi, amitin athilse bolna lampile akhutnuva pumhat thilbol ho-a konin hung kilekitnuhen.

⁹Eiho imanthah louna dinguva, ijemtia Pathen ahung kihei kitna alung aheija, alungsatna khohtah-a kona akiheimang kit thei ding kon aseithei ding ham? ati.

¹⁰Chuin Pathen'in anatoh hou, athilse bolnao lampi ho-a kona ahung kilehei kitnu chu amun; chule Pathen'in achunguva kabol ding ahi tia asei thilse-a kon chun alung aheijin, aboltapon ahi.