Read Thado Chin Jonah 4 Bible Online

Jonah 4 - Thado Chin bible

Jonah 4

¹Ahinla hiche hin Jonah chu hatah-in alunglhaisah tapon, ama alunghang lheh jengtan ahi.

² Chuin ama Pakai henga ataovin, Vo Pakai, nahenga katao ahi, kachenna gamsunga kaum petna kanasei chu hiche hi ana hilouham? Hijeh-a chu namasanga kona Tarshish lama kanajam ahi. Ajehchu nangma lungsetna dim Pathen, hepina dim, lunghang vahlou, khotona lentah nei, thilse-a kona lungheiji Pathen nahi kahet ahi.

³ Hijeh chun tun Vo Pakai, nahenga katao ahi, keima-a konin kahinkho hi latan; ajehchu keima dingin hinsangin thi aphajoi, ati.

⁴Hichun Pakaiyin, Nalunghan hi pha nasah ham? ati.

⁵Hitichun Jonah khopi-a konin apotdoh-in, khopi solam sanga atouvin, hia chun buhkhat asongin, khopi chunga chu ipi hung lhungem ti amutheina din buhlim noija chun atouvin ahi.

⁶Chuin Pakai Pathen'in umgui khat ahin kedohsah-in, alung hesohna-a kona huhdoh-a aumna dingle, aluchunga nilima pang dingin, Jonah chungvuma akhandoh sah-in ahi. Hitichun umgui jal chun Jonah akipah lheh jengin ahi.

⁷Ahinla akit nikho jingkah ahunghi phatnin, Pathen'in lung khat ahinsolin, hichun umgui chu anegamin ahile agolhatai.

⁸Chuin ahitin ahi, nisa ahungso phatnin, Pathen'in solam hui gimsetah-a sa chu ahin nunsah-in; chule nisan Jonah luchung chu ahinkhon ahile ama alha lhoptan, chuin aman thiding alhangai tan, Keima dingin hinsangin thi ding aphajoi, ati.

⁹Chuin Pathen'in Jonah henga, Umgui jeh-a nalunghan hi dih nasah ham? ati. Chuin aman, Thina chan geija dinga kalunghan hi dih kasai, ati.

¹⁰Hichun Pakaiyin, Nangman natohgim jong hilou, nakhansah jong hilou, jankah-a hungkeh doh-a jankah-a mangthah-a umgui chunga bon hepina naneija ahile;

¹¹Achutile chuche Nineveh khopi lentah, asunga akhut jetlamu le akhut veilamu jong hekhen theilou mihem sangjakhat le sangsomni hole, gancha tamtah ho khu keiman khendoh louva kakoi ding ham? ati.