Read Thado Chin Minbu 1 Bible Online

Minbu 1 - Thado Chin bible

Minbu 1

¹ Egypt gama kona ahungdoh kalu kumni channa, alhani lhinna nimasa pen nin Sinai gamthipma kikhopna houbuh sunga chun Pakaiyin Mosi jah-a thu ahin seijin, hitin ati.

²Israel chate houkhom ho jouse chu a-in ko kon, aphung phunga apate kailhah cheh-in, amin jatnu dungjui cheh-in pasal jouse abonchan simsoh keijin.

³Israel sunga galsat dinga manthei jouse kum somni-a pat achunglam sechu nangma toh Aaron'in aloi loija sim sohkei lhonin.

⁴Chule aphung phunga apate kailhah-a insung luchang pentah mikhat cheh nakithopi lhon dinga nalhen doh lhon ding ahi.

⁵Chule hicheng jouse hi nangni kithopi ding miho minchu ahi: Reuben phunga kon; Shedeur chapa Elizur.

⁶Simeon phunga kon, Zurishaddai chapa Shelumiel.

⁷Judah phunga kon, Amminadab chapa Nahshon.

⁸Issachar phunga kon, Zuar chapa Nethaneel.

⁹Zebulun phunga kon, Helon chapa Eliab.

¹⁰Joseph chate holah-a kon: Ephraim phunga kon, Amihud chapa Elishama: Manesseh phung kon, Pedahzur chapa Gamaliel.

¹¹Benjamin phunga kon Gideoni chapa Abidan.

¹²Dan phunga kon, Ammishaddai chapa Ahiezar.

¹³Asher phunga kon, Ocran chapa Pegiel.

¹⁴Gad phunga kon, Deuel chapa Eliasaph.

¹⁵Naphtali phunga kon, Enan chapa Ahira hiding ahi.

¹⁶Hichenghi houkhom na lah-a kona aminche cheh ahiuvin, apu apateu phung kaija pipu cheh, Israel asang sang luchang ho ahiuve.

¹⁷Chuin Mosi le Aaron chun hiche amin kisimdoh chengse hi apuidoh lhonin;

¹⁸Chule houkhom ho jouse chu lhani lhinna nimasa pen nichun akhom khomun, amahon apu apaova a-inko dungjui cheh-in, kum somni-a lhah chunglamse chu asimun, amin jatnu dungjui cheh-in aphung guiju chu aphongdoh taove.

¹⁹Pakaiyin Mosi athupeh bangin, aman jong Sinai gamthipma chun aminu asimtan ahi.

²⁰Israel chapa alenpen Reuben chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkei tan ahi.

²¹Reuben phunga kon akisimdoh amaho chengse chu; sangsomli le sanggup toh janga ahi.

²²Simeon chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile;

²³Simeon phunga kon akisimdoh amaho chengse chu sangsomnga le sangko toh jathum ahi.

²⁴Gad chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile;

²⁵Gad phunga kon akisimdoh amaho chengse chu sangsomli le sangnga toh jagup le somnga ahi.

²⁶Judah chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile;

²⁷Judah phunga kon akisimdoh amaho chengse chu sangsomsagi le sangli toh jagup ahi.

²⁸Issachar chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile;

²⁹Issachar phunga kon akisimdoh amaho chengse chu sangsomnga le sangli toh jali ahi.

³⁰Zebulun chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile;

³¹Zebulun phunga kon akisimdoh amaho chengse chu sangsomnga le sagi toh jali ahi.

³²Joseph chate, aminso dinga Ephraim chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile;

³³Ephraim phunga kon akisimdoh chengse chu sangsomli toh janga ahi.

³⁴Manasseh chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile;

³⁵Manasseh phunga kon akisimdoh chengse chu sangsomthum le sangni toh jani ahi.

³⁶Benjamin chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile;

³⁷Benjamin phunga kon akisimdoh chengse chu sangsomthum le sangnga toh jali ahi.

³⁸Dan chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile;

³⁹Dan phunga kon akisimdoh chengse chu sangsomgup le sangni toh jasagi ahi.

⁴⁰Asher chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile;

⁴¹Asher phunga kon akisimdoh chengse chu sangsomli le sangkhat toh janga ahi.

⁴²Naphtali chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile;

⁴³Naphtali phunga kon akisimdoh chengse chu sangsomnga le sangthum toh jali ahi.

⁴⁴Hichenghi Mosi le Aaron nin asimdoh lhon chu ahin, Israel pipuho chu mi som le mini ahin; mikhat cheh chu phung khat cheh-a ding ahi.

⁴⁵Hijeh chun hichengho jouse hi Israel chate ho, apu apateu insung dungjui cheh-a kumsom ni-a lhah chunglamse, Israel sunga gal konthei cheh akisimdoh hochu ahiuvin;

⁴⁶Aboncha akisimdoh jouse chu, sangjagup toh sangthum toh janga le somnga ahi.

⁴⁷Ahivangin Levi ho chu apu apateu kailhah phung lah ahin akisimtha pon ahi.

⁴⁸Ajehchu Pakaiyin Mosi jah-a aseijin, hitin ati,

⁴⁹Levi phung bou chu nasimtha louding, Israel chate kisim na-a jong nasimtha louding ahi.

⁵⁰Ahivangin nangman Levi ho chu hettohsahna houbuh chung le asunga um sumlheng ho chung, chule thildang aum jouse vetupma napansah ding ahi; amahon houbuh le asunga sumlheng ho jouse apoh dingu; chule hicheho chunga chu lhacha-a pangdiu, chujongle houbuh kimvela chu gebuh akison dingu ahi.

⁵¹Houbuh chu malama akichon ding tengle, Levi miten aphetlhah dingu: chule houbuh chu sonding ahitengle, Levi mihon atundoh dingu ahi: chule hetkhahlou mi anaija hunga aumle thajeng ding ahi.

⁵²Chule Israel chate chun ama ama ponbuh cheh chu abung abunga akisah diu, amitakipmin ajanelu dungjuija aponlap kom cheh uva akisah dingu ahi.

⁵³Amavang Levi ho chun Israel houkhom ho chunga lungsatna aumlouna dinga, hettohsahna houbuh vela chu akisah dingu ahi. Chule Levi ho chun hettohsahna houbuh chunga mopohna anei dingu ahi.

⁵⁴Chuin hitichun Israel chate chun Pakaiyin Mosi athupeh jouse dungjui chun abol taovin ahi.