Read Thado Chin Minbu 10 Bible Online

Minbu 10 - Thado Chin bible

Minbu 10

¹Chuin Pakaiyin Mosi jah-a aseijin, hitin ati.

²Mipi ho koukhom nading le ngahmun ho kitoldoh na-a naman theina dingin dangka sumkon ni semin, hichu sehcha-a nakhetna nasem ding ahi.

³Hichu ania amahon amut tengule mipi ho jouse chu nahenga houkhom ho houbuh kotna chu hung kikhom diu ahi.

⁴Chule amahon sumkon khatbou amutnuva ahile, Israel asang asang luchang ho, pipuiho chu nakoma hung kikhom diu ahi.

⁵Nanghon kigina khatvei namut tengule, solam sanga um gebuh hochu kitolmasa diu ahi.

⁶Nanghon kigina aniveina namut tengule, lhanglam sanga gebuhho kitoldiu ahi; amahon akitol nadiuva kigina amutdiu ahi.

⁷Ahinla houkhom ho chu akikhop khom ding tengule nanghon namut diu, amavang kigina namut banguva naginsah lou dingu ahi.

⁸Chule Aaron thempu chapate chun sumkon chu amut dingu; chule nakhang lhumkei uva a-itih-a dinga chonna dan hiding ahi.

⁹Chule nagamsunguva nasugenthei uva namelma teu satdinga nacheuva ahile, nanghon sumkona chu kigina namut diu; chutile Pakai Pathen angsunga goldoh-a naum diu, chule namelma teova kona huhdohna-a naum diu ahi.

¹⁰Chujongle nakipa nikhou le, naniloupi nikho hou, chule lha kipatseh le napumgo thiltou le nachamna thiltou ganlhaina chunga chu, hicheho chu nangho dinga Pathen angsunga geldoh ahitheina dinga sumkon ho namut dingu ahi. Keima na Pakai Pathen'u kahi.

¹¹Chuin akum nina, alhani lhina, nisomni channi chun ahitin ahi, meilom chu hettohsahna houbuh-a konin akiladoh tan ahi.

¹²Chuin Sinai gamthipma konin Israel chate akitolun; Paran gamthipma chun meilom chu akingatan ahi.

¹³Chuin Mosi khutna Pakai thupeh dungjuijin amahon akholjinu masapen chu apan taovin ahi.

¹⁴Amasa penin agalsat miteo dungjuijin Judah chate houbuh ponlap chu achen; chule janel ho chunga lamkaija chu Amminadab chapa Nashon ahi.

¹⁵Issachar chate phunga janel ho chunga lamkai chu Zuar chapa Nathaneel ahi.

¹⁶Chule Zebulun chate phunga janel ho chunga lamkai chu Helon chapa Eliab ahi.

¹⁷Chuin houbuh chu aphelhauvin; Gershon chapate le Merari chapaten houbuh chu apouvin malam ajon taovin ahi.

¹⁸Chuin agalsat miteu dungjuijin Reuben ponbuh ponlap chu akitolin, chule Shedeur chapa Elizur chu janel chunga lamkai ahi.

¹⁹Simeon chate phunga janel ho chunga lamkai chu Zurishaddai chapa Shelumiel ahi.

²⁰Chule Gad chate phunga janel ho chunga lamkai chu Deuel chapa Eliasaph ahi.

²¹Chuin Kohath miho chun muntheng chu apouvin akitolun ahi. Chule adangho chun amaho hunglhun masangin houbuh chu anatung doh masaovin ahi.

²²Chuin agalsat miteu dungjuijin Ephraim chate ponbuh ponlap chu akitolin; chule Ammihud chapa Elishama chu ajanel hou chunga lamkai ahi.

²³Chule Manasseh chate phunga janel ho chunga lamkai chu Pedahzur chapa Gamaliel ahi.

²⁴Chule Benjamin chate phunga janel ho chunga lamkai chu Gideoni chapa Abidan ahi.

²⁵Chuin Dan chate gebuh ponlap chu akitolin, hichu ami janel hou sunga gebuh nunungpen ahin ahi: chule Amishaddai chapa Ahiezer chu janel chunga lamkai ahi.

²⁶Chule Asher chate phunga janel ho chunga lamkai Ocran chapa Pagiel ahi.

²⁷Chule Naphtali chate phunga janel chunga lamkai chu Enan chapa Ahira ahi.

²⁸Hiche hi akitol laijuva agalsat miteu dungjuija Israel chate kitoldan ahi.

²⁹Chuin Mosi'n anupapa, Midian mi Raguel chapa Hobab jah-a, Pakaiyin nangho kapeh ding nahiuve tia aseina mun jona che kahiuve; hungin kilhonnute, keihon na bolpha naovinge, ajeh chu Pakaiyin Israelte thudola thilpha aseije, ati.

³⁰Chuin aman ajah-a, Kahung louding ahi; ahin keima kagam le ka-inkote koma kache johding ahi, ati.

³¹Chuin aman, Katao ahi, neidalha hih-un; ajehchu nangman keihon gamthipma gebuh iti kason diu nahen, nangma keiho mitna napan ding ahi.

³²Chule hitiding ahi, nangma keihotoh nalhon khomma ahile, henge, hitiding ahi, Pakaiyin keiho chunga phatna abolding chanchu keihon jong nangma chunga kaboldiu ahi, ati.

³³Chuin amaho Pakai molsanga kon chun nithum lampia chun akipat doh-un: chule Pakai kitepna thingkhong chu nithum lampia chun amaho kingahna ding mun hol dingin amasanguva achen ahi.

³⁴Chule amaho ngahmuna kona achedoh tengule Pakai meilom chu sun le achunguva aumjin ahi.

³⁵ Chule ahitin ahi, thingkhong chu akitol tengle Mosi'n, Pakai, kipatdoh-in, chule namelmaho chu kithecheh-u henlang; nangma nahotbolte chu na angsung jamuhen, atijin ahi.

³⁶Chule hichu akingah tengle, aman, O Pakai, Israel sangtamtah henga hung kile kitnin atijin, ahi.