Read Thado Chin Minbu 11 Bible Online

Minbu 11 - Thado Chin bible

Minbu 11

¹Chuin mipi chu aphun phatnun, Pakai alunglhai tapon: chule hichu Pakaiyin ajan, alung akoujah jengtai; chuin Pakai lunghanna chu amaho lah-a akoudoh tan, gebuh pammong penna umho chu aka mangtan ahi.

²Chuin mipi chu Mosi hengah apengjah taovin ahile, Mosi Pakai henga ataovin, hichun meichu amit tai.

³Mipi lah uva chu Pakai meija ahung kou jehchun, aman hiche munchu Taberah asahtai.

⁴Chuin choplop mihonpi lah-a chun sa ducha-a aumtan; chule Israel chate jong chu akapkit taovin; Kon eiho nehding sa eipeh dingu ham?

⁵Egypt gama manbeija ineh-u nga ho, changmai ho, donkho ho, louthul ho, louthul tilnei ho, louthul chang neiho chu igel doh-un ahi.

⁶Ahinla tun ihinnao agolhatan; chule imitmu uva manna tilou imacha aumpon ahi, atiuve.

⁷ Chule manna chu pathikhomu toh abangin, chule avoupoh chu thingnaidol toh abangin ahi.

⁸Chule miho chu cheova, alokhomuva, sumheija agoibongu, ahiloule songlhenga avoh bonguva, khangbela akanuva, chutengle hiche-a chu changlhah asemjiu ahi: hichu atuidan thaothah kikang changlhah toh abangin ahi.

⁹ Chule jana gebuh chunga daitwi ahunglhah tengle, manna chu alhahtha jin ahi.

¹⁰Chuin Mosi'n mipi ho jouse a-inko ko-a, ami takip ponbuh kotna akau ajatan; Pakai lunghanna chu nasatah-in ahung kong dohtan, Mosi jong chu alung nommo lheh tan ahi.

¹¹Chuin Mosi'n Pakai henga, Ipi dinga nasoh hi nagimbol ham? Ipi jeh-a kachunga mipi jouse pohgih hi nangapma, nangma mitmu-a nalungsetna kachan leltam?

¹²Keiman hiche miho jouse hi kanavop ham? Keima hinbeh hiuva Nangma kahenga, Mipan naosen noichep lai apom bangin nangman amahohi na-angsunga pomin lang, apu apateu kateppeh gamma puilutnin neitiham?

¹³Keiman mipi jouse pehdinga sa hoija kalah ding ham? Ajehchu amaho kahenga akapmun, Kaneh diuvin sa neipeuvin, atiuve.

¹⁴Mipi hijatpi hi kachang seh-in pojou ponge, ajehchu keidingin agihsa behseh-e.

¹⁵Hitia hi neibolding ahile, katao ahi, namit mu-a lungsetna kachana ahile, hilai munahin tule tun neithat jengin; kamanthahna muda jenginge, ati.

¹⁶Chuin Pakaiyin Mosi henga, Nangman mipi ho chunga lamkai le upa ahi tia nahet Israel upaho mi somsagi kahenga hinkhomin; chule amaho chun nangma to adinkhom theina diuvin houkhom ho houbuh-a hinpuijin.

¹⁷Chule keima kahung kumlhah-a hikoma chu nangma kakihoupi ding: chule nachunga um lhagao chu kalah-a amaho chunga kakoiding; chule nangman mipi ho pohgih chu nachang seh-a napoh louna dinga amahon napoh hu dingu ahi.

¹⁸Chule nangman mipi ho jah-a, Jing nikho-a dingin nangma cheh kisutheng uvin, nanghon sa naneh dingu ahitai. Ajehchu nangho Pakai nakhanga nakapmun, kon keiho nehding sa eipeh diu ham? Egypt gama kaumu chun nom kasajouve, nati uve: hijeh-a chu Pakaiyin nangho sa napeh uva naneh diu ahitai.

¹⁹Nanghon nikhat jong hilou, nini jong hilou, ninga jong hilou, nisom jong hilou, chule nisomni hilou;

²⁰Ahinla lha lungkeija nanah hom sunguva ahungdoh-a, naloh-u asotokah seuva ding ahi. Ajeh chu nanghon nalah uva um Pakai chu nanotthap uvin, a-angsunga nakamun, Ipidinga Egypt gama kona ihung doh uham? nati uve, tin seipeh-in, ati.

²¹Chuin Mosi'n, Alah uva kaumna mipi, kenga lamjotthei cheh sangjagup hiuva; nangman, Amahon lhakhat lhungkeija aneh diuva sa kapeh ding ahi, tin naseije.

²²Anehkhop nadiuva kelngoihon le gancha honho chu kithapeh ding hiuvem? ahiloule anehkhop nadiuva twikhanglen'a nga jouse kimatkhom peh ding hiuvem? ati.

²³Chuin Pakaiyin Mosi jah-a, Pakai khut chu kisuchoma hitam? tu-a hi nangman kathusei nachunga aguilhun aguilhun lou namu ding ahi, ati.

²⁴Chuin Mosi apotdoh-in, mipi ho chu Pakai thu chu aseipeh-in, chule mipi lah-a upa somsagi ho chu akhomin, houbuh kimvella chun adinsah tai.

²⁵Chuin Pakai meilom'in ahung kumlhan, ajah-a thu aseijin, chule achunga um lhagao chu aladoh-in, upa somsagi ho apetan ahi. Chuin ahitin ahi, lhagao achunguva achuh phatnin, gaothu aseijun, atang tapouvin ahi.

²⁶Ahin mi ni chu gebuh-a umden ahin, khatpa minchu Eldan ahin, khat chu Medad ahi: chuin Lhagao chu achung lhona achun; amanihi amin kilakhom lah-a chu jao ahilhonin, houbuh-a potdoh lou ahilhone. Chuin amanin gebuh sunga gaothu aseilhon tan ahi.

²⁷Chuin gollhang khat ahunglhaijin, Mosi jah-a, Eldad le Medad-in gebuh sunga gaothu aseilhone, ahungtin ahi.

²⁸Chuin agollhangho lah-a khat, Mosi lhacha Nun chapa Joshua'n adonbutnin, kapu Mosi, amani khu phohthipmin, ati.

²⁹Chuin Mosi'n ajah-a, Keima jala namit thip ham? Pakai mite jouse themgao hiuhenlang, Pakaiyin achunguva alhagao koi tavele kati, ati.

³⁰Chuin Mosi le Israel upa hochu gebuh sunga aluttaovin ahi.

³¹Chuin Pakaiya konin hui ahung nungin, twikhanglen'a konin vamim ahinlhoh-in, gebuh kom, hilama kona nikhat lampi, khulama kona nikhat lampi tobang gei, gebuh kimvela, chule hichu leiset chunga kon tongni geija sangin alhahsah-in ahi.

³²Chuin mipi ho chu adingdoh-un, nilhum keile jan khovah-in, chule ajing nilhum keijin, vamim hochu aloh-un: alohlhom pen pan pocha som alohdoh-in; chule hicheho chu ama ama ding cheh-in gebuh kimvela chun thejaovun ahi.

³³Chuin ahakah uva sa chu aumnalaija, alhaigoi masangun, Pakai lunghanna chu mipi dounan ahung kongdoh tan, Pakaiyin mipi chunga chun hise nasatah achuhsah tan ahi.

³⁴Chule hiche mun'a chu sa-a lop miho avuitah jeh-un, hiche mun chu Kibroth-hatta-avah asahtai.

³⁵Chuin mipi chu Kibroth-hatta-avah'a konin Hazeroth jonin akitolun, Hazeroth'a gebuh asemtaovin ahi.