Read Thado Chin Minbu 12 Bible Online

Minbu 12 - Thado Chin bible

Minbu 12

¹Chuin Mosi'n Ethiopia numei khat akichenpi jeh-in Miriam le Aaron'in ama douna thu aseilhontan ahi: ajehchu aman Ethiopia numei khat ana kichenpin ahi.

²Chuin amanin, Tahbeh monga Pakaiyin Mosi'a kona bou thu aseiham? eini-a kona jong asei hilouham? atilhone. Chule hichu Pakaiyin ajatan ahi.

³(Tuhin Mosi kiti mipahi leiset chunga mijouse lah-a alungneng pen ahi).

⁴Chuin phulou helouvin Pakaiyin Mosi, Aaron, chule Miriam henga thu ahin seijin, Nangho thum houkhom ho houbuh lama hungun, ati. Chuin amaho ahung taovin ahi.

⁵Chuin Pakai chu meilhang khompin ahung kumlhan, houbuh kotna chun adingin, Aaron le Miriam chu ahin kouvin: chuin amani ahung potdoh lhonin ahi.

⁶Chuin aman, Tun kathu ngailhonin: nalah uva themgao auma ahile, keima Pakaiyin amachu gaova kakihetsah-a, chule manga akoma thu kasei ahi.

⁷ Ka-insung pumpi-a tahsan umtah, kalhacha Mosi chunga vang chutobang ahipoi.

⁸Ama hitoh kikam sanna, kicheh tah-a, thu ki-im beija kakihoupiji ahi; chule aman Pakai melso jong amu ahi; chuti ahile ibola kalhacha Mosi douna-a thusei ding kichalou nahi lhonham? ati.

⁹Chuin Pakai lunghanna chu amani dounan ahung koudoh-in; chuin adalhatan ahi.

¹⁰Chuin meilhang chu houbuh-a konin akihohdoh tan; veuvin, Miriam chu ahung phah-in, buhbang bangin abangtan: chuin Aaron'in Miriam chu aven, chuin veuvin, amanu aphah ahitai.

¹¹Chuin Aaron'in Mosi jah-a, Ohe, ka Pakai, nahenga katao ahi, ngolhoi tah-a kanachon lhona, kaboldoh lhon chonsetna, hiche chonsetna hi kachung lhona ngam loujenin.

¹²Mi anu sunga atipum akehkhat beisa-a hungpenga bangin, amanu hi athisa bangin umsah hih-in, ati.

¹³Chuin Mosi Pakai henga ataovin, Vo Pakai, nahenga katao ahi, amanu hi tun damsah-in, ati.

¹⁴ Chuin Pakaiyin Mosi jah-a, Amanuhi apan amaichanga achil asetkhuma ahile amanu nisagi sung jahchalou ding ham? gebuh-a konin nisagi kaidoh-unlang, hiche jou chule puilut hikit hen, ati.

¹⁵Chuin Miriam chu nisagi gebuh pama akoijun; Miriam ahung kipui lut kit kahsen mipi chu akitol tapouve.

¹⁶Hichejou mipi chu Hazeroth'a konin akichonun, Paran gamthipma chun ponbuh asong taove.