Read Thado Chin Minbu 13 Bible Online

Minbu 13 - Thado Chin bible

Minbu 13

¹Chuin Pakaiyin Mosi henga thu aseijin, hitin ati,

²Israel chate kanapeh, Canaan gam kholtoh dingin, apu apateu kailhah cheh-a mi khatcheh, alah uva vaipo khatcheh chu solin, ati.

³Chuin Mosi'n Pakai thupeh bang chun amaho chu Paran gamthipma konin asoltai. Hiche miho chu Israel chate aluchang ho ahiuvin ahi.

⁴Chule hichengsehi amaho min ahi: Reuben phunga Zaccur chapa Shammua.

⁵Simeon phunga, Hori chapa Shaphat.

⁶Judah phunga Jephunneh chapa Caleb.

⁷Issachar phunga, Joseph chapa Igal.

⁸Ephraim phunga, Nun chapa Oshea.

⁹Benjamin phunga, Raphu chapa Palti.

¹⁰Zebulun phunga, Sodi chapa Gaddiel.

¹¹Joseph phunga, tichu Manesseh phunga Susi chapa Gaddi.

¹²Dan phunga, Gemalli chapa Ammiel.

¹³Asher phunga, Michael chapa Sethur.

¹⁴Naphtali phunga, Vophsi chapa Nahbi.

¹⁵Gad phunga, Michi chapa Geuel ahi.

¹⁶Hiche hohi Mosi'n gam velhi dinga asol miho min chu ahi. Chuin Mosi'n Nun chapa Oshea chu Jehoshua tin asah-in ahi.

¹⁷Chuin Mosi'n amaho chu Canaan gam velhi dingin asolin, ahenguva hitin aseije, Lhanglam sanga kon khun chetouvun lang, molchunga khun kaldoh-un;

¹⁸Chule gavechenun agam chu itobang ham, chule asunga chengho chu hatnaovem ahiloule hatmovem, lhomuvem ahiloule tamuvem;

¹⁹Chule achennao gamchu itobang ham, pha-am ahiloule se-ham, achennao khopiho-a chu itobang khopi ho-a chenguva, pon in'a cheng hiuvem ahiloule kulpi-a cheng hiuvem;

²⁰Chule agam chu itobang gam ham, leipha ham ahiloule leiphalou ham, hichea chu thing umam ahiloule umhih-am gaveovin. Nangho hangsanun lang agamga hinpouvin. Hichelai phat tah chu lengpithei ga masapen minphat tah ahi.

²¹Chutichun amaho achetouvun, agam chu Zin gamthipma pat Hamath lutna Rehob geijin akhol taovin.

²²Chuin amaho lhanglama konin achetouvun, Anak chate ho Ahinam, Sheshai, chule Talmai umna mun Hebron ahung lhungun ahi. (Tun Hebron chu Egypt gama Zoan kisahdoh ma kum sagi masanga kisadoh ahitai.)

²³Chuin amaho Eshcol vachadung ahung lhungun, hichea konchun amahon lengpi theiboh khat aboh pumin asat lhaovin, minin moljolin ahinjong lhonin; chule kolbuthei ho le thei changho ahin pouvin ahi.

²⁴Hiche munna kona chu Israel chaten lengpiga boh asatlhah jeh-un, hiche mun chu Eshcol vachadung akisahtan ahi.

²⁵Chuin amahon gam chu agakhol toh-u nisomli jouvin ahung kilekit taovin ahi.

²⁶Chuin amaho acheuvin Mosi le Aaron henga, chule Kadesh mun'a um Paran gamthipma Israel chate houkhom ho jouse henga ahungun; chule amaho hengle houkhom ho jouse henga thu ahin pouvin, agamga jong chu amaho avetsah-un ahi.

²⁷Chule amahon ama henga, Keiho nangman neisolnao gama chu kacheuvin, tahbeh mongin agam chu khoiju le bongnoi lonna gam ahi; chule hiche hi agamga chu ahi.

²⁸Ahijeng vangin agama chengho chu mihat ahiuvin, akhopihou chu kulpi kikai khum ahin, chule aletna lenthei ahi; chukalvalin keihon chukoma chun Anak chateho kamuvin ahi.

²⁹Amalek miho chu lhanglama achengun; Hit miho, Jebus miho, chule Amor miho chu molsang ho-a achengun; chule Canaan miho chu twikhanglen pang le Jordan panga achengun ahi, atiuve.

³⁰Chuin Caleb min mipi ho chu Mosi angsunga chun aphoh thipmin, Eiho mangang tah-in cheu hitin, galo jengu hite; ajehchu eihon ijo teitei dingu ahi, ati.

³¹Ahivangin ama chekhom piho chun, Eiho amaho igajo lou dingu ahi; ajehchu amaho eiho sanga hatjo ahiuve, atiuve.

³²Amaho chun agakhol tohnao gamchung chang thudola chun Israel chate henga thulhut phalou ahin pouvin, Keiho kacheuva kaga kholtoh nao gam chu agama chengho negamhel thei gam ahin; chule chua kaga mu-u mijouse chu milen ngen ahiuve.

³³ Chule keihon chumuna chun milen tahtah ho, Anak chapate, milen tahtah ho chilhah-a kon hungpengho chu kagamuve: chule keiho mitmun keihochu khaokhopi bangbep kahiuvin, amaho mitmu-a jong chutobangma chu kahiuve, atiuvin ahi.