Read Thado Chin Minbu 14 Bible Online

Minbu 14 - Thado Chin bible

Minbu 14

¹Chuin houkhom ho jouse chun aw sangtah-in asamun, apengun; hiche janchun mipi chu akaptaovin,

²Chuin Israel chate jouse chu Mosi le Aaron chunga aphun taovin: houkhom pumpi chun ajah lhona, Pathen'in Egypt gama eina thisah-u hitavele! Ahiloule Pathen'in hiche gamthipma hi eina thisah-u hitavele!

³Chule ipi dinga Pakaiyin hiche gamahi chemjam'a lougam ding le, kaji kachateu hi gal anchah hiding bepma eipuilutnu hitam? eiho dinga Egypt gama kilekit phajo louding ham? atiuve.

⁴Chuin amaho khatle khat akihouvun, Eihon lamkai khat kilhenu hitin, Egypt gam lama kilekit tao hite, atiuve.

⁵Hichun Mosi le Aaron chu Israel chate houkhom kikhomho jouse angsunga chun abohkhup lhontan ahi.

⁶Chuin gam kholtoh-a cheloi lah-a pang Nun chapa Joshua le Jephunneh chapa Caleb chun aponsil lhon abot-eh lhonin:

⁷Israel chate houkhom ho jouse henga chun, Kholtoh dinga kachot lenao gamchu gampha tah mongmong ahi.

⁸Pakai ichunguva alunglhaina ahile hiche gama chu eipuilut nuva, khoiju le bongnoi lonna gam chu eipeh diu ahi.

⁹ Pakai dounan kiphinda poupou vunlang, chuche gam mite jong kicha hih-un; ajehchu amaho i-anchah dingu ahiuve: akihon bitnao chu amaho-a kona chedoh ahitan, chule eihovang Pakaiyin eiumpiuve: amaho chu kicha hih-un, tin aseilhonin ahi.

¹⁰Ahinla houkhom ho jouse chun songa sedingin agaotaovin ahi. Chuin Pakai loupina Israel chate jouse angsung, houkhom ho houbuh-a chun ahung kilahtan ahi.

¹¹Chuin Pakaiyin Mosi jah-a, Itihchan hiche mipi ho hin eilung hansah diuham? Chule alah uva melchihna hijatpi kamusah nunguva jong, itihchan eitahsan da diuham?

¹²Keiman amaho chu natsetna kajepma, kasuhmang ding; chule keiman nangma amaho sanga lenjole hatjo nam khatna kasemding nahi ati.

¹³ Chuin Mosi'n Pakai henga, Chuteng Egypt mihon hichehi ajah diu, (ajehchu nangman hiche mihohi nathahatna amaho lah-a kona nahinpuidoh ahi;)

¹⁴Chule amahon hiche gama cheng miho henga aseidiu ahi. Ajeh chu amahon, Pakai nangma hiche miho lah-a naum, Pakai nangma chu kimaito-a akimupiu, nameiloma achungu na-opkhum, chule amasanguva sunle meiloma nache-a, janle meikonga nacheji chu ajataovin ahi.

¹⁵Tun nangman hiche mite jousehi mikhat bangin that talechun, nangma minthan ja-a namho chun,

¹⁶Pakaiyin hiche mihohi ahahselna gama apuilut jou tahlou jeh-a, gamthipma athagam ahi atudiu ahi.

¹⁷Chule tun, nahenga katao ahi, ka Pakai thilboltheina chu loupi hen, nangman hitia nasei bangin,

¹⁸ Pakai chu thoh hattah, hepina lentah nei, khangitlouna le suhkhelna ngaidam ji, chule themona chu donlouva koilou, pate khangitlouna chate chunga khangthum khangli geija viljing nahi.

¹⁹Katao ahi, hiche mipi ho Egypt'a pat tuni geija nangaidam bangin, nahepina lentah dungjuijin hiche mipite khangitlouna hi ngaidamtan, ati.

²⁰Chuin Pakaiyin, nangma thu dungjuijin amaho hi kangaidam tai;

²¹ Ahinla keima tahbeh-a kahinjing bangin, leiset pumpihi Pakai loupina-a dimset ding ahi.

²²Ajehchu hiche mite Egypt gam le gamthip laija kaloupina le kathilbol kidang bolho mujouse, chule tu-a som veijen eipatepma, ka aw ngailou jouse hin;

²³Thonlou hela amahon apu apateo kahahselna gam chu amu louhel diu, chule eilung hansah jousen jong amulou diu ahi:

²⁴ Kalhacha Caleb vangin lunggel chom neija, eijui lhingset jeh-a, agachena gama chu kapuilutding, chule achilhah ten alodiu ahi.

²⁵(Tun Amalek miho le Canaan miho chu phaichama chun achengun ahi.) Jingle kiheijun lang, twipisan jotna lampia konin gamthipma lut taovin, ati.

²⁶Chuin Pakaiyin Mosi le Aaron henga thu aseijin, hitin ati,

²⁷Hiche houkhom gilouho keima douna aphun phun uhi itihchan kathoh ding ham? keima chunga Israel chate phunna hohi kajatan ahi.

²⁸Amaho chu seipeh-in, keima tahbeh-a kahinjing bangin tin Pakaiyin aseije, Nanghon kana benga nasei jouseu banga hi, nachung uva keiman kabolding ahi.

²⁹ Nalongu hiche gamthipma hi lhukam ding ahi: keima douna phunna, kum somni-a lhah chunglam, nami jatnu dungjuija nalah uva kona kisim doh jouse chu,

³⁰Jephunneh chapa Caleb le Nun chapa Joshua tailou, nangho chensahna dinga kahahselna gama chu khatcha nalutlou dingu ahi.

³¹Ahinla mi anchah ding bep natiu nachasen hou, amaho chu kapuilutna, nanghon nanot thapmu gam chu ahetdiu ahi.

³²Nangho thudol vang, nalongu hiche gamthipma hi lhuchap ding ahi.

³³ Chule nachateo chu gamthipma kum somli vahle leova, nalongu gamthipma hi abeihel kahse-a najon thanhoi naochu athoh diu ahi.

³⁴Gam nagakhol nao nikhojat dungjuija, nisomli ngeichu, nikho khat nakhangitlou naochu kumkhat nakipoh diu, kum somli sunga, chutengle keima hi aki pampai teng iti ji-am nahetdiu ahi.

³⁵Pakai Keima kaseidoh ahin, douna-a kikhom khom hiche houkhom gilouho jouse chunga hi katohdoh tahbeh ding ahi: hiche gamthipma hi mangthah uva, thigam ding ahiuve, ati.

³⁶Chuin Mosi'n gamkholtoh dinga asol miho, ahung kile kitnuva gamthudol akaleh-a thu ahinpoh jeh uva, houkhom ho jouse phunchel sahho,

³⁷Chule gam chunga thudola thulhut phalou hinpoho ngei chu, Pakai angsunga hisen athigam taovin ahi.

³⁸Ahinla gamkhol dinga cheho lah-a pang, Nun chapa Joshua le Jephunneh chapa Caleb vang ahing lhon nalaije.

³⁹Chuin Mosi'n hiche thukisei hohi Israel chate chu aseipeh tai: chuin mipi chu alung hem cheh taovin ahi.

⁴⁰Chuin jingpitah-in athoudoh un, molsang vuma akaldoh-un, Veuvin, eiho hikoma i-umuve, Pakaiyin eitep pehnao mun'a ichetou dingu ahi: ajehchu eiho ichonse taove, atiuve.

⁴¹Chuin Mosi'n ipi dinga Pakai thupeh napalkeh-u ham? Hiche nathil gonuhi lolhing louding ahi.

⁴²Namelma teu masanga tha-a naum louna dingun, chetou hih-un; ajehchu nalah uva Pakai aumtapoi.

⁴³Ajehchu Amalek mihole Canaan miho namasanguva aumun, achemjam muva nalou gamdiu ahi: ajehchu nangho Pakaiya kona kiheimang nahitaovin, hijeh-a chu Pakaiyin naumpi lou dingu ahi, ati.

⁴⁴Ahin amaho lhangvuma kaltou dingin akigotei teijun: ahivangin Pakai kitepna thingkhong le Mosi la gebuh-a konin akipatdoh pon ahi.

⁴⁵Chuphatnin Amalek miho le chucheng lhangvuma cheng Canaan miho chu ahungkum lhaovin, amaho chu athagtnun, Hormah geijin asatpeh-un ahi.