Read Thado Chin Minbu 15 Bible Online

Minbu 15 - Thado Chin bible

Minbu 15

¹Chuin Pakaiyin Mosi henga thu aseijin, hitin ati,

²Israel chate chu seipeh in lang, ajah uva hitin seijin, Keiman nangho kapeh, nachenna diu gam nalhun tengule,

³Ganhon ahiloule kelngoi honna kona Pakai henga gimnamtui dinga, Pakaiya dinga meija kitohdoh thilto govam thilto ham, kitepna guilhunsah ganlhaina ham, lungcham thilto ham, ahiloule nakut loupiho ham napeh tengule,

⁴Chutengleh Pakai henga thilto pedingpa chun anneh thilto-a dinga changbong neljet ephah hopsom-a hopkhat toh kihal thaotwi hin khat hoplia hopkhat ahinchoi ding;

⁵Chule donding thilto lah-a lengpitwi hin khat hoplia hopkhat chu govam thilto ham, ganlhaina ham toh kelngoinou khatna dinga nagon ding ahi.

⁶Ahiloule kelngoichal khat dinga, nangman changbon neljet hopsom-a hopni, thaotwi hin khat hopthum-a hopkhat toh kihal anneh thilto nagon ding ahi.

⁷Chule donding thilto dinga chu lengpitwi hin khat hopthum-a hopkhat Pakaiya henga gimnamtui tah hidinga nato ding ahi.

⁸Chule govam thilto dinga bongchal nagon tengle, ahiloule kitepna suhbulhit na dinga ganlhaina ham, ahiloule Pakai henga chamna thilto ham nagon tengle;

⁹Chutengle nangman thaotwi hin keh khat toh kihal changbong nelsel hopsom-a hopthum, bongchal tochun anneh thilto ding nahin kaiding ahi.

¹⁰Chule donding thilto-a lengpitwi hin keh khat, Pakai henga gimnamtui tah hidinga meija kitohdoh thilto nahinchoi ding ahi.

¹¹Hitia chu bongchal khat ham, ahiloule kelngoichal khat ham, kelngoinou khat ham, ahiloule kelnou khat hama dinga nabol ding ahi.

¹²Nagondiu jat dungjuija, amitakip henga ajatnu dungjuija naboldiu ahi.

¹³Chule agama peng jouse chun, Pakai henga gamnamtui tah hidinga meija thilto apeh tengule hitia hi aboldiu ahi.

¹⁴Chule namdang mi nangho toh akholjin khoma, ahiloule nakhang khanguva nalah uva khosaden chan chun, Pakai henga dinga gimnamtui thilto meija kitohdoh thilto apeh noma ahile, nangho bolbang banga aman jong abolding ahi.

¹⁵Chule nangho houkhom ho le namdang mi nalah uva khopem hon pomding chondan khat naneidiu, nakhang khanguva a-itih-a chondan khatbou nanei dingu ahi: namdang miho chu Pakai anga nangho bang bang hidingu ahi.

¹⁶ Nangho le nalah uva khopem namdang miho-a dinga dan khatseh le chonna dan khatseh umding ahi.

¹⁷Chuin Pakaiyin Mosi henga thu aseijin, hitin ati,

¹⁸Israel chate henga thu seijin lang, ajah uva seipeh-in, Nangho keiman kapuilut na ding gama chu nalhun tengule,

¹⁹Chutengle hitiding ahi, nanghon agam changlhah naneh tengule, Pakai henga jap thilto nato dingu ahi.

²⁰Nachanglhah meh masapenu chu jap thilto-a natodiu: changphola jap thilto nabol banguva chutia chu nabol dingu ahi.

²¹Nakhang khanguva nachanglhah mehmasa penu chu Pakai henga jap thilto-a nato dingu ahi.

²²Chule Pakaiyin Mosi henga anasei hiche thupeh jouse hi nasuhkhel uva, nanit lou uva ahile,

²³Pakaiyin Mosi ana thupeh ni-a kipat amasanglam nakhang lhungkeijuva Pakaiyin Mosi khutna kona nangho nathupeh jouse geija chu;

²⁴Chutengle hung hitiding ahi, houkhom ho hetlouva hetlou jeh-a suhkhel ahile, houkhom ho jousen bongchal golkhat Pakai henga gam namtuitah hidinga govam thilto-a ding, a-anneh thilto le adonding thilto toh dan dungjuija atotha diu, chule chonset thilto-a dinga kelnou khat atodiu ahi.

²⁵Chule thempupa chun Israel chate houkhom ho jouse dinga longlhenna abolding, hetlouva kibol ahijeh-a kingaidam ding ahiuve. Chule ahetlou jeh uva Pakai henga meija kitohdoh ganlhaina thilto ahinchoi uva, Pakai henga achonsetnao thilto ahinchoi dingu ahi.

²⁶Chule Israel chate houkhom ho jouse le amaho lah-a khopem namdang mipi jouse chu kingaidam ding ahiuve; ajehchu mijouse chun ahetlouvu ahi.

²⁷ Chule mikhat tou hetlou jeh-a achonsetna ahile, amachun kelcha anu kumkhat lhingbep khat chonset thilto-a dinga ahinchoi ding ahi.

²⁸Chutengle thempupa chun hetlou jeh-a chonsepa dinga chu longlhenna abolding ahi, chule aman Pakai anga hetlou jeh-a chonset abola alonglhena abol tengle amachu kingaidam ding ahi.

²⁹Nanghon Israel chate lah-a peng hihen, nalah uva hung khopem namdang mi hijongle, hetlou jeh-a chonset bolpa dinga dan khat nanei dingu ahi.

³⁰Ahivangin henasa-a bolpa chu, gamsunga penga hihen lang, namdang mi hijongle, amachun Pakai i-sah louva abol ahin; amachu amite lah-a kona kipaimang ding ahi.

³¹Ajehchu aman Pakai thu chu anot thapma, athupeh apalkeh ahin, hichepa chu paimanga umding ahi; akhangit louna chu ama chunga chuding ahi.

³²Chule Israel chate gamthipma aumpetnun, choldo ni-a thingkang chom mikhat amutaovin ahi.

³³Chuin thingkang chom muho chun amachu Mosi le Aaron chule houkhom ho jouse henga ahin puitaovin ahi.

³⁴Chuin iloding akiphondoh loulai jeh-in, amachu mihen na-a akoi taove.

³⁵Chuin Pakaiyin Mosi jah-a, Mipa chu thatei ding ahi: houkhom ho jousen gebuh polama songa asediu ahi, ati.

³⁶Chuin mipi chun Pakaiyin Mosi athupeh bangin amachu gebuh pama ahin puidoh-un, songa aseplih taovin ahi.

³⁷Chuin Pakaiyin Mosi henga thu aseijin, hitin ati,

³⁸ Israel chate jah-a chun akhang khanguva apon geihou ajeppah nadiu le, agei ajep pahnao chunga chu adumpol aba diuvin seipeh-in,

³⁹Chule nanghon najeppah nao chu nangho dinga, hichu navet nuva, Pakai thupeh jouse chu nageldoh uva nabol nadiu hidin: chule jonthanhoi boldinga anung najuijiu nalung ngaichatnu le namit vetnu chu najuilou nadiu ahi.

⁴⁰Chutia chu kathupeh jouse nageldoh uva, nabol uva, na Pathen'u dinga atheng nahinadiu ahi.

⁴¹Keima Pakai na Pathen'u kahin, na Pathen'u hidinga Egypt gama kona nahin puidohpao chu kahi: keima Pakai na Pathen'u kahi.