Read Thado Chin Minbu 16 Bible Online

Minbu 16 - Thado Chin bible

Minbu 16

¹ Tun Izhar chapa, Kohath chapa, Levi chapa Korah le Reuben chapate Eliab chapa teni Dathan le Abiram, chule Peleth chapa On chun miho apuijun,

²Chuin houkhom ho sunga um loupileh, minche cheh akikhom khomho pipui jani le somnga le Israel chate phabep toh Mosi maija adingdoh-un,

³Chuin amaho Mosi le Aaron dounan akikhomun, aheng lhona, Houkhom ho jouse, amitakip athengun alah uva Pakai aume ti hena sasan nakibolthei sah behseh lhone. Ibola Pakai houkhom ho chung vuma kidomsang jeng nahi lhonham? atiuve.

⁴Chuin Mosi'n hichu ajah phatnin, tolla aboh khupmin:

⁵Korah le aloiho jouse jah-a chun aseijin, hitin ati, Jingkah le Pakaiyin koi chu ama-a hija, koi chu atheng hijaham avetsah-a; chule amachu aheng anailut sah ding ahi: chule ama alhenpa tah ngeichu akinailut sah ding ahi.

⁶Hiche hi bolun: Korah le aloiho jousen gimnamtui lheng ho kilah-un;

⁷Chule Asunga chun mei hallun lang, jingteng Pakai angsunga asunga chun gimnamtui koijun; chule hitiding ahi, Pakaiyin alhen amapa chu atheng hiding ahi. Nangho Levi chate, nakibolthei sah behseh taovin ahi.

⁸Chuin Mosi'n Korah jah-a, Ngaijun, katao ahi, nangho Levi chapate;

⁹Ama henga puinaja, Pakai houbuh lhachana tongding le, houkhom ho masanga akinthengu bol dinga ding dinga Israelte Pathen'in Israel houkhom ho-a kona nachomkhenu hi nangho dinga thil neocha bou hia nagelu ham?

¹⁰Chule aman nangma le nasopi ho Levi chapate jouse ama henga napuinai taove: achutile nanghon themputna jong nahol nahlaiju ham?

¹¹Hijeh chun nangma le naloiho jouse Pakai dounan nakikhom khomun: ahi. Aaron chu ipi hija ama douna-a naphunu ham? ati.

¹²Chuin Mosi'n Eliah chatehi Dathan le Abiram koudin mi asolin ahile, amanin, hungtou lhon ponge:

¹³Khoiju le bongnoi lonna gama kona gamthipma thadinga neihin puidoh-u hi thilneocha hija, kachunguva naki piput sah ham?

¹⁴Chukal vallin nangman khoiju le bongnoi lonna gama neipuilut pouvin, ahiloule lou le lengpilei la neilosah deh pouve: hicheng miho jouse mit hi kaldoh nagot ham? kahung tou lhon louding ahi, ati lhontan ahi.

¹⁵Chuin Mosi alung ahang lheh jengtan, Pakai henga, Athil toujong sanghih-in; keiman amaho-a konin sangan khatjong kalapon, amaho khatcha jong kasuna pon ahi, ati.

¹⁶Chuin Mosi'n Korah jah-a, Nangma le naloiho jouse, nangma le amahose chu Aaron toh jingle Pakai angsunga naum diu ahi:

¹⁷Chule amitakipmin nagimnamtui lheng cheh kilah unlang, asunga gimnamtui koijun, chule amitakipmin nagimnamtui lheng cheh-u gimnamtui lhengcheh-u, jani le somnga chu Pakai anga hinchoijun; nangma le Aaron'in jong nagimnamtui lheng cheh nakichoi lhonding ahi, ati.

¹⁸Chuin amitakip min agimnamtui lheng cheh akilah-un, asunga mei akoijun, achunga gimnamtui akoijun, houkhom ho houbuh kotphunga chun Mosi le Aaron toh ading khom taovin ahi.

¹⁹Chuin Korah chun amaho dounan houkhom ho jouse houkhom na ponbuh kotphunga akhomin ahi: chuin Pakai loupina chu houkhom ho jouse henga ahung kilah tan ahi.

²⁰Chuin Pakaiyin Mosi le Aaron jah-a thu aseijin, hitin ati,

²¹Hetmanlouva amaho kasuhmang theina dingin, hiche houkhom ho-a konin kikhindal lhonin ati.

²²Chuin amani abohkhup lhonin, Vo Pathen, tahsa jouse lhagao ho Pathen, mikhat chonset jeh-a houkhom ho jouse chunga lunghang ding nahi hitam? atilhon tan ahi.

²³Chuin Pakaiyin Mosi jah-a aseijin,

²⁴Houkhom ho jah-a chun, Korah, Dathan chule Abiram houbuh-a konin kikhin doh-un tin seijin ati.

²⁵Chuin Mosi akipatdoh-in Dathan le Abiram henga achen; chule Israel upahon anung ajuijun ahi.

²⁶Chuin aman houkhom ho jah-a, Naheng uva katao ahi, hiche miphalou ho ponbuh ho-a konin kikhin doh-un, chule a-imachao tongkha hih-un, achuti loule achonsetnao jouse-a mangthah getnun nate, ati.

²⁷Chutichun amaho Korah, Dathan chule Abiram houbuh ningtina konin akipat doh-un ahi. Chuin Dathan le Abiram ahungdoh lhonin, aponbuh-u kotphunga chun ajiteu, achateu, chule achasen houtoh ading taovin ahi.

²⁸Chuin Mosi'n hichea kona hi Pakaiyin keima hicheng na jouse tong dinga eisol ahi nahet dingu ahi; ajeh chu keiman hiche hohi kalung chama kabol ahipoi.

²⁹Hiche miho hi mijouse thi ngaija athiuva, ahiloule miho kivil banga akiviluva ahile, Pakaiyin eihin sol hilou ding ahi.

³⁰Ahinla Pakaiyin thilthah abola, leiset akam katna, amaho hi aneijouseu toh aval lhuma, chule kotong sunga gangtah-a alhah lhumuva ahile; hiche miho hin Pakai alung hansah uve ti nahet chet dingu ahi, ati.

³¹Chuin ahitin ahi, aman hicheng thuhi aseijou jouvin, anoijuva leiset chu ahung keh-in akikhen totan ahi.

³²Chuin Leisetnin akam ahin kathom sah-in, amaho le a-inhou, chule Korah loiho jouse le athilkeo jouseu chu aval lhumtan ahi.

³³Amahole aneijouseu ahingin kokhuh sunga chun alhalutnun, chule achunguva leiset akichin; amaho houkhom ho lah-a konin amangthah taovin ahi.

³⁴Chuin avela um Israel ho chu amaho pen gin chun ajam gamtaovin ahi. Ajehchu amahon, Eiho jong leijin eival lhum getnunte atiu ahi.

³⁵Chuin Pakaiya konin meikong ahungdoh-in, gimnamtui hal mi jani le somnga chu akavamtan ahi.

³⁶Chuin Pakaiyin Mosi jah-a aseijin, hitin ati,

³⁷Aaron thempu pa chapa Eleazar jah-a, gimnamtui lhengho chu meikong lah-a kona ladoh nadin seipeh-in, ajehchu hicheho chu atheng ahi; chule meichu gamlha thim tah-a thaijah-in.

³⁸Amaho hinna douna-a chonseteho gimnamtui lheng ho chu maicham khuna kongdalin semuhen; ajehchu amahon Pakai anga ato-u ahin, hijeh-a chu hicheho chu thenga ahi. Chule hicheho chu Israel chate dinga melchhihna hiding ahi, ati.

³⁹Chuin Eleazar thempupan meikavam hon thiltona amanu sum-eng gimnamtui lheng ho chu alan, hiche ho chu maicham khuna kongdalin asemin;

⁴⁰Hichu Aaron chilhah hilou namdang mi koimachan Pakai angsunga gimnamtui hal dinga ahung nai louna diu; Pakaiyin Mosi khutna kona ahenga aseibanga, Korah le aloiho abah louna diuva, Israel chate dinga hetjingna hiding ahi.

⁴¹Ahivangin ajingin Israel chate houkhom ho jouse chu Mosi douna le Aaron dounan aphunuvin, Nangman Pakai miho nathatne atiuvin ahi.

⁴²Chuin ahitin ahi, houkhom ho chu Mosi le Aaron douna-a akikhop petnun, houkhom ho houbuh lam chu aveovin ahile: veuvin, hichu meilom'in atomin, chule Pakai loupi chu ahung kilah-in ahi.

⁴³Chuin Mosi le Aaron chu houkhom ho houbuh maija chun ahung lhonin ahi.

⁴⁴Chuin Pakaiyin Mosi jah-a thu aseijin,

⁴⁵Amaho chu hetmanlouva kasuhmang thei nadin, hiche houkhom ho lah-a konhin hung doh-in, ati, chuin amaho chu abohkhup gam taovin ahi.

⁴⁶Chuin Mosi'n Aaron jah-a, Gimnamtui lheng kilah-inlang, asunga chun maichama kon mei koilutnin, chule gimnamtui hal loijin lang, mangang tah-in houkhom ho henga chenlang, amaho dingin longlhenna gabolin: ajehchu Pakaiya konin lunghanna ahungdoh tan, hise akipantan ahi, ati.

⁴⁷Chuin Aaron'in Mosi'n athupeh bangchun alan, houkhom ho lah-a alhailuttai; chule veuvin, mipi ho lah-a chun hise chu anakipantan ahi. Chuin aman gimnamtui ahalin, mipi ho dinga chun longlhenna aboltan ahi.

⁴⁸Chuin ama athiho le ahingho kikah achun adingin ahile, hise chu atangtan ahi.

⁴⁹Tun Korah chungchang thua thiho tilouvin, hise-a thichu sangsom le sangli le jasagi ahi.

⁵⁰Chuin Aaron chu houkhom ho houbuh kotphung lama Mosi henga akiletan: chule hise chu atangtan ahi.