Read Thado Chin Minbu 17 Bible Online

Minbu 17 - Thado Chin bible

Minbu 17

¹Chuin Pakaiyin Mosi jah-a thu aseijin, hitin ati,

²Israel chate jah-a seijin lang, apu apateu insung kailhah mikhat cheh-a kon tenggol khatcheh, apipuhou jouse apu apateo insung kailhah cheh-a kon tenggol somleni lan lang; chule nangman amitakip min chu atenggol chung cheh uva chun sunnin.

³Chule nangman Aaron min chu Levi tenggol chunga nasutding ahi; ajeh chu tenggol khat cheh chu apateo insung luchang cheh-a ding ahi.

⁴Chule nangman hiche ho chu nangma kakimupina houkhom ho houbuh sung hettohsahna maija chu nakoi ding ahi.

⁵Chule hung hitiding ahi, keiman kalhen pen tenggol chu hungpah ding ahi: chutengle Israel chate aphun nao, nangni douna-a aphunao chu keija kona kasuh tang ding ahi, ati.

⁶Chuin Mosi'n Israel chate henga chun aseijin ahile, pipuho chu aman tenggol khatcheh apeuvin, apu apateo insung dungjuijin tenggol somleni apeuvin ahi. Chule Aaron tenggol chu amaho-a tenggol lah-a chun aumin ahi.

⁷Chuin Mosi'n hettohsahna houkhom ho houbuh sunga Pakai anga chun tenggol ho chu akoitan ahi.

⁸ Chuin ahitin ahi, ajingin Mosi hettohsahna houbuh sunga chun alutnin ahile, veuvin, Levi insung dinga Aaron tenggol chu anadonin, amumdoh-in, chule ahungpah-in, jonmot anagan ahi.

⁹Chuin Mosi'n tenggol ho chu Pakai angsunga konin Israel chate henga ahinpodoh-in; chule amahon aveovin, amitakipmin atenggol cheh akilah taovin ahi.

¹⁰Chuin Pakaiyin Mosi jah-a, Aaron tenggol chu akiphinho hetna-a hettohsahna maija koidin hinlechoi kitnin; chutengle amaho keima douna-a aphunchel naova athilou nadinguva nasuhthip ding ahi, ati.

¹¹Chuin Mosi'n hiti chun abolin, Pakaiyin thu apeh bang chun aboltan ahi.

¹²Chuin Israel chaten Mosi jah-a, Ven, keiho kathigamun, kamang thah-un, kamanthah gamhelu ahitai.

¹³Koi hijongle Pakai houbuh hinnai jouse chu thiding ahi: thina-a chu imanthah dingu hitam? atiuve.