Read Thado Chin Minbu 18 Bible Online

Minbu 18 - Thado Chin bible

Minbu 18

¹Pakaiyin Aaron jah-a, Nangma le nachapa, chule napu napateu insungin munthenga khangitlouna chu napohdiu, chule nangma le nachapate nangma toh na themputnao khangitlouna chu napohdiu ahi.

²Chule Nangma le nachapaten hettohsahna houbuh maija lhachana natoh naova nakithopi theina dinguvin, Levi phunga nasopi ho, napa phungmi hochu hin kipuijin.

³Chule amahon nangma natoh ding le houbuh natohding jouse chu avetup dingu ahi: amaho ahia nangma nahi-a jong nathilou na dinguva munthenga bel hole maicham bou chu ahin nailou dingu ahi.

⁴Chule amahon nangma nakitho piuva, houkhom ho houbuh natoh le houbuh lhacha natoh jouse atohdiu: chule namdang min vang nahinnai louding ahi.

⁵Chutia chu Israel chate chunga lunghanna aumbe louna dinga, nangman muntheng natoh le maicham natoh chu natoh ding ahi.

⁶Chule keima, ven, keiman nasopi ho Levi chate chu Israel chate lah-a konin kalheng doh-in; houkhom ho houbuh-a natong dingin Pakai dinga thilpeh khat bangin nangma nakipe taove.

⁷Hijeh chun nangma le nangma to umkhom nachapaten maicham le pondal sunglam thua thempu tohmuna na natoh diu ahi: nathempu tohmun natohhi nalhacha natohdiu thilpeh-a kapeh-u nahiuve: namdang mi ahin naija chu thiding ahi, ati.

⁸Chuin Pakaiyin Aaron jah-a, Ven, keiman jap thilto, Israel chaten thiltheng jouse chu nangma mopohna jong kapen; hicheho jouse chu thaokinu ahijeh-a nangma le nachapate a-itih-a chondan khat hidinga kapeh nahi.

⁹Hiche hi meija kona amoh, nanga dinga thiltheng chungnung ho chu ahi: athil tohou jouse anneh thilto jouse, achonset thiltou jouse, asuhkhel thiltou jouse-a keima eipehdiu jouse chu nangma le nachapate dinga theng chungnung hiding ahi.

¹⁰Muntheng chungnunga chu nangman nanehding; pasal takipmin anehdingu ahi: hichu nangma dinga atheng hiding ahi.

¹¹Hichehi nanga ding ahi; Israel chaten dopkhang thilto dinga athilto hou, ajap thilto hou jouse toh, nangma le nangma toh umkhom nachapate le nachanute henga a-itih-a chondan hidinga kapeh nahiuve: na-insunga atheng tapouvin hichu aneh dingu ahi.

¹²Thao apha pentah le, lengpitwi apha pentah, chule suhlou chang, aga masapen ho Pakai henga apehdingu hou jouse chu nangma kapeh nahi.

¹³Chule Pakai henga ahin choi dingu gamsunga amin masapen chan chu nanga ding ahin; na-insunga atheng takipmin hichu aneh dingu ahi.

¹⁴ Israel gamsunga thilto jouse nanga hiding ahi.

¹⁵Pakai henga apeh-u, tipum jouse-a naobu phukeh masa chan chu mihem hihen gancha hile nanga hiding ahi: ahivanga cha masapen chu nalhatdoh teiding ahin, chule gancha thenglou apeng masapen ho chu nalhat doh ding ahi.

¹⁶Chule lhakhat ahia patna alhatdohna ding ho chu nalhatdoh ding, alhatna man nangma gon dungjuija, muntheng shekel dungjuija shekel chu gerah somni ahin, shekel nga-a nalhat ding ahi.

¹⁷Ahivangin bongnou masapen, kelngoi masapen le kelcha masapen chu nalhatdoh louding ahi; amaho atheng ahiuve: athisanu chu maicham chunga nathe-a, athao chu Pakai henga gimnamtui tah hidinga meija kitoh thilto dinga nagoding ahi.

¹⁸Chule a-om kijap le adah jetlam nanga ahibanga, atipum chu nangma ding ahi.

¹⁹Israel chaten Pakai henga lhuh thilto apeh-u thil thengho jouse chu, nangma le nangma toh umkhom nachapate le nachanute henga a-itih-a chondan hidinga kapeh nahiuve. Hiche hi Pakai anga a-imatih chana dinga nangma le nachilhahte henga chi-a kitepna hiding ahi.

²⁰Chuin Pakaiyin Aaron henga thu aseijin, ajah-a, Nangman amaho gamsunga gou naneilou ding, chule alah uva chan jong naneilou ding ahi: Keimahi Israel chate lah-a nagou le nachan chu kahi.

²¹ Chule ven, keiman Levi chate chu Israel gamsunga hopsom jouse chu, atoh-u lhacha natoh, houkhom ho houbuh-a alhacha natoh-u jehtah chun agoulo diuvin kapen ahi.

²²Tua patna Israel chaten chonset apoh uva athilouna dinguva, houkhom ho houbuh aga nailou dingu ahi.

²³Amavang Levi ho chun houkhom ho houbuh lhachana atoh uva, athemo nao chu apohdiu ahi. Hichehi a-itih-a nakhang lhum keijuva dinga chondan hiding, chutia chu Israel chate lah-a goulo naneilou diu ahi.

²⁴Amavang Israel chaten Pakai henga lhuh thilpeh-a apeh-u ahopsom hou chu Levi hon gouva alodiuva kapeh ahitai; hijeh-a chu keiman ajah uva, Israel chate lah-a amahon goulo aneilou diu ahi, kati ahi.

²⁵Chuin Pakaiyin Mosi jah-a aseijin, hitin ati,

²⁶Nangman Levi ho kihoupin lang, ajah uva, Nanghon Israel chate hopsom, keiman nagoulo diuva kapeh chu amaho-a kon nalah tengule, hopsom-a hop khat ngeichu Pakai dinga lhuh thilto-a napehdiu ahi, ati.

²⁷Chule hiche nalhuh thilto hou chu pholla chang leh lengpi chilhahna-a pum dimset banga kisimding ahi.

²⁸Hita chu Israel chate hopsom nalah jouse chu Pakai henga lhuh thilto-a nato diu; chule chuche Pakaiya lhuh thilto chu Aaron thempupa napeh diu ahi.

²⁹Nathilto hou jouse lah-a kon aphapen le, atheng chengse chu Pakai henga lhuh thilto-a nato teidiu ahi.

³⁰Hiche jeh-a chu nangman amaho jah-a hitia nasei ding ahi, Nanghon aphapen ho nalhuhdoh tenguleh Levi ho dinga hiche hi changphol le lengpitwi kiheh na-a kona agasoh-a kisim ding ahi.

³¹Chule hiche hi nangma le na-insung miten mun jouse-a naneh thei dingu ahi: ajeh chu hichehi houkhom houbuh-a nalhacha natoh manuva kipe tohman ahi.

³²Chule hichea kona aphapen nalhuh tengule, hiche jeh-a chu nanghon chonset napoh loudiu: chule nathi louna dinguva Israel chateho thiltheng jouse chu nasuhboh theilou dingu ahi.