Read Thado Chin Minbu 19 Bible Online

Minbu 19 - Thado Chin bible

Minbu 19

¹Chuin Pakaiyin Mosi le Aaron jah-a aseijin, hitin ati.

²Hichehi Pakai thupeh chona danthu ahin, Israel chate henga chun bongla asan, pol lou, achunga nolna beihel, achunga namkoljon kibut khalou, nahin kaipeh nadiuvin seijin.

³Chule hiche chu Eleazar thempupan gebuh pama ahin kaidoh dinga napeh ding, chule mikhatnin a-angsung laitah-a atha ding ahi.

⁴Chutengle Eleazar thempupa chun athisan chu akhutjunga alah-a, houkhom ho houbuh masanga sagivei atheding ahi.

⁵Chule khatnin ama mitmu-a bongla chu agoding; avunjong, atipum jong, athijong chule a-eh jong ahalding;

⁶Chutengle thempu chun Cedar thing le hyssop chule asandup alah-a, bongla kigona meikong lah-a chu aselut ding ahi.

⁷Chule thempu chun aponho akisopma, atahsa twija akisil ding, chujoule gebuh-a hunglut ding, chule thempupa chu nilhah geija thenglou ding ahi.

⁸Hitia bongla gou penpen chu twija avon asopma, amajong twija kisilding, chule nilhah geija thenglou ding ahi.

⁹ Chule mitheng khatnin bongla kigona vutvam chu alokhoma, gebuh pam muntheng lai khatna akoiding, chule Israel chate houkhom ho-a dinga kisekhena twija mandinga koiding ahi: hichu chonset suhtheng na hiding ahi.

¹⁰Chule bongla kigona vutvam lohkhompa chun avon asopma, nilhah geija atheng louva umding ahi: chule hichu Israel chate le alah uva namdang akholjin khompiu ho-a dinga a-itih-a dinga dan hiding ahi.

¹¹Koi hile thilong tongkha-a chu nisagi thenglouva umding ahi.

¹²Chule hiche twija chu anithum nile kisuthenga, anisagi nile amachu thengding ahi; ahin ama anithum nile akisuhtheng louva ahile, anisagi lhinni jongle thenglou ding ahi.

¹³Mi khattou mithi long tongkha-a, chule kisutheng louchun, Pakai houbuh asuhboh ahin; amachu Israel chate lah-a kona kipaimang ding ahi. Ajeh chu achunga kise khenna twi akithe khumpon, ama chu athenglou hiding; athenlouna chu achunga umnalai ahi.

¹⁴Hichehi mikhat pon in'a athi tenga dan ding chu ahi: pon in sunga hunglutho jouse le, pon in sunga um jouse chu nisagi thenglou diu ahi.

¹⁵Chule asunga um kong le bel asin umlouva kihong jouse chu athenglou hiding ahi.

¹⁶Chule koi hijongle tol lhanga chemjam'a kithat, ahiloule mithilong, ahiloule mithigu, ahiloule lhankhuh tongkha-a chu nisagi athenglou hiding ahi.

¹⁷Chule hiche athengloupa dinga chu amahon chonset thensona bongla kigona vutvam hochu alahdiu, chule twi longlai toh kongsunga ahaldiu,

¹⁸Chutengle mitheng khatnin hyssop alah-a, twija chu adelutna, ponbuh chung le kongho chung jouse le mi aumho chung jouse-a, migu, ahiloule akithat, ahiloule mithi, ahiloule lhankhuh tongkhapa chu athinkhum ding:

¹⁹Chule mithengpa chun athengloupa chu anithum channi, chule anisagi channile athin khum ding ahi: chule anisagi channi le amajong kisuthenga, avon asopma, atahsa twija kisilngim ding, chule nilhah lam lebou thengding ahi.

²⁰Ahin mi athenglou, ama le ama kisutheng lou chu, houkhom ho lah-a kona kipaimang ding ahi; ajehchu mipa chu Pakai muntheng asuhboh ahi: achunga kisekhena twi akithin khumlou ahin; amachu athenglou ahi.

²¹Chule hichu amaho dinga a-imatih channa dinga chondan hiding ahi. Chule kisekhena twi chapma pangpen pen chun apon akisop ding; chule kisekhena twi tongkha penpen chu anilhah geija aboh-a umding ahi.

²²Chule ipi hijongle atheng loupan athamkhah tapou chu aboh hiding ahin; chule chuche thil tongkha pa chu nilhah geija bohding ahi.