Read Thado Chin Minbu 2 Bible Online

Minbu 2 - Thado Chin bible

Minbu 2

¹Chuin Pakaiyin Mosi le Aaron jah-a thu aseijin, hitin ati,

²Israel chate jouse chun apu apateu insung melchihna kom, aponlap kom cheh uva pon in akison cheh dingu; amahon houkhom ho houbuh-a kona gamlatah-a pon in chu akison dingu ahi.

³Chule nisa hung sodoh na solam sanga chu ajanelu kihop khen dungjuija Judah le ajanel hon gebuh ason dingu ahi: chule Amminadab chapa Nahshon chu Judah chate chunga gal lamkai hiding ahin,

⁴Chule ami janel, ajatnu kisimdoh chengse chu sangsomsagi le sangli toh jagup ahi.

⁵Chule ama banna gebuh kison dinga chu Issachar phung hiding: chule Zuar chapa Nethanel chu Issachar chate chunga gal lamkaija pangding ahi.

⁶Chule ami janel, ajatnu kisimdoh chengse chu sangsomnga le sangli toh jali ahi.

⁷Chujoule Zebulun phung hintin: chule Helon chapa Eliab chu Zebulun chate chunga gal lamkaija pang ding ahi.

⁸Chule ami janel, jatnu kisimdoh chengse chu sangsomsagi le sangli toh jali ahi.

⁹Chule Judah gebuh-a kisimdoh chengse chu, sangjakhat le sangsomget le sanggup toh jali ahi. Amahohi kipatdoh masadiu ahi.

¹⁰Chule noilam sanga chu ajanelu kihop khen dungjuija Reuben le ajanel hon gebuh ason dingu ahi: chule Shedeur chapa Elizur chu Reuben chate chunga gal lamkai hiding ahi.

¹¹Chule ami janel, ajatnu kisimdoh chengse chu sangsomli le sanggup toh janga ahi.

¹²Chule ama koma gebuh kisonho chu Simeon phung hiding ahi: chule Zurishaddai chapa Shelumiel chu Simeon chate chunga gal lamkai hiding ahi.

¹³Chule ami janel, ajatnu kisimdoh chengse chu sangsomnga le sangko toh jathum ahi.

¹⁴Chubanna chu Gad phung hiding: chule Deuel chapa Eliasaph chu Gad chate chunga gal lamkai hiding ahi.

¹⁵Chule ami janel, ajatnu kisimdoh chengse chu sangsomli le sanga toh jagup le somnga ahi.

¹⁶Chule Reuben gebuh sunga kisimdoh chengse chu sangjakhat le sangsomnga le sangkhat toh jali le somnga ahi, chule amaho chu agolni chana kipatdoh dingu ahi.

¹⁷Chuteng houkhom ho houbuh chu gebuh lailunga Levi ho gebuh chutoh kitoldoh thading; amitakip amun cheh-a aponlap-u dungjuija, aponbuh-u ason bang banguva chu kitol dingu ahi.

¹⁸Chule lhumlam sanga chu ajanelu kihop khen dungjuija Reuben le ajanel hon gebuh ason dingu ahi: chule Ephraim chate chunga gal lamkai ding chu Ammihud chapa Elishama hiding ahi.

¹⁹Chule ami janel, ajatnu kisimdoh chengse chu sangsomli le janga ahi.

²⁰Chule akoma chu Manasseh phung hiding: chule Pedahzur chapa Gamaliel chu Manasseh chate chunga gal lamkai hiding ahi.

²¹Chule ami janel, ajatnu kisimdoh chengse chu sangsomthum le sangni toh jani ahi.

²²Chubanna chun Benjamin phung hintin: chule Gedeoni chapa Abidan chu Benjamin chate chunga gal lamkai hiding ahi.

²³Chule ami janel, ajatnu kisimdoh chengse chu sangsomthum le sangnga toh jali ahi.

²⁴Chule Ephraim gebuh sunga kisimdoh chengse chu sangjakhat toh sangget toh jakhat ahi. Chule amaho chu malam no-a agolthum channa-a chedingu ahi.

²⁵Chule Dan le ajanel ho gebuh chu ajanelu kihop khen dungjuija sahlam sanga umding ahi: chule Ammishaddai chapa Ahiezer chu Dan chate chunga gal lamkai hiding ahi.

²⁶Chule ami janel, ajatnu kisimdoh chengse chu sangsomgup le sangni toh jasagi ahi.

²⁷Chule akoma gebuh kison dinga chu Asher phung hiding: chule Ocran chapa Pagiel chu Asher chate chunga gal lamkai hiding ahi.

²⁸Chule ami janel, ajatnu kisimdoh chengse chu sangsomli le sangkhat toh janga ahi.

²⁹Chubanna chun Naphtali phung hintin: Enan chapa Ahira chu Naphtali chate chunga gal lamkai hiding ahi.

³⁰Chule ami janel, ajatnu kisimdoh chengse chu sangsomnga le sangthum toh jali ahi.

³¹Chule Dan gebuh-a kisimdoh jouse chu sangjakhat le sangsomnga le sangsagi toh jagup ahi. Chule amaho chu aponlap utoh anunung pena cheding ahiuve.

³²Chule hichengse hi Israel chate lah-a apu apateu insung dungjuija kisimdoh chu ahi: agebuh uva ajanel pumpiu akisimdoh chengse chu abonchang keijin sangjagup leh sangthum to janga le somnga ahi.

³³Ahivangin Pakaiyin Mosi athupeh bangin, Levi ho chu Israel chate lah-a chun akisimtha pon ahi.

³⁴Chutichun Israel chaten Pakaiyin Mosi athupeh bang chun abol taovin; aponlap kom cheh uva pon in akisonun, amaho insung kailhah dungjui cheh le apu apateu insung dungjui cheh-in malama akitolun ahi.