Read Thado Chin Minbu 20 Bible Online

Minbu 20 - Thado Chin bible

Minbu 20

¹Chujouvin Israel chate, houkhom ho pumpi ngei chu lha masa sungin Zin gamthip ahung lhungun ahi. Chuin mipi ho chu Kadesh'a gebuh akisonun; chule hia chun Miriam athin, hia chun avuitaovin ahi.

²Chule hia chun houkhom ho ding twi aumtapon; chuin amaho Mosi le Aaron dounan akikhom khom taovin ahi.

³Chuin mipin Mosi akinah piuvin, hitin atiuve, Isopihou Pakai angsunga anathi laijuva chu Pathen'in eina thisah-u hitavele!

⁴Chule ipidinga keiho le kagancha hou hi hikoma thi dinga, nangman Pakai houkhom ho hi hiche gamthima neipuidoh-u ham?

⁵Chule ipi dinga keiho hiche gitlouna muna hi puilut dinga Egypt gama kona neihung doh sah-u ham? Hiche hi muchi, thei changho, lengpitheiho, kolbuthei ho mun jong ahipon; twidon ding jeng jong aumpoi, atiuvin ahi.

⁶Chuin Mosi le Aaron chu mipi kikhom mitmu tah-a chun houkhom ho houbuh kot lama chun achelhon tan, amai tolla asulut lhonin ahi: chuin Pakai loupina chu ahenguva ahung kilahtan ahi.

⁷Chuin Pakaiyin Mosi jah-a aseijin, hitin ati.

⁸Tenggol chu kilah-in, chule nangma le nasopipa Aaron'in mipi chu khomkhom lhoninlang, amitmu tah-un songpi jah-a chun thu seilhonin; hichun atwi ahin putdoh sah-a, chutia chu nangman songpi-a kona chu twi naputdoh sah ding ahi. Chutengle nangman houkhom ho le aganchahou twi napeh ding ahi, ati.

⁹Chuin ama thupeh bangin Mosi'n tenggol chu Pakai angsunga konin akilahtan ahi.

¹⁰Chuin Mosi le Aaron'in houkhom ho chu songpi masanga chun akhom lhonin; chule ajah uva, Tun doumah bolho nanghon ngaijun; hiche songpi-a kona hi twi kalon dohsah teitei lhonding ham? ati lhone.

¹¹Chuin Mosi'n akhut chu adomsangin, atenggolin songpi chu nivei avon ahi. Chuin twi chu neng jengjungin ahung longdoh tan, hitichun houkhom ho le agancha houvin jong adonun ahi.

¹²Chuin Pakaiyin Mosi le Aaron jah-a, Nangnin Israel chate mitmu-a suhtheng dinga neitahsan lhonlou jehchun; hiche mihohi keiman kapeh gamsunga chu napuilut lhon louding ahitai, ati.

¹³Hiche hi Meribah twi ahi; ajehchu Israel chaten Pakai chu akidou piuvin, chuin Ama amaho-a chun suhthengin aumin ahi.

¹⁴Chuin Mosi'n thupole ho chu Kadesh'a konin Edom lengpa koma asolin, ahenga, Nasopipa Israel'in hitin aseije, nangman kachunguva lhung hahsatna ho jouse nahesoh keijin:

¹⁵Itobanga kapu kapateu chu Egypt gama anachesuh uva, chule keiho Egypt gama phat sottah kana chennuva; chule Egypt mihon keiho le kapu kapateu einabol genthei danhou;

¹⁶Chule keihon Pakai henga kapen phatnun, aman ka aw-u ajatan, vantil khat ahin solin, Egypt gama konin eipuidoh-un ahi. Chule ven, keiho Kadesh mun, nagamgi china um khopi khatna kaumuvin ahi.

¹⁷Katao ahi, Nagamsung neijot galkaisah-un: keihon loulai ahiloule lengpithei leiho lah kajot loudiu, twikul ho-a twi jong kadon loudiu ahi: lengpa lamlena bou kacheuva, nagamgi sung kagalkai kahseuva jetle veija jong kakihei loudingu ahi, ati.

¹⁸Chuin Edom'in ahenga, nahung galkai theilou dingu ahi, achutiloule nangdouna-a chemjam toh kahung konding ahi, ati.

¹⁹Chuin Israel chate chun ajah-a, Keiho lamlena chu kache dingu ahi: chule ijemtia kei le kagancha hon natwi kadon uva ahile, aman kapeh dingu ahi: imacha dang bollouva kenga bou kache galkai dingu ahi, atiuve.

²⁰Chuin aman, Nagalkai theilou ding ahi, ati. Chuin Edom chu amaho dou dingin mi tamtah le galsatmi hat tahho toh ahung kon taovin ahi.

²¹Hitichun Israel gamgi galkaisah ding Edom anomtapon; hijeh chun Israel chu ama-a konin achoma akihei mangtai.

²²Chuin Israel chate, houkhom ho jouse ngei chu Kadesh'a konin ahung kitolun, Hor molsang ahung lhung taovin ahi.

²³Chuin Edom gamgia Hor molsanga chun Pakaiyin Mosi le Aaron henga chun aseijin, hitin ati.

²⁴Aaron amitetoh kigom khom ding ahitai; ajehchu ama Israel chate kana peh gama chu lutlou ding ahi, ajehchu Meribah twija chun kathu dounan nakiphin lhonin ahi.

²⁵Aaron le Achapa Eleazar chu kouvun lang, Hor molsanga hinpui touvin:

²⁶Chule Aaron vonho chu sutlhan lang, achapa Eleazar vonpeh-in: chule Aaron amitetoh kigoma khoma, hia chu thiden ding ahi, ati.

²⁷Chuin Mosi'n Pakai thupeh bangin abolin: houkhom ho jouse mitmu-a chun amaho Hor molsang lama akaltou taovin ahi.

²⁸ Chuin Mosi'n Aaron vonho chu asutlhan, achapa Eleazar chu avonpeh-in; chule hiche molsang chunga chun Aaron athitan ahi: Chuin Mosi le Eleazar chu molchunga kon chun ahung kumsuh lhontan ahi.

²⁹Chuin houkhom ho chun Aaron thi chu amu phatnun, amaho Israel insung pumpi ngei chun Aaron chu nisomthum alunghem piuvin ahi.